Nawl Ngeih Hi A Nuam Bak Rua

Nawl Ngeih Hi A Nuam Bak Rua
********************
MAH nih “aanaa” a tin hi a mawh lo kan ti khawh ve men ko lai dah. Zeicatiah, nawl ngeih hi a rak i nuam bak ko rua. Khrihfa upa si lo sual hmanh ah a zaw ding kan tam ngai tawn va sikaw, ram pakhat i nawl ngeitu bik si le President cung hmanh i nawl a ngeitu si cu a nuamh laining hi bia in chim awk hmanh a ṭha rua lai lo.

MAH khi kum 50 kuakam minung hrawng siseh law ‘’aanaa’’ a ting lai ka zum bak lo. Zeicatiah, kum 2008 phunghram ning bantuk in nawl a ngeitu bik cu a mah a si ko. President U Win Myint cungah a um ko. ASSK cung zongah a um ko. Kum 2008 phunghram cung zongah a um fawn ko. A mah nih siseh a timi paoh a si dih ko lai. Si hlah seh a timi paoh a si fawn lai lo a si ko. A va nuamh laining mu! A nupi si le a fale si hrimhrim a nuam tuk lai.

Laimi nih ‘’vanchiat lakah vanṭhat’’timi bia kan ngei. MAH caah cun ‘’vanṭhat lakah vanchiat’’ kan ti maw a hauh lai zeidik. Vanṭhat lakah vanchiat tiah, a ra laimi July thla ah kum 65 a tling ding a si ngelcel rua. Kum 65 in cun pensen(pension)laak lo awk a ṭha ti fawn rua lo. Laimi nih ‘’vanchiat aa(ai)phua’’ timi kan ngei rih. Vanchiatnak kan ton tikah a dang vanchiatnak aa chap chih tinak khi a si ko. MAH a van a chiat hnuah vanchiatnak aa phua rua. I phua len rih dawh a si ko.

Cucu, kum 2020 thimnak ah USDP party ek ceh in an sunghmi kha a si. USDP nih a tawk fangin tei ve hna sehlaw, 25% ralkap he zeimawzat cu a saduhthah a tling men ko hnga. Vice President tal a chuak hnga i a va ning deuh tuk hnga. Atu cu USDP nih an deuh cikcek. A chun mang vialte khuasik mangah aa chuah dih ai. Khi tluk i nawl a ngei vemi kanmah te pawl pensen(pension)laak in laak ve ko ding cu a mawh bak ve lo khi a si ko rua. Nawl a ngei bakmi hna nih an nawl ngeihnak a dongh lai ahcun a dikmi le a hmaanmi thil tuah hi a har bak ko rua.

A ngaingai tiahcun, MAH nih “aanaa” a tin hi zei ruang hmanh ah a si lo. A mah pumpak pakhat nawl ngeih duhnak ruang bakah a si ko. Zeiti awk ṭha, minung a simi paoh nih kan tuhmi kan zun cio te ko lai caah a tuhmi a zun ve a hau ko lai. Credit: Perhkalh Thawng