Muidawh Mya Thet Mon Caah Chungkhar Lungretheih In An Um, A Nunnak A Him Lai Lo An Phang Tuk

Mya Thet Mon cu an tlaih thawk in a umnak an theih kho lo caah a chungkhar cingla le hawikom pawl lungretheih ngaiin an um hna tiah theih a si. Nay Pyi Taw khuapi um ralkap Tahyin 20, thonginn chung zongah an kawl len ko nain a um lo tiah an chim. Mya Thet Mon hnuzulhtu nu pakhat nih a chimning ahcun Nay Pyi Taw thonginn chiah chungnak zongah a um lo. Kawl ralkap le Palik nih an tlaihnak peng chung le palik sakhan zongah an chiah fawn lo a chim.

Mya Thet Mon an chiahnak ding hmunhma vialte cu an kawl dih cang ti awk a si. Sandahpiahtu pawl an tlaihmi hna le an chiahnak hna thonginn chiah chung nak zongah an hmuh lo tikah chungkhar lungretheih ngaiin an um khun nak hi a si. Mah an tlaih hna lio ah hin aho midang an um lo, amah Mya Thet Mon a hawipa pakhat lawng a si caah minung 2 lawng an si tiah thawng theih a si.

Mya Thet Mon le a hawipa an tlaihnak hna hmunhma cu Nay Pyi Taw Junction pawng ah a si. Mya Thet Mon te motor in an phortnak hna hi Palik motor le Ralkap motor zong a si lo. An tlaika lio hna ahcun Zamutiri pengkulh palik sakhan ah an chiah hna i, zanlei ah an thial than hna tiah an chim. Cucaah, khoika thonginn le palik sakhan an chiah lai timi hi lungretheih in an umnak a si. Nungak muidawh pakhat a si ve tikah le a umnak an theih lo tikah Mya Thet Mon caah a him lo taktak khi a si cang.

Relchap, UN Sectretary general, António Guterres cabuai cung ah cakuat pahnih a phan. Pakhat cu Ambassador Kyaw Moe Tun sin in a si. Kyaw Moe Tun cu President Win Myint le Foreign Minister Aung San Suu Kyi nih Sept. 4, 2020 ah UN ambassador caah an rak thimmi, a si bantuk in, keimah hi Kawlram ambassador ka si peng rih ko i, ka peh rih ko lai tiah ca a kuat.

A pahnihnak cu Min Aung Hlaing aiawh, State Administration Council in a si i, Kawlram ambassador Khyaw Moe Tun cu a rian in dinter a si cang caah, Kawlram Cozah a aiawh kho ti lo. Cucaah, amah dirhmun ah Myanmar’s deputy U.N. ambassador, Tin Maung Naing kha, Ambassador ah kan kaiter tiah ca an kuat ve. Asinain Tin Maung Naing nih ka cohlang hna lo tiah a facebook ah a taar colh.

Tulio hi Kawlram ah Cozah pahnih an um lio a si i, UN ah kawlram tthutnak cu ralkap maw an pek hna lai? CRPH dah timi a fiang rih lo. Secretary General cabuai ahcun cakuat pahnih cu an um ko rih. UN members vialte meeting tuah in biakhiah a hau men lai tiah biavaivuan a chuak pah. Mipi cungah ral a thomi, ralhrang Min Aung hliang/ralkap nih mipi cu an kah hna i, minung 38 an thi cang. Cucaah, UN Security Council ah innkhar ikharkhumh in meeting an tthu tthan colh lai. Zeibantuk biachahnak dah an tuah khawh te hnga? Credit: Zasang Cinzah