Thawngpang Chia Fonh!
=================
Magway ramṭhen, Saw peng, Kyaukhtu khua pawng a ummi Yinye khua cu SAC ralkap nih, May 31 zanlei suimilam 4:00 hrawng ah an khangh i, inn 27 a ciamh pinah khuami pakhat nunnak a liam, tiah tualchung mi hna sinin theih a si.
Yinye khua cu Kyaukhtu he meng 5 hrawng aa hlatnak ah a ummi a si i, khuahlun le khuathar fonh ah inn 150 hrawng a umnak khuate a si. SAC ralkap nih an khanghmi hi khuahlun a si.
SAC ralkap nih khua an khangh lio May 31 zanlei suimilam 2:30 hrawng ah Kyaukhtu hrambunh miakpi ralkap le PDF hna cu kaphnih in hriamngan in an i kap, tiah theih theih a si. Cu hnu ah Kyaukhtu vanlawng tual in SAC ralkap 17 cu motor in Yinye khua ah an kal i, khuami hna innlo cu an khangh, khuami pa pakhat a zengmi zong mei nih a kangh chih, tiah min langhter a duh lomi khuami pakhat nih a chim.
SAC ralkap pawl cu khua in an chuah hnu ah Yinye khuami le pawngkam khuami hna nih mei cu an phalh caah a khua ning pi in a ciamh lonak a si, tiah a chim chap. Data For Myanmar nih, May 19 i an langhter ning ah SAC ralkap le an kuttang mi nih inn an khanghmi hi 2023 February 28 tiangah Magway ramṭhen chung lawng ah inn 9,019 a phan cang, tiah an langhter.
Sagaing ramṭhen, Salingyi peng ah SAC ralkap pawl cu rallam sial in an lut i khuate 5 leng in khuami a thong leng ralhrial in an zaam, tiah Angia Pitdaidaung phu in ṭuanvo ngeitu pakhat nih a chim. June 1 zanlei ah SAC ralkap pawl cu Wunpound Company ah an lut i, cuka hmun cun Nyaungpingyi khua lei ah an kal ṭhan, tiah theih a si.
“Ralkap pawl cu Wunpond ah an lut i, Nyaungpingyi khualei ah an kal ṭhan. Khuate 5 in ral a hrialmi hi a thong an phan,” tiah Angia Pitdaidaung phu in ṭuanvo ngeitu pakhat nih cun a chim. Karen ramkulh, Kyain Seikgy khuapi ah SAC ralhrang nih helicopter in bomb a thlak pinah hriamngan in an kah hna i phungki 2 le mipi 2 an nunnak a liam, tiah tualchungmi hna nih an chim.
June 2, zing ah Kyain Seikgy khuapi chung ah SAC ralhrang le mipi ralkap hna karlak ah kahdohnak a chuak. Cu hnu ah SAC ralhrang nih helicopter in bomb a thlak i 120MM hriamngan pawl zong in khuapi chung cu an kah caah (Block.3 sang) um phungki 2 le mipi 2 an nunnak a liam i inn rawkmi zong a tam ngai, tiah theih a si.
“Tuzing suimilam 5:30 tluk ah kahdohnak a chuah hi a si i, cu hnu ah helicopter le hriamngan an kah caah 4 an thi i, ngakchia pakhat nih hliamhma faak ngai a tuar” tiah min langhter a duh lomi tualchungmi pakhat nih Khit Thit ah a chim ve.
Atu hi Kyain Seikgy khuapi cu pehtlai in kahdohnak faak deuh in a chuak sual lai ti an phang caah khuapi chung um mipi hna cu dai tein an um hna i, SAC ralhrang nih hriamngan he hriamhme he duhpaoh in an kah thluahmah, tiah theih a si.