Nizaan ah kan thinlung a kan hninh dihtu!

Nizaan Kan Chin Ramkulh Tel In Kawlram Thawngpang Chia Fonh!
==================
Chin National Defense Force ralkap pahnih cu March ni 28 ah tiva an kalnak ah ti ah an paam, tiah theih a si. CNDF ralkap Salai Je Nun Piang (kum 17) le Salai Ram Than Sang(kum 20) cu nizan March ni 28 ah Falam peng Manipur tiva ah an paam, tiah theih a si. Nihin ah an ruak thlahnak an tuah cang hna, tiah theih a si!

Magway ramṭhen, Saw peng San khuami phungki pakhat le ralhrial Chin nu pakhat cu SAC ralkap nih ralphaw ca ah an tlaih hna tiah tualchung mi nih an chim. Nihin March ni 29, chunhnu ah tlaih a tongmi nu hi Mindat pengmi a si tiah ralhrial camp ah aa dormi hna he naihniam in ummi pakhat nih a chim.

Saw peng Pansan khua in a chuakmi SAC ralkap hna cu nihin March ni 29 ah Tay khua an phan i phungki sianginn le tualchung mi hna an umnak inn ah umhmun an khuar, cu hnu ah San khua a phanmi SAC ralkap 80 hrawng cu nihin March ni 29, zinglei ah San khua thlanglei hoih in an chuak tiah tualchung mi nih an chim.

SAC ralkap nih rallam hmun hnih in an sial caah tualchung mi hna zong a himnak hmun ah an zaam hna tiah theih a si. “Khualu ah ummi phuki pakhat le ralhrial Chin nu pakhat cu SAC ralkap nih ralphaw ca ah an tlaih hna, hmaisuang ah an kalter hna tiin kan theih” tiah tualchung mi pakhat nih amah social media ah a langhter.

Saw peng tualchung mi pakhat zong nih San khua phungki pakhat le ralhrial nu pakhat tlaih an tonnak kong cu a dikmi a si ko tiah a chim ve. San khua phungki le ralhrial camp ah aa dormi Chin nu a tlaitu SAC ralkap hna hi Pakokku hrambunh ṭatmah 101, Gangaw hrambunh khahlahyiah 50, Kyaukhtu hrambunh ah-mah-ṭah 368 le Mindat hrambunh khahlahyiah 274 in an si tiah theih a si.

SAC ralkap hna hi Mindat-Magway kar Htinchaung, Kyatutin, San, Dae khuachung ah March ni 24 in umhmun a rak khuar cangmi an si. Tlaih a tongmi phungki le ralhrial Chin nu pakhat cu Kyaukhtu hrambunh SAC ralkap camp ah an kalpi hna tiah zumh a si, tlaihkhih an tonnak kong ah PDF he pehtlaihnak nan tuah tiah SAC ralkap nih an puh hna caah an tlaih hna tiah micheu nih an chim nain, cu kong ah biafiang theih a si rih lo.

Vaute[March] 28 ah Ayeyarwady ramṭhen Thabaung peng Hlaygyitet khua ah nu pakhat ram vui lamhnak in a nunnak liam tiah theih asi. Khuachung ah lut in an umnak inn a rak hnursuan piak tu ram vui cu inn ngeitu a fapa nih hmundang ah kal dingin a ṭhawl a hnu in hringtu a nu nih i ralring tiah a aumi cu Vui hrang nih a theih tik ah rak kir in anu cu a lamh i a ril a chuak caah a nunnak liam colh tiah ṭuanvo ngeitu pakhat nih a chim.

Vui lamhnak in nunnak liam mi kum 51 mi Daw, Ri Ri ruak hi Hlaygyitet khua ah khuasami hi palik le ram zohkhenh tu hna nih Hlaygyitet khua si-inn pi ah an kalpi tiah theih asi.

A tu bantuk in khuachung rak lutmi Vui anum ahcun ramtang zohkhenh tu le palik hna sinah theihternak tuah ding le mah pumpak nih va neih lo dingin ramtang zohkhenh tu phu in ṭuanvo ngeitu pakhat nih theihternak a tuah.
Ramlak ummi Vui hi a thlithup in an thah lengmang hna caah a tu bantuk in Vui khuachung lei panh in an rak luhnak hi a si tiah an chim chap.

Magway ramṭhen, Htilin peng Kyuthar khua le Kanthar khua kar um Shwedwin Toe ramlak ah SAC ralkap nih an kah i a puak rih lomi hriamngan 40mm bomb lung khat a puah caah kum 26 tluk pa pakhat a nunnak a liam i, pakhat hliamhma a pu, tiah Yaw Revolution Army – YRA in ṭuanvo ngeitu nih a chim.

March ni 28 zanlei suimilam 4:30PM hrawng ah Htilin peng Kyuthar le Kanthar khua kar ah lo rian a ṭuanmi kum 26 tluk Kyaw Lin cu, SAC ralkap nih an kahmi hriamngan a puak rih lomi 40mm bomb nih a puahhnawh caah a nunnak a liam, a pawng ah a um vemi pakhat zong hliamhma a pu, tiah theih a si.

SAC ralkap nih rallam an sialnak khuate le kahdohnak a chuahnak hmun cu, cuka hmun he naihniam in a ummi PDF nih humnhma thianhfelnak kan tuah khawh cang tiin thawng an thanh hlan chung paoh cu umkal rih lo ding a si lai. Cu pin ah SAC ralkap hriamnam le zen-kuan nan hmuh ahcun thawng nan kan thanh naklai kan in nawl hna,” tiah Gangaw pengkomh Battalion 15,16,17(YRA, Htilin) in Bo Yaw Naing nih a chim.

Sagaing ramṭhen, Shwebo peng Mu hlei ah nizan March ni 28 zing suimilam 9:00AM hrawng ah bomb lung 2 a puah ruang ah ngakchia pakhat le upa pakhat an nunnak a liam pin ah minung 18 hliamhma an pu, tiah theih a si.

Bomb a puah ruang ah kum 4 tluk ngakchia pakhat le kum 60 tluk pa pakhat an nunnak a liam i, hliamhma pumi 18 cu Shwebo sii-inn ah an kalpi hna. A hliamhma a fak tukmi hna cu Mandalay sii-inn ah an kuat hna, tiah theih a si.
Bomb a hmanhtu hi mizei phu dah an si i khoika lei ah dah an hmanh ti cu kan fehter kho rih lo, tiah Shwebo peng tualchung mi hna nih an chim.

SAC nih cathanh an chuah ning ah PDF nih an hmanhmi bomb a puah ruang ah kum 4 ngakchia le kum 11 tluk ngakchia 2 telh in pa 11 le nu 8 hliamhma an pu, tiah an langhter. March ni 25 lio zong ah Shwebo peng Bungbuai khua le Zitaw khua kar ah khualtlawng leilawng pakhat tualchung hriamtlai nih, an hmanhmi bomb nih a puahhnawh sual caah phungki 1 le minung 5 hliamhma an rak pu. PDF nih tualchung mi hna cu zan suimilam 10:00PM in zinglei suimilam 4:00AM tiang khual nan tlawng lai lo. Khual nan tlawn hmanh ah theihternak nan kan tuah hmasa lai, tiah ralrin an pek hna. Crd-The Chin Post