Natchaung Khua Ah Inn (30) Tluk Ralhrang Ralkap Nih Mei An Khangh!

Natchaung Khua Ah Inn (30) Tluk Ralhrang Ralkap Nih Mei An Khangh!
========
March 14 thawkin SAC ralhrang ralkap (300) hrawng cu motor (14) bakin Kalay Technology Sianghleirun in Natmyaung, Natchaung leikap ah an kal hna i, zanlei sml 4:00 hrawngah Siitha le Natmyaung khua karlak ah PDF Kalay nih timhcia tein vawlei tangah an chiahmi bomb umnak zawnah an phan caah bomb cu a tomtom in an puak i, SAC ralhrang ralkap a thimi le hliammi an tam kho.

SAC ralhrang ralkap rual cu March 15 zinglei caan ah Siitha khua in Natmyaung khua leikap ah pehzulh in an kal than caah PDF Kalay nih timhcia tein vawlei tangah an chiahmi bomb umnak hmunah an luh than caah bomb cu a tomtom in an puah than caah a thimi le hliammi an tam than kho tiah theih a si.

Zanlei sml 1:00 ahcun SAC ralhrang ralkap hna nih Natmyaung khua chungah sakhan an tuah hnuin Siitha khua leikap in an hawile dang cu motor in an rat caah PDF Kalay nih a vawithumnak bomb an puah hnawh hna i, motor pakhat cu a kal kho ti lo i, cu motor cu PDF Kalay nih minutes (5) cu cawl loin meithal in an kah. SAC ralhrang ralkap a thimi le hliammi an um kho nain fiang tein theih a si lo. Cucaah SAC ralhrang ralkap nih Natchaung le Natmyaung khua chungah lut hratin inn (30) tluk mei an khangh.

Tuzing leiah khan SAC ralhrang ralkap hna cu Natmyaung in Natchaung, Chaung Khuah, Hakhalay leikap ah kahdohnak an tuah than caah lampi ah PDF Kalay, CNDF,ပကဖ fonhmi phu nih vawi tam nawn an kahdoh hna i, zinglei sml 9:00-12:00 tiang kahdohnak a fak. Cuticun SAC ralhrang ralkap cu Natchaung le Natmyaung leiah an kir than.

Cu kahdohnak ah SAC ralhrang (7) an thi i, CNDF ralkap (1) nih a zual lomi hliam a tuar. SAC ralhrang ralkap i umnak sakhan pakhat simi Kalay Technology Sianghleirun cu Kalay PDF nih zanlei sml 1:00 hrawngah hriamngan in vawi (3) an kah.

SAC ralhrang ralkap nih Natchaung, Natmyaung le Hakhalay leikap ah chunnitlak bak hriamngan in an kah. SAC ralhrang ralkap rual i kalnak Natchuang, Natmyaung, Hakhalay khuami mipi hna cu himnak hmunah an zaam.

Kuanfang I Zat Lo Ruangah Siseh, Hriamnam I Tluk Lo Ruangah Siseh CDF-Kanpalet Brigate Sakhan Cu An Chuahtak!
Chin ramkulh Kanpalet peng chung hrambunh CDF-Kanpalet le SAC ralhrang ralkap karlak ah kum 2022 Febuary 7 in March 16 tiang kahdohnak a fak ngaingai i, kuanfang i zat lo ruangah Brigate sakhan cu kan chuahtak ruangmang cang tiah nihin ah cathanh an chuah.

CDF Kanpalet nih cathanh an chuahmi ahcun kum 2022 March 11 ah Kanpalet khuapi in ralhrang ralkap thazaang 200 in CDF Kanpalet sakhan umnak leiah kahdohnak an tuah caah CDF Kanpalet he Ye Laung Pan khua cunglei Pan Taung Kyaw ah an i kap i, SAC ralhrang ralkap (3) an thi i, CDF Kanpalet leikap ah hliam tuartu an um lo.

Cuhnuah ni 13 ah khan Ngung Laung khua chaklei Am Pung khua cunglei ah a ummi SAC ralhrang ralkap cu CDF Kanpalet, CDF Mindat, The Youth Force le Saw PDF hna nih ramtang ah luhhnawh in an kawl hna tikah kaphnih kahdohnak a chuak than i, ralhrang ralkap (2) an thih i, CDF Kanpalet (2) hliam an tuar. March 14 zongah khan fak taktakin kahdohnak a chuak nain ralhrang ralkap leikap ah a thimi le hliammi an um le um lo theih an si lo.

March 15 ah CDF Mindat, CDF Kanpalet, The Youth Force le Saw PDF fonhmi phu le SAC ralhrang ralkap karlak ah zinglei sml 8:00-zanlei sml 3:00 tiang kaphnih kahdohnak a fak ngaingai i, CDF Kanpalet (1) nunnak a liam i, a dang (2) nih hliam an tuar. SAC ralhrang ralkap leikap ah a thimi le hliammi zat theih a si lo. Cu kahdohnak ah Mindat hrambunh ခလရ ၂၇၄ Battalion le Kyaukhtu lamhlat kahnak sakhan in hriamngan in an kah ruangah Damahtha Khua Hlun inn (9) cu hriamngan kahmi nih a khenh caah mei nih an kaang.

CDF Kanpalet leikap ah kuanfang i zat lo ruangah siseh hriamnam i zat lo ruangah siseh khuami nih an ton dingmi harsatnak tibantuk hna ruahpiak in siseh ralhrang ralkap nih a hleihluat tukin an kan kah ruangah siseh CDF Kanpalet Brigate sakhan cu caan karlak chuahtak a si. Cucaah ramchung ramleng nulepa hna le bawmhnak petu hna nih hriamnam thazaang, kuanfang thazaang tam deuh in nan kan bawmh/tuaktan piak nakhnga zaangfah kan in nawl hna nak cathanh kan chuah.

SAC ralkap le CDF-Kanpetlet Kahdohnak Kong Ah CDF-Kanpetlet Nih Cathanh An Chuah. Chin ramkulh, Kanpetlet peng ah CDF-Kanpetlet le SAC ralkap cu February 7, 2022 in nihin March 16, 2022 tiang an i kap. March 11, 2022, Kanpetlet ah ralkap thazaang 200 hrawng he CDF-Kanpetlet Headquarters lei ah rallam sial in a kal mi SAC ralkap hna le CDF-Kanpetlet kahdohnak a chuak i, cu kahdohnak ah cun SAC ralkap in minung 3 an thi, CDF-Kanpetlet lei hliam tuar mi an um lo.

Cun, March 13, 2022 ah Ngunglawng (ငုံလောင်း) khua thlanglei, Armpung(အမ်ပုံ) khua chaklei ah SAC ralkap hna le CDF-Kanpetlet, CDF-Mindat, Yaw mizapi vengtu ralkap The Youth Force, Saw-PDF ṭangrual hna cu an i kap. Cu kahdohnak ahc un SAC ralkap lei in minung 2 an thi, CDF-Kanpetlet lei minung 2 nih hliam an tuar. Cun, March 14 ah kaphnih kahdohnak a chuak ṭhan i, cu kahdohnak ah SAC ralkap lei an thi mi le hliamtuar kong fiang tein theih a si lo.

March 15, 2022 ah CDF-Kanpetlet, CDF-Mindat, Yaw mizapi vengtu ralkap The Youth Force, Saw-PDF phufonh le SAC ralkap hna cu zinglei suimilam 8 in zaanlei suimilam 3 ting Damahta(စမ္မသား) khuahlun ah an i kap i, cu kahdohnak ah cun CDF-Kanpetlet in minung pakhat a nunnak a liam i, minung 2 nih hliam an tuar. SAC ralkap lei hliamtuar le a thi mi kong theih a si rih lo. Cu kahdohnak ah cun Mindat um mi SAC ralkap khah-lah-yiah 274 nih hriamngan in an kahbawmh hna caah Damahta (စမ္မသား) khuahlun inn 9 cu hriamngan tlaknak in an kaang.

CDF-Kanpetlet lei kuanfang an chambau ruangah le hriamnam thazaang an i thlau tuk pinah khuachung mizapi hliamtuar lai sian lo ruangah CDF-Kanpetlet Brigade Headquarters cu caan karlak chung kaltak rih a si. Cucaah ramchung, ramleng um mizapi hna nih dohthlennak ding cawlcanghnak ah kuanfang le hriamthil thazaang an tlamtlin deuh khawh nakhnga CDF-Kanpetlet nih bawmhhalnak cathanh an chuah.