Myanmar Ralkap nih Rammi cung ah an Tuahmi Sualnak Tehte 180,000 CRPH ah a Phan tiah Dr. Sasa nih Langhter

Myanmar Ralkap nih Rammi cung ah an Tuahmi Sualnak Tehte 180,000 CRPH ah a Phan tiah Dr. Sasa nih Langhter
————
February 1, 2021 thawk in Myanmar ralkap nih rammi hna cung ah an tuahmi sualnak tehte 180,000 cu CRPH sin ah a phan cang, tiah Dr. Sasa nih nihin ah a chuahmi thawngthanhnak ca ah a langhter. Tehte 180,000 a um pin ah upadi he aa kalh in Myanmar ralkap nih mi an thahmi 540 an si i, tlaih an ton hnu ah a nunnak a liammi minung 10 an si, tiah a langhter chap.

CRPH nih a sermi upadi thiamsang bu le atulio Myanmar kong hlathlaitu Independent Investigative Mechanism for Myanmar (IIMM) timi bu cu nihin April 7 ah tonnak an ngei lai i hmailei rianttuan tti ning pawl an ceihmai lai, tiah Dr. Sasa nih thawngthanhnak ah a langhter.

Relchap, Tahan ah Fa 2 Ngei Laipa Pu Van Tha Thang Zong a Nunnak a Liam. Nihin zinglei ah Myanmar ralkap nih Kalay Civil Army an rak doh hna i a nunnak a liammi hna lak ah fa 2 ngei Pu Van Tha Thang zong aa tel ve, tiah kan theih.
Pu Van Tha Thang hi Sanmyo, Salem Baptist Church (SBC) pawng ah a ummi an si i, nihin zinglei ralkap nih an rak doh hna lio ah meithal kuan nih a lu ah a khen i a nunnak a liam.

Pu Van Tha Thang hi Thantlang peng Dawn khuami a si, tiah an Khrihfabu (SBC) chungtel pakhat nih a chim. Nihin zinglei sml. 5:00 hrawng in aa thawkmi Kalaymyo, Tahan i mipi le ralkap kahdohnak ah mipi lei in minung 8 an nunnak a liam i, minung 10 hrawng tlaih an tong. Hliam a pumi lak ah a nunnak a liammi zong an i chap kho, tiah a hmun ah a ummi hna nih n chim.

Nihin zinglei kahdohnak ah ralkap nih khuachung motor lampi in le inn kalrak lam tibantuk tiang in ruahlo piin an rak nam hna caah mipi lei in i khamnak caan an ngei manh lo. Cu lawng si loin ralram taktak ah hmanmi Machine Gun, RPG, Kutcheh Bomb le Grenade Launcher tibantuk ralhraim ngan pawl ralkap nih an hman hna, tiah Tahan khuasa Laimi pawl nih an chim. Credit: The Chin Journal