Nai thla hnihthum chung Norway cu zawtnak ai chonh thar a tam ngai ve

Norway cu “everyone must contribute” ti bak cu si le coronavirus a karh lo nak hnga cozah nih zulhding an thanh mi a zul lo poah cu dantat thluahmah asi ko. An dandat ning zong hi a din te loh, kr 20000 thluahmah cawi ter asi ko. Nizan ah Norway chaklei khua pakhat a um mi pa cu hawileng minung 5 cung ngeih lo ding ti mi kha ngai lo in minung 13 he a inn ah tonnak an tuah caah police nih an luh hnawh hna i inn ngeitu pa kha kr 20000 an liam ter, a hawi leng kha pakhat kr 10000 cio an liam ter hna. Nai te ah East Europe lei in rianttuan ah a ra mi pa cu Norway a phanh bak in virus positive asi caah quarantine ah an chiah. Quarantine an chiah chung mizei hmanh he iton lo ding ti mi cu hawi ai len ter hna caah kr 20000 dan an tat pin ah Norway in an ram ah an kuat colh. Smittevernregler (infection control rules) zong hi an rengh deuh chel, an dorh deuh chel tiin a um peng caah i mih sual a fawi te. I mih ahcun luat a um bak loh.

Nai thla hnihthum chung Norway cu zawtnak ai chonh thar a tam ngai ve. A ram milu rup in a karh ngai caah an lau i biatak tein an van rengh. Kan hnung zarh kha cases thar hmuh mi zawr lei a panh an ti i cozah an inuam ngai. Zeimawzet kan van dorh lai an ti vial ah England i an hmuh mi mutation in covid-19 phundang a chuak mi pin ah South Africa i an hmuh thar mi covid-19 phundang zong Norway ah an van hmuh ve tik ah an lau tthan. Tu ni in Oslo area hna cu fak piin an rengh chap hoi (sector an khar chap mi a um len). South Africa i an hmuh mi virus hi orginal covid-19 nak in 50% in a karh a rang deuh ti asi le ram 20 ah a karh cang ti asi. Brazil ah mutation in ai sem thar mi covid-19 phundang zong a um hoi rih. Hi tu hi cu Norway ahcun an hmu rih loh.

Vaccine an chuah mi hi England ah an hmuh thar mi virus cung ah effective asi ve ko tiah an test hnu ah an rak thanh i hnangam deuh in um cio asi. Nain South Africa le USA ah study an tuah thar mi nih a langh ter mi cu coronavirus in a zaw bal cang mi kha South Africa le Brazil ah phundang ai sem mi virus hin an zaw kho tthan ti asi. Cucaah National Institue of Public Health an lungre theih mi cu vaccine hi mah hi mutation phun 2 ahhin effective a si lo sual hnga maw ti asi tiah an ttial.

P.S: Zaan ih lai le zing thawhka breakfast ei pah hrawng i news rel hi ka tuah kel ka zia ah ai cang rawh. Tuah lo in ka um khawh ti lo mi asi. Thanwgpang theihtlei deuh ka van rel ah facebook hawi le siaherh ah ka van thai lengmang tawn i cheukhat caah mi a simh pah kho men i a rel huam lo nih cun hei skip lengmang te ko uh. Credit: Sangukceu Zinhlawng