Nihin Ah Kan Theih Khawh Mi Chungin Kahdohnak Thawngpang!
=====================
Bago ramṭhen, Htantabin(ထန်းတပင်) peng ah kahdohnak a chuak i, cu kahdohnak ah SAC ralhrang 20 an thi pin ah SAC ralbawi (Officer) 3 an tlaih hna, tiah tualchung PDF in ṭuanvo ngeitu pakhat nih a chim. May 10, zinglei suimilam 10:00 tluk in zanlei suimilam 5:00 tiang Htantabin peng, Nyaung Pin Thar khua pawng ah KNU, PDF ṭangṭi phufonh le SAC ralhrang kar kahdohnak a chuak. Cu kahdohnak ah SAC ralhrang 20 naak tlawmlo an thi i, ralhrang bawi (Officer) 3 tlaihkhih an si, tiah theih a si.
PDF ralkap pakhat nih “May 10 zing suimilam 10:00 in zanlei suimilam 5:00 tiang kahdohnak a chuak, SAC ralhrang 20 naak tlawmlo an thih pin ah 10 hrawng nih hliam an pu. Cu pin ah Officer 3 kan thiah hna, a thimi ralhrang ruak pawl cu khuachung inn dum hna ah an phum hna” tiah a chim.
Sagaing ramṭhen, Kalaymyo peng chaklei um Yarzagyo -2 ah rallam a sialmi SAC ralhrang pawl cu May 11, zinglei suimilam 5:00 tluk ah mipi hriamtlai PDF-Kalay nih an kah hna, tiah theih a si, SAC ralhrang nih an sakhanpi in hriamngan he an kahbawmh hna pin ah thirkamhmi (Tank) motor 5 in ralbawmtu an thlah hna.
Cu pin ah SAC ralhrang nih raltuknak vanlawng in an kah bawmh hna caah PDF-Kalay in ralkap pakhat a nunnak a liam, tiah theih a si. SAC ralhrang nih hriamngan an kahmi cu Letpanchaung khua ah a tla i, a puahkeh caah mipi nu 2 nih hliamhma an tuar, inn pakhat zong aa rawk dih, tiah theih a si.
Sagaing ramthen, Min-mu peng Monywa le Mandalay motor lam cung ah thilri a phurmi SAC ralhrang motor hna cu tualchung PDF tangti phu nih bomb an puah hnawh hna caah ralhrang 3 an thi tiah T.G.R nih an langh ter. ‘May 10 zanlei sang ah Sagaing khua in Min-mu khua ah thilri chan dingah a ra mi SAC ralhrang motor hna cu Bomb kan puah hnawh hna i ralhrang 3 an thi.
Mah ni zanlei thiam ah kahdohnak a chuak than i ralhrang a thimi le hliam tuar theih khawh an si rih lo’ tiah T.G.R nih an langhter chih. Hi kahdohnak cu PDF tangtiphu a si mi, T.G.R PDF, Black Eagle People Defense Force le Kyuak-she pengkomh PDF Battalion 2 hna an i bawm tiah kan theih.
Sagaing ramṭhen, Pale peng, Kandaunt(ကန်ဒေါင့်) khua um palik sakhan ah umhmun a khuarmi SAC ralhrang pawl cu luhhnawh in kahdoh an ton caah SAC 10 naak tlawmlo an thi, tiah M7 People’s Defense Army in ṭuanvo ngeitu pakhat nih a chim.
May 10, zan suimilam 8:45 tluk in zan suimilam 12:00 tluk tiang Pale peng, Monywa- Pale- Gangaw lampi um SAC ralhrang thazaang 70 hrawng nih umhmun an khuarnak palik sakhan cu mipi hriamtlai phu fonh nih an luhhnawh hna caah kaphnih kar kahdohnak a chuak. Cu kahdohnak ah SAC ralhrang lei 10 naak tlawmlo an thi pin ah tamngai nih hliamhma an tuar, tiah theih a si.
“Battalion hna, LPDF hriamtlai in minung tamngai nih luhhnawh in an kah hna, an sakhan cu kan la kho lo, an sakhan in pe’ 80 tluk tiang kan neih khawh. SAC ralhrang nih 60MM hriamngan hna in an kah bawmh hna nain ral bawmtu cu an ra lo” tiah M7 People’s Defense Army in ṭuanvo ngeitu pakhat nih Khit Thit ah a chim.
Kahdohnak cu Thunder Guerrilla Force Battalion 202, M7 PEOPLE’S DEFENSE FORCE le tualchung hriamtlai ṭangṭi phufonh hna kan si i, mipi hriamtlai in minung 6 nih hliamhma an tuar. Cu chung ah pakhat hi a nunnak caah thinphang ngai a si, tiah an langhter chih.