Nikhat chungah Minung 1,400 tluk tam in Amazon nih Riantuantu a Laak hna

January thokin vawleicung pumpi huap in Amazon nih riantuantu a lakmi dihlak hi 400,000 an si cang i, cucu buaktlak in tuak ah cun, nikhat ah minung 1,000 lenglo peng a lak, tinak a si. Cu kong cu Fox Business ah a chim. 2020 July in September tiangah hin Amazon nih riantuantu 1.25 million ai ngeih cang hna. A caan zohchun in a hlaan tawnmi minung 100,000 telh an si rih lo. 2019 i Oct. in Dec. tiangah khan cun 647,000 lawng an si rih. Nikum nakin tukum ah riantuantu a let hnih dengmang in a karhter, tinak a si.
Fortune 500 data ningah, a liamcia kum 10 chungah zeibantuk US company hmanh nih hitluk in rian a chuahpi bal lo, tiah Amazon nih a chim. Rian a sermi ah hin, warehouse rian thok in, thilri chanh rian le minung pumpaak in thil cawknak dawr riantuannak in tech development i thiamsang dirhmun tiang, riantuantu kawlhawlnak rian, chawva tawlrenak le marketing rian an i tel hna.
Amazon Robotics sernak inn le lo asiloah Project Kuiper labs i thiamsangmi lawng tuanmi rian zong a pek. Amazon i rian vialte hi nazi pakhat ah $15 lahkhah pek an si i, full-time riantuantu vialte hna hi health insurance, 401k plan, 20 week paid parental leave le a dangdang benefits an tingco. May lio i pandemic a tlun ruangah khan hngakchia bomhnak an pekpiak hoi hna. Kan hnung August ah khan, North America i tech office 16 an ngeih ciami ah office 6 chap rih dingin timhlamhnak an ngeihmi kong thawng an thanh. Detroit, Dallas, San Diego le Phoenix telhchih in khuapi ah technology rian 3,500 an chap khawh. Missouri, North Dakota le Nebraska ah tu kum in khan investments avoikhatnak an tuah.
Arlington, Va i an headquarters ah riantuantu thar minung 2,500 hrawng lak khawh an i tim. Bellevue, Wash i an Puget Sound headquarters ah minung 10,000 chap an i tim. Cun, corporate riantuantu le khuamaw caan i rian a pekmi hna minung 20,000 a thar in chap an i tim. Covid-19 a tlun ruang i states kip nih mipi tonnak an kham, cun business pawl an khaarpiak hna hnu ko hin hin an sermi innchungtang a herhmi thilri siseh, tirawl siseh, movies siseh, television siseh, stream music siseh, podcasts pawl ko hi an manh chinchin.
β€œAmazon riantuantu pawl hi an tak an thenhhlimh lo, cun mipi ningcang lo in an kan chonhbiak,” tiin pulrai an tawlrel ning kongah Amazon hi thangchiat a tong ngai ve. Asinain, pulrai tlunh lai tih ruangah a warehouse le thilri an kuat hna nak centers kipah zulh dingmi phung 100 lenglo a serchap ve ko. Credit: Chelsea Bawi