Mizoram Champhai Ah Mah Te In Meithal Kahsualnak A Chuak, India Ram Um Myanmar Mi Hna Cu India Ram Ukhruainak Kong Ah I Thlak Lo Dingin NUG Nih A Cah Hna
================
2023, June 21, zanlei suimilam 12:21 tluk ah Mizoram Champhai Vengthlang i venhimnak (Securituy) rian a ṭuan mi Lalrimawma (kum 30) tluk cu meithal in aa kap sual, ti ah kan theih. “Lalrinawma cu a khabe ah a mah te in aa kap sual caah pawgkam um baan (Bank) rianṭuan mi le hmutu cheukhat hna nih bawmchan in si-inn pi ah an tlik pi colh a tu tiang in chonhbiak zong a thei rih lo” tiah Champhai khuami mit hmutu nih a chim.
SAC nih nawlngeihnak an laak hnu in Chin ramkulh le Sagaing ramṭhen in minung 50,000 tluk cu India ram ah an zaam i Ralzam hna chung in Mizoram ramkulh ah minung 40,000 hrawng an zaam i, Manipur ramkulh ah 8,000 leng an um ve, tiah UN nih an langhter.
India ram chung ah caankarlak chung aa dormi Myanmar mi hna le India ram um Myanmar zatlang bu hna cu India ram ukhruainak kong ah i thlak lo ding in NUG, Ministry of Foriegn Affairs nih an thanh. “Ralzam hna cu an umnak ramkulh chung ah thimnak kong he pehtlai in i thlak lo ding in le miphun karlak rem lonak chuahter lo dingin India ram um Myanmar mi hna cu NUG nih ralrin a pek hna.
Cu pinah ramsa le rithaisii phungning loin cawk zuarnak nan tuah lai lo. Nan umnak ramkulh nih an tuahmi upadi ṭha teiin nan zulh lai, tiah NUG nih cun forhfialnak a tuah hna. Manipur ramkulh khuapi Imphal le a pawngkam ah a ummi Meitei miphun hna nih India cozah sinah Scheduled tribe sinak an hal caah Kuki miphun hna nih duhlonak langhter in miphun pahnih karlak ah faak piin buainak a chuak.
Manipur ramkulh ah lainawnnak a chuah hnu in India cozah in a ralkap a thong leng cu Manipur ah a thlah hna i atu tiang internet line zong an phih, tiah theih a si. Mizoram zong ah State Legislative Assembly thimnak a um zau lai i, cu thimnak ah cun ralzaam hna i thlak ve lo a biapi. NUG cozah chimphuannak nawlngeitu Kyaw Zaw nih cun, NUG kuttang PDF hna cu kan innpa a simi ram hna cung ah i thlaknak le teltumnak an ngei lo, tiah a chim.