“Nitlak lei phu pawl nih Russia he pehtlai in an zuammi pawl

UN Human Rights Council chungtel sinak in dinhter ding ah American le Britain nih an i zuam
==========
Russia cu UN Human Rights Council chungtel sinak in dinhter ding caah i zuamnak program cu American le Britain nih April 4 ah an thanh. Ukraine ram, Bukhara khua ah Russia ralkap pawl nih mipi an thah hna tiah an puh dih tlawmpal ah Human Rights Council nih Russia chungtel sinak dinhter ding zuamnak a rak chuah hi a si.

“Bukhara khua in a chuakmi hmanthlak pawl le Ukraine ram pumpi ah a rawkmi ruangah kan bia bantuk in a tak ah kan tuah a hau cang” tiah UN Ambassador to the United Nations Linda Thomas-Greenfield nih April 4 ah a mah Twitter cahmai ah a tar.

“A biapi tuk tiah kan ruahmi zulhphung a lonhmi ram cu Council ah umter rih ding cu kan onh lai lo” tiah a chim.
Russia Human Rights Council chungtel in dinter ding me zuknak cu April 7 ah an tuah lai tiah theih a si. “Bukhara khua ah a phuphu in thahnak le fih a nung tukmi mithahnak thawngpang in raltuknak lei sualnak he pehtlai in a ṭhawng tukmi tette pawl kan zoh a si ahcun Russia cu Human Rights Council chungtel pakhat a sinak a ngei kho ti lai lo, dinhter a si ko lai” tiah Britain Minister of Foreign Affairs Liz Truss nih a chim.

Cu kong he pehtlai in Russia nih faak piin alnak a tuah. “Mah hi zumhding a um lo” tiah UN Ambassador to Russia Vasily Nebenzya nih a chim. “Nitlak lei phu pawl nih Russia he pehtlai in an zuammi pawl, vawlei pi ah kan i telnak in chuah an i zuamnak hna hi kan ton bal lomi a si” tiah a chim.

“A tu bantuk thiltuah hi Russia le Ukraine karlak kahdaih biaruahnak caah bawmchantu a si lai lo” tiah a chim.
Ukraine khua leng ah a ummi Bukhara khua cu Russia ralkap pawl nih an kaltak hnu ah hri in hrenmi mipi pawl le mipi thuam in a thimi ruak pawl a luancia zarh ah Journalist pawl nih an hmuh. A tam deuh cu an hnulei lu ah kah an tong tiah Bukhara Mayor nih a chim.

Thah kan ton dan hi pakhat le pakhat aa pehtlai nain a tutiang ah mipi ruak 410 kan hmuh chap tiah Ukraine Attorney General Iryna Venediktova nih a chim. Bukhara khua hmantlak pawl nih “A si khomi raltuknak lei sualnak” timi a sawh duh tiah Human Rights riansang tlaitu Michelle Bachelet nih a chim.

Russia ralkap nih mipi thahnak a um lo tiah Russia cozah nih a al i Bukhara khua ruak hmanthlak hna cu “A dik lomi pawl” tiah a puh hna. UN Human Rights Council in Russia dinhter khawhnak ding caah UN General Conference ah chung tel cheuthum cheuhnih nih hnatlaknak me an pek a hau. A herhmi me cheuthum cheuhnih ah a karlak me pawl cu tuak a si lai lo nain a tu thil a tak ah kan canter khawh lai tiah American le Britain nih zumhnak an ngei.

Russia nih Kyiv khua kiang khuate Bucha an zaamtak hnu ah Ukraine ralkap pawl an va kal i tulsapur in civilians an rak thahmi pawl ruak an va hmuh len hna. Hi kongah Zelensky nih cun Genocide bak asi a ti i, Biden zong nih “war crime” asi, tiah biatak thlakin Russia hi dantat ai tim chinchin.

Ukraine hi hriamnam nganngan bawmh ai tim chinchin cang. Biatak tein hi kong ah Russia cu dantat huah dawh in a um cang. Asinain Russia lei nihcun kanmah tuahmi asi lo tiah an ti ve. Russia cu a dintuai lailo timi cu chim hau lo khi asi ko!

Russia nih raltuknak lei a buarmi zohfelnak i a bawmtu caah Kyiv a pawng khua hna ah mipi ruak 410 cu Ukraine nih a hmuh nain mithmuh kuttongh in a hmumi cheukhat cu thinphang thlalau in an um lio a si caah holh kho lo lak in an thinphang tiah Ukraine Attorney General nih April 3 ah a chim.

Kyiv khua pawng cheukhat hmunhma cu Russia ralkap nih an kaltak hnu ah Kyiv khua in meng 23 a hlatnak ah a ummi Bukhara khua cu kekal ralkap pawl nih an tlaih ko nain khuami 300 cu Russia ralkap nih an thah hna tiah Mayor nih a chim.

Russia nih Bukhara mipi an thah hna timi sualphawtnak cu Russia nih faak piin a al. Russia ralkap hramhram thiltuahnak a ingmi khua an um lo tiah Russia nih a chim i Ukraine nih nitlak lei thawngzamh pawl nih ṭial hna seh tiah a tuah hramhram mi a si tiah a puh.

Bukhara, Irpin le Hostomel khua hna ah Ukraine sihni pawl April 3 ah a voikhatnak bik an lut kho i Russia sualnak zeitlukdah a phanh timi tuakding ah caanhlei kan herh chap tiah Attorney General Iryna Venediktova nih a chim.
“Mit in a hmutu pawl he rian kan ṭuanṭi a herh. A tu cu mipi hna an intuarmi a tamtuk caah holh kho lo tiang in an um”.

A tu ruak 140 hi zohfelnak kan dih ko nain Kyiv khua sizung ah a rannnak in Forensic Pathologist thlahpiak ding in Ministy of Health kan forhfial lai tiah a chim fawn. Ukraine President Volodymyr Zelenskky nih “A zaa leng thahpiak kan tong, mipi an hrem hna, an thah hna, lam cungah ruak pawl hmuh a si, pawngkam ah bom an hmanh, ruak hmanh ah bom an tarh” tiah a chim.

Nitlak lei phu nih Russia cu phihkharnak a thar pawl an tuah ko lai nain cu thiltuah lawng nih cun a zat lo tiah Ukraine President nih a chim.

Mipi tampi a zaa leng thahpiak kan simi hi a fiang ko tiah Minister of Internal Affairs Denys Monastyrsky nih a chim. Pawngkam ah bom thianh lio a si caah pa zeizah an si cu a fiang in chim khawh a si rih lo tiah a chim. “Khuami tampi zong an tlau tiah ruah a si. A fiang in cun chim khawh a si lo nain a tam tuk ko” tiah a chim.

Khiv Hmunhma Pawngkam Vialte Cu Ukraine Ralkap Nih An Control Khawh Cang, Ramhnih President Cu Turkey Ah Tonnak An Ngei Kho Cang! Ukraine ramchung Khiv hmunhma pawngkam vialte cu Russia ralkap kut in an laak khawh than cang nak cu Ukraine ramchung runvennak deputy minister nih April (2) ah thawng a thanh.

Cuka hmunhma le pawngkam vialte cu Russia ralkap kut chungin zalonnak an hmuh cang tiah Ukraine ramchung runvennak deputy minister nih fiang tein a chim hi a si. Khuapi le pawngkam khuate (30) cu Russia ralkap kut chungin kan laak than khawh cang tiah Ukraine Cozah zong nih cathanh an chuah cang.

Russia nih Ukraine nitlaknak leiin a ralkap hna cu duhsa duhsa tein a laak thluahmah cang hna tiah Ukraine President nih a chim. Asinain Russia ralkap hna nih Ukraine ramchung hmun tampi ah vawlei tangah bomb an phum dih caah mipi nih i ralrin a herh taktak rih ruangah mah le umnak inn ah rak kir rih lo dingin president nih a forh hna.

Ukraine nichuahlei ahcun Russia ralkap nih kahdohnak thazaang an chap chin rih caah Khiv khuapi le cuka lei pawngkam hmunhma i tlanglawng i dinhnak station pawng i a ummi Ukraine ralkap hmanmi kuanfang khammi tank le oil an chiahnak hmunpi cu vanlawng in kan phomh tiah Russia runvennak vuanci nih April (2) ah khan a phuan.

Ramhnih karlak ah kahdaihnak kongah tonbiaruahnak an ngei lengmang nain i hmuh thiamlonak a chuak lengmang.
Ramhnih president veve cu Turkey ah tonbiaruahnak an ngei kho tiah Ukraine rammi remdaihnak sertu palai pakhat nih a chim.