Nihin Thantlang Khua Kahdohnak Thawngpang Update!

Nihin Thantlang Kahdohnak ah SAC Ralhrang 5 Hrawng an Thi
——–
Nihin zinglei sml. 10:00-11:00 karlak ah Thantlang khuachung ah CDF-Thantlang le SAC ralhrang karlak kahdohnak a chuak i ralhrang panga hrawng an thi, tiah CDF nih thawng an chuah.’

“Ralhrang panga nak tlawm lo an thih pin ah hliamhma a pumi an tampi lai tiah kan zumh. CDF lei hliamtuar kan um lo,” tiah thawngthanhnak ah an langhter.

Ral an Zaammi a Hngal lo, Civui kan Zawh tiah a Ruah. Mizoram ah a phanmi Laitlang ralzaam lak ah kum upa bik lei a si lai tiah ruahmi kum 93 putar nih ral an zaammi hngal loin civui kan zawh tiah a ruah i thil sining pawngkam mi a hal len hna. A kum a upat cang pin ah a hna zong a chetmi a si.

“Civui hi zei tik tiang tuah a si lai. Zeitik ah dah khua lei kan tlun hna lai? tiin a hal len hna,” tiah Mizoram thawngzamhnak pawl nih an ttial. Hi kan putar konglam he pehtlai hin The Chin Journal nih a min le a khua fiang in kan thei kho lo.

Thantlang Khuachung Ngaingai ah Minung 8 Lawng an Taang. Thantlang khuapi zaamtak loin khuachung ngaingai ah khuahngak in a ummi hi minung 8 lawng an taang, tiah Thantlang khualuh lai lamthlang ah ngakttah sianginn a tuahmi saya No Mang nih nihin zaanlei ah The Chin Journal ah a chim.

“Atu Thantlang khuachung ngaingai ah cun minung 8 lawng an um cang. Inn 2 in an um. Dawng hnih in minung 3 hi inn khat ah an i fonh. A dang dawng thum in minung 5 hi inn khat ah an i fonh ve i cuticun khua chuahtak loin an um hna,” tiah a chim.

Kawl media ngan cheukhat nih Thantlang khua an chuahtak dih cang tiah nihin chun ah an ttial nain Thantlang ralzaam tawlreltu bu in ttuanvo ngeitu, Thantlang peng sipin haotu Pu Ram Khar le saya No Mang nih cun “Thantlang khuapi chung ah a taangmi minung an um rih ko,” tiah an chim.

Khuachung ah minung 8 an taang i, khualeng deuh ah a ummi saya No Mang ngakttah sianginn ah minung 20 zong an taang rih. Nihin zinglei sml. 10:30 hrawng ah Thantlang khuachung in meithal kah thawngpang minute 30 chung hrawng a thanmi zong saya No Mang te singinn in an theih. Credit: The Chin Journal