Letkat Tlang Kahdohnak Ah SAC Ralhrang Major 1, Captain 1 Telh In 15 An Thi; PDF 2 An Nunnak Liam
=======
Karen ramkulh, Myawaddy peng um Letkat tlang ah rallam sialmi SAC ralhrang pawl cu mipi ralkap ṭangṭi phu nih an kahdoh hna caah SAC ralhrang bawi Major 1 le Captain 1 telh in 15 an thi pinah hriamthil tam ngai zong kan laak khawh chih, tiah Cobra Column nih thawng an thanh.
2023, August 15, zinglei suimilam 3:00 tluk in Myawaddy khuapi in Letkat tlang cu SAC ralhrang nih hriamngan an kah pinah cunglei kahdohnak an tuah. Cu hnu ah tanglei in rallam a rak sialmi SAC ralhrang pawl cu mipi ralkap Cobra Column le ṭangṭi phu hna nih an kahdoh hna i ralhrang bawi 2 telh in 15 an thih pinah hliam pumi 21 an si, tiah an langhter.
Kahdohnak ah SAC ralhrang nih hriamngan voi 300 leng, raltuknak vanlawng 3 in voi 3 le raltuknak Helicopter Mi-35(Attack-Helicopter) in voi 3 tiang an kahbawmh hna, tiah cathanh an chuah.
Hi kahdohnak ah SAC ralhrang hmanmi 60MM zuun 1, MA sniper zuun 1, MA4 zuun 2, MA3 zuun 3, MA2 zuun 4, MA1 zuun 1, M16 zuun 1, MA kuan bawm 53, 60MM bomb 36, RPG bomb kuan bawm 9 le hriamthil dang tam ngai hna zong kan laak khawh chih, tiah an langhter chih.
SAC ralhrang nih atu bantukin kahdohnak an tuahmi ruang ah Twor tung le biaknak lei inn hna zong an rawk pinah mipi ralkap ṭangṭi phu in minung 2 nih ram le miphun caah an nunnak an pek i minung 5 nih hliamhma an tuar, tiah Cobra Column nih cathanh an chuahmi ah an langhter chih.
Latt Khat Tlang Sakhaan Kahdohnak Ah Major 1, Captain 1 Telh In 15 An Thi, Hriam Tampi An Lak Khawh. Karen ram, Myawaddy peng, Latt Khat tlang ah Operation a tuah mi SAC ralkap pawl kahdohnak ah Major pakhat, Captain pakhat telh in 15 an thi, hriam tampi an lak khawh tiah Cobra Column nih a thanh.
August 15 zinglei 3:00am thawk in Myawaddy lei in Latt Khat tlang lei ah SAC ralkap nih hriamngan an kah lengmang i vanlei bawmhnak he a rak kai mi SAC ralkap pawl cu Cobra Column phufonh nih an kah hna i Major pakhat, Captain pakhat telh in 15 an thi, 20 an i hliam tiah theih a si. Kahdohnak chung ah SAC ralkap nih hriamngan voi 300 leng, kahdohnak Jet vanlawng in voi 3, Mi-35 Helicopter in voi 3 tiah kahdoh a bawmh hna tiah Cobra Column nih an langhter.
Kahdohnak chung in SAC ralkap pawl nih an hman mi 60MM Commando hriamngan zuun 1, MA Sniper zuun 1, M16 zuun 1, MA kuan 53, MA2 kuanbawm a pum mi 2, M16 kuanbawm 2, 5.56 kuan 5,200, 7.62 NATO kuan 2,650, MA Sniper kuanbawm 1, 60MM bom 36, RPG bom 9, RPG zen 8, 40MM bom 57, Machine Gun zuun 2 le pehtlaihnak seh 2 hna an lak khawh tiah theih a si. SAC ralkap nih hriamngan voi tamtuk an kah ruang ah Tower tung le biaknak lei inn a rawh leng ah dothlennak phu chung in minung 2 an nunnak a liam i 5 an i hliam tiah Cobra Column nih a thanh.
Kalaymyo khuapawng le Thasi khua kahdohnak ah Mipi 4,000 leng Khua Chuahtak in An Zaam Cang. Kalaymyo thlanglei, khua pawngkam le Thasi khua kahdohnak ah tualchung minung 4,000 leng an zaam cang tiah RFA nih a langhter. Tualchung mipi hna cu Kalaymyo khuachung ah a zaam mi an tam hna tiah theih a si. Thasi khua hi inn 1,000 leng in khuami 4,000 leng kai an um khua a si.
August 15 ah Thasi khua cu ralhrang kekal ralkap 200, lamsialtu ah miakpi le Mi-35 in an kah hna. Kalaymyo hrambunh miakpi battalion nih August 15 nikhat chungah hriamngan voi 31 an kah. August 16 zong ah ralhrang nih miakpi voi 10 an kah cang tiah theih a si. Thasi khua kahdohnak ah SAC hriamngan kuan chung ah Chemical Weapon (ဓာတုလက်နက်) a tel caah mipi 20 leng sii an i thlop lio hna tiah mipi ralkap sii lei riantuantu nih Khit Thit Media ah an chim.
Kahdohnak ah Mipi ralkap lei in CNDF, Kalay PDF, CDF-KKG tagrual phu hna nih August thla hramthawk in SAC ralhrang he kahdohnak a um cang. Sagaing ramṭhen chung ah inn le lo a zaamtak mi mipi 765,200 an si cang tiah United Nations Office for the Coordination of Humanitarian Affairs (UNOCHA) nih a langhter.