Nihin Kan Tuarmi Hi A Phu Ko!

NIHIN KAN TUARMI HI A PHU KO!
=========
Kan ram uknak țhat lo ruang i Chin Miphun kan tonmi thih lohnak hna. 1. Mizoram ah kuli kan rak țuannak ah, raifanh le a phunphun in a thimi kan tam. Kan Miphun kan nun khawhnak caah a rak si. 2. Phakanh Mainsu tibantuk ah tangka kan kawl i tlangval țhațha tampi kan thi. Kan Miphun kan nun khawhnak caah a rak si.

3. Malaysia ramah tangka kan kawlnak ah, tampi kan thi. Kan Miphun kan nun khawhnak caah a si. 4. Ramthumnak ah kan i dornak ah tampi kan thi. Kan Miphun kan nun khawhnak caah a si. 5. Nihin kan ram le miphun caah tampi kan thi cang. Kan Miphun kan nun khawhnak ca lawng si loin, kan luatnak ca zongah a si i hmailei Chin Miphun Thluachuahnak caah a si.

Nai hrawng ka nunnak ah hla a ra lengmang mi cu, “a phu ko, teinak thantar he rak kir te u mu” ti hi a si. BAWIPA nih, rai le ral le uknak chuttu hna le mițhalo hna le misual mi hna le zumlotu hna le țhatlonak vialte le mițhalo pa (satan) lakah in huphheng hna seh. BAWIPA Vel nan cungah um ko seh.

THLARAU KHAMHNAK HI THIL RIT A SI LO; JESUH KHRIH a thih i a thawh țhan hnu i, kan thlarau khamhnak hi khamhnak hmuh hnu ah, kan thlarau khamhnak cu tuahsernak in kil ven hau phun khi a si lo. Thlarau khamhnak kongah hohmanh nih nawlbia thilrit in serpiak hna hlah seh. Nawlbia tangah siloin PATHIAN vel tangah kan um cang (Rom 6:14). PATHIAN duhnak thiltha tuah cu PATHIAN hrin, PATHIAN fa kan si cang hnu ahcun, kanmah zia dawh a si cang cu! A nuam in a nuam tuk cang cu!

Judas 1:3 nih, “PATHIAN nih voi khat ah za lak in a mi a pekmi hna zumhnak kha rak tanh u,” a ti bantuk hin, na thlarau zungzal nunnak caah voikhat (zumhning dik) in na zumh ahcun, thlarau khamhnak le THLARAU in Hrințhanmi sinak caah a za cang! JESUH KHRIH cu THIANG THLARAU bawmhnak thawngin BAWIPA ah na hun cohlan/zumh tikah, KHRIH he nan i peh! KHRIH he naa pehtlaihnak nih mithar ah an can ter cang i nunning hlun kha a lo cang (2Korin 5:17)!

Voikhat (zumhning dik) in na zumhnak thawngin, THLARAU in hrinmi, PATHIAN fa na si cang ahcun, PATHIAN fa i can khawhnak caah zumh țhan lengmang a hau ti lo. Zeicahtiah PATHIAN fa a si cangmi cu PATHIAN fa si pengnak hnga caah zumh peng kha a herh lo. Zumh va timh peng hau ti lo in JESUH KHRIH cu PATHIAN FAPA a si i kan BAWIPA a si ti cu a hngalh in kan hngalh cang i PATHIAN he PA le fa kan si cang! PATHIAN chungkhar kan si cang! Chungkhar i kan nu le pa le khi zumh hau loin, kan nu le pa an si. Cu bantuk cun PA he FAPA he THIANG THLARAU he chungkhar khat kan si cang!

Hi Biatak hi fiang tein, THIANG THLARAU nih a hngalhter (pemhter) cangmi hna cu a nun a dawh lomi an um fawn ti lai lo. Zumtu a nun aa dawh lomi hna hi PATHIAN Biatak ah an sining fiang tein an hngalh ding zat an hngalh lo ruangtu ah a si.

THLARAU in Hrințhanmi kan si hlan hmanhah, THIANG THLARAU bawmhnak thawngin JESUH KHRIH cu BAWIPA a si kan ti i kan zumh cang ahcun, THLARAU in Hrințhanmi kan si hnu, kan chunglei ah thlennak a um hnu, kan chunglei he kan lenglei he THIANG THLARAU in thuamh kan si i PATHIAN fa kan si hnu chinchin ahcun, zeitluk in dah KHRIH JESUH cu kan hngalh i kan i pehtlaihnak cu a țhat i a feh chinchin lai?

Jeim 2:26 nih, “Zumhnak cu tuahnak lo cun a thi,” a ti timi hi thlarau khamhnak ca i JESUH KHRIH zumhnak a si lo. A rianțuannak ca i PATHIAN bia zumhnak tu a si. Tahchunhnak ah, PATHIAN nih, “mizeng pa pakhat khi thla va campiak law ka damter lai,” tiah a ka ti hnga. PATHIAN cu ka zumh i a Bia zong ka zumh caah a damter lai ti zong ka zumh bak ko. Asinain, thildang dangah ka buai tuk caah thla ka va campiak kho lo (ka va tuah lo). Cu zumhnak cu tuahnak a um lo caah a thimi ah a cang ko.

KHRIH JESUH a hngal fiang cangmi hna nihcun kan hngalh taktak ko. Tuu tlau a liang bakin a putu, tangka tlau a hmuh hlan lo a kawltu, fapa tlau a kir khawhnak hnga, a lung a pemtertu, fa u tlau a leemtu, THLARAU in Hrinthanmi kan si i PATHIAN fa kan si khawhnak hnga, tuah a herhmi vialte a tuah i, inpiak le tuarpiak a herhmi vialte a kan intuarpiaktu, a Thisen le a Sa a kan din ei ter i, a NUNNAK THLARAU a kan hrawmhtu, JESUH MESSIAH he ho nihdah an țhen khawh hna lai?

Hi Biatak a hngal i a pemh tu hna cu zungzal Thluachuakmi cu an si! Haleluia, Amen! THIANG THLARAU thawngin KHRIH JESUH cu nan hngalh fian khawhnak hnga PATHIAN nih Vel in ngeih ko hna seh. KHRIH lamkaltu, Tluang Lian (Martar).