KIA Nih Aungmyay (1) Khua N-Lung Hka Pyituhsit Sakhan An Laak Chap. Kachin ramkulh, Waingmaw peng, Aungmyay (1) khua N-Lung Hka Pyituhsit sakhan ah umhmun a khuar mi U Shwe Min hruai mi Pyituhsit pawl cu Kachin ralkap KIA nih an kah hna i sakhan a ningpi in an laak hnu ah hmunram thianhfelnak zong an tuah, tiah theih a si.
Nizan March 7, zinglei 6:00 hrawng ah KIA ṭangṭi phu nih N-Lung Hka Pyituhsit sakhan cu an kah i nihin March 8, chunhnu suimilam 1:00 hrawng ah sakhan cu a ningpi in an laak khawh i hmunram thianhfelnak zong an tuah colh, tiah Aungmyay (1) khua tualchung mi pakhat nih a chim.
KIA ṭangṭi phu nih an laak mi sakhan chung ah a taang mi Pyituhsit cheukhat an tlaih hna i hriamnam tam ngai zong an laak, tiah thawng laaknak hrampi nih an chim.
N-Lung Hka Pyituhsit sakhan cu Waingmaw peng chung ah umhmun khuar mi Shwe Min Pyituhsit sakhan lak ah a ngan bik a si i SAC ralkap nih hramhram in nawlngeihnak an laak hnu in ralkap 30 hrawng nih an hngah peng mi sakhan pakhat a si. Cuka hmunram chung i Pyituhsit hruaitu lutlai U Shwe Min cu nizan March 7 ah KIA nih an fimhlawm.
Waingmaw peng chung ah a um mi Pyituhsit sakhan pahnih lak ah Aungmyay (1) khua Pyituhsit sakhan laak a si cang caah Wuyang Pyituhsit sakhan lawng a taang cang. The Chin Post