Naypyidaw Ah Russia Vanlawng A Rak Tlak Nak Kong!!!

Hriamthil Phurtu Russia Vanlawng Naypyidaw Vanlawng Tual Ah A Ṭum
===================
Russia in hriamthil phurtu valawng RA 78765(IL76) nih nihin March ni 19, zinglei ah Naypyidaw vanlawng tual ah thilri a ṭhumh tiah theih a si.

Russia hriamthil phurtu vanlawng cu March ni 19, zinglei ah Naypyidaw ah a phan. Cu vanlawng cu March ni 16 ah Russia ram Moscow in St Petersburg ah a kal, March ni 18 ah St Petersburg in Novosibirsk, March ni 19 ah Novosibirsk in Naypyidaw ah a phan.

Russia thilphur vanlawng RA-78765 (IL76) cu Naypyidaw in Bangladesh in Russia lei ah a kir lai tiah theih a si.
SAC ralkap nih uknak a laak 2021 thawk in Russia le SAC kar i hawikomhnak cu a hlannak in i pehtlaihnak a ṭhat chin pin ah SAC a ṭanhtu ram ngan a si caah SAC ralkap nih Russia ram cu a bochan ngaimi ram a si tiah theih a si.

Magway ramṭhen, Gangaw peng Shautpin(ရှောက်ပင်) khua le Khauthku (ခေါက်ခူ) khua kar ah rallam sial ding in a chuakmi SAC ralkap le pyusawhti phufonh hna cu bomb puahhnawh in doh an ton caah SAC ralkap 3 an thi tiah Yaw tualchung hriamtlai YPDF in Yaw Lay nih a chim.

March ni 19, zinglei suimilam 11:00AM hrawng ah Htilin in a chuakmi SAC ralkap dong ding ah rallam sial pah in aa thawhmi SAC ralkap le pyusawhti tiin minung 50 hrawng cu leilawng 4 in an chuah ah tualchung hriamtlai phu nih timhcia tein hmanhmi bomb in an puahhnawh hna caah minung 20 hrawng cu an tlu i cu chung ah 3 cu hmakhatte ah an thi colh tiah theih a si.

SAC ralkap le pyusawhti phufonh cu bomb puahhnawh in doh an ton hnu ah an i hrocer i hmaifong ngam ti loin a thimi le hliamhma tuarmi hna cu leilawng cung an khin hna hnu ah Gangaw lei ah an kir ṭhan tiah theih a si.

Sagaing ramṭhen, Depeyin nitlaklei Kuattit sang a khangtu SAC ralkap hna cu kahdoh an ton caah minung 6 hrawng an thi tiah Freedom Revolution Force (FRF) nih a thanh.

March ni 17, zanlei suimilam 6:00PM hrawng ah Depeyin nitlaklei Kuattit a phanmi SAC ralkap hna cu Freedom Revolution Force (FRF), ṭatkhuai 1, ṭatkhuai 4 nih 40mm hriamngan hmang in an kahdoh hna. Cu kahdohnak ah cun SAC ralkap 6 hrawng an thi, fak ngaiin hliamh a tongmi SAC ralkap nih zan suimilam 12:00 hrawng ah Depeyin khuachung inn 13 an khangh tiah theih a si.

Magway ramṭhen, Pakokku peng Myitchay(မြစ်ခြေ)- Kyunchaung hrambunh tualchung hriamtlai Daungyin Twe(ဒေါင်ရင်သွေး) pahkahphah chungtel 5 cu SAC ralkap nih March ni 17 ah tlaih in an thah hna tiah theih a si.

Kum 20 tluk simi Ko Makyi le Ko Yama(kum 22) cu raltuknak kong he pehtlai in thirleng he khualtlawn an i timh lampi ah SAC ralkap tlaih in an thah hna. An phone cu an laakpiak hna i bawmtu ding ah tualchung hriamtlai phu lei minung cu an auh hna, bawmh ding in a kalmi tualchung hriamtlai phu chungtel minung 3 cu SAC ralkap nih an kah hna caah an nunnak a liam ve tiah theih a si.

“An phone cu hmang in kan cycle datsi a dih caah kan put uh tiin an kan hlen, an kan auhnak hmunhma tiang kan phanh hlan lampi ah bawh in SAC ralkap nih an kan kulh i an kah hna” tiah pahkahphah lei hruaitu Ko Kyaw Kyi nih a chim.

Bawmtu ding in a kalmi pahkahphah hruaitu telh in ralkap 7 nih meithal 2 lawng an i put, SAC ralkap minung thazaang 50 leng nih kulh in an kah hna caah minung 3 an nunnak a liam tiah theih a si. Tualchung hriamtlai Daungyin Twe phu chungtel 5 cu SAC ralkap kut in an nunnak a liam pin ah, luatnak a hmutu pahkahphah hruaitu telh in chungtel 4 zong nih kuan hliamhma an tuar tiah theih a si.

Magway ramṭhen, Gangaw peng Semintaw khua kahdohnak ah SAC ralkap 4 an thi, Gangaw pengkomh battalion 17 in ṭatkhuaihmu Kyaw Min Lwin a nunnak a liam tiah Yaw Revolution Army-Htilin in Takhin Zaw nih a chim.

March ni 18, ah Htilin peng Semintaw khua ah zanriakmi SAC ralkap hna cu Gangaw lei an kal ah tualchung hriamtlai phu hna he kaphnih kar kahdohnak a chuak. SAC ralkap nih hriamngan an hman caah tualchung hriamtlai phu lei ṭatkhuaihmu Kyaw Min Lwin telh in minung 3 nih hliamhma an tuar, hliamhma tuarmi hna chung in ṭatkhuaihmu Kyaw Min Lwin cu a minung a vennak hna ah a nunnak a liam tiah theih a si.

SAC ralkap hna cu Gangaw pengkomh battalion 15, battalion 16, battalion 17(YRA-Htilin) nih an kahdoh hna. Tualchung hriamtlai phu lei ṭatkhuaihmu Kyaw Min Lwin a nunnak a liam pin ah AK meithal pakhat kan sung.

Federal Democracy kan ngah khawhnak ding ah SAC ralkap a doh i ram le miphun caah a nunnak a petu ṭatkhuaihmu Kyaw Min Lwin cu Gangaw pengkomh battalion 15,16,17 ( YDF- Htilin) nih sian lo buin upatnak sang bik kan pek tiah Yaw Revolution Army-Htilin nih a thanh. Crd-The Chin Post