Sagaing Kahdohnak Ah PDF 4 An Nunnak A Liam, Ralhrial Motor Lehsualnak In Mipi pakhat A Thi
=========
Sagaing ramṭhen, Sagaing peng chaklei kam ah rallam sialmi SAC ralhrang le tualchung PDF hna karlak ah kahdohnak a chuak i PDF ralkap 4 nih ram le miphun caah an nunnak an pek, tiah tiah theih a si.Cu pinah SAC ralhrang nih rallam an sial caah ralhrial mipi hna nih an i citmi motor leh sualnak in nu pakhat a nunnak a liam i 6 nih hliamhma an tuar, tiah theih a si.
May 19, zing suimilam 6:00 tluk ah Sagaing peng, Pa-du (ပဒူ) khua lei ah rallam a sialmi SAC ralhrang thazaang 30 hrawng cu mipi hriamtlai phufonh nih an kahdoh hna, tiah theih a si. Cu kahdohnak ah SAC nih an hmanhmi bomb lamhsualnak ruang ah PDF minung 4 an nunnak a liam hi a si.
“Mipi hriamtlai phu sakhan pakhat cu SAC ralhrang nih mei in an khanghpiak hna hnu ah ralhrang nih an hmanhmi bomb cu PDF ralkap 4 nih an i lamh sual. SAC ralhrang lei zong an faak ngai caah hnulei an kir ṭhan, tiah K.S PDF nih People’s Spring ah thawng an thanh .
May 21 ah SAC ralhrang nih Kangyikone (ကန်ကြီးကုန်း) khua le Pa-du (ပဒူ) khua cu mei in an khangpiak hna caah khua chuahtak in a zaammi mipi motor lehsualnak in kum 25 nu pakhat a nunnak a liam hi a si i minung 6 nih hliamhma an tuar, tiah tualchung Media hna nih an langhter.
“May 19 lio kahdohnak ah SAC ralhrang an faak ngai caah thazaang an chap i rallam an rak sial ṭhan, SAC hriamngan kahmi nih vulei zong a tlerh dih. Nihin tiang SAC ralhrang le tualchung PDF phufonh karlak ah pehtlaiin kahdohnak a chuak” tiah min langhter a duh lomi tualchungmi pakhat nih a chim.
Thlichia Nih Kanpetlet Peng Ah Inn 195 Renglo A Rawk Pin Ah Innzuat Satil 37 An Thi; A luancia May 14 Cyclone thlichia ruangah Chin ramkulh thlanglei Kanpetlet peng chungah inn 195 renglo a rawk pin ah inn zuat satil 37 an thi i mipi 1,700 tluk harnak an tong tiah Kanpetlet peng mipi ukhruainak nih May 21 ah thanhca an chuah.
Hi thlichia ruangah inn le lo, CDF-Kanpetlet Head Quarter le sakhan dang, lam le sul a rawk mi hna cu Furpi tlak hlan ah a rawk mi le mipi hartong mi hna bawmhchanh an herh nak kong le Emergency Response Committee dirh a si nak kong zong an langh ter chih.
Kanpetlet peng ah Inn 195 a rawk mi chung ah inn 16 cu um awk tha lo in a rawk. Mah pin ah Biakinn 13, Sianginn 5, Quarters inn 16, ekinn 3 le Ti khonnak tiinn 3 zong an rawk.
Cun Inn zuat satil a si mi Sia 4, Caw 1, Na 21, Meheh 4, Vok 1 le Ar 6 an thi.
Mah pin ah cinthlaknak dumhau, tlanglo, Lam le sul a rawk mi hna zong pehzulh in cazin kan lak lio a si caah kan langhter kho rih lo. A rawkral mi le hartong mi chungkhar hna caah bawmhnak pek a duh mi hna nih Kanpetlet peng mipi ukhruainak (ကန်ပက်လက်မြို့ပြည်သူ့အုပ်ချုပ်ရေး၊ သတင်းထုတ်ပြန်ရေးအဖွဲ့) Facebook page zong ah pehtlaihnak tuah khawh kan si tiah an langhter chih. Credite;Lungmili Post|