Mizoram, Aizawl khuapi pawng Ah Petrol Phortu Motor A Let!!

Mizoram, Aizawl khuapi pawng Ah Petrol Phortu Motor A Let!!
==================
Mizoram, Aizawl khuapi pawng Turial Airfield lampi ah Petrol phortu motor cu aa let i, petrol a tle mi cu tuzanlei muihlan hrawng ah khan minung zeimawzat nih an donh.

Tlawmpal ah cuka hmun ah cun mei a chuah caah Petrol phortu motor lengah Scooty pakhat le Taxi pathum hna cu an kaang! Meikaang ruang ahhin minung 5 an thi i, an ruak in ahote an si hngalh khawh an si rih lo. Forensic lei in ṭuanvo ngeitu nih cun pakhat ruak cu hngalh khawh a si men lai nain midang 4 cu hngalh khawh an si lai lo, tiah an chim. Midang 5 zong hliam faak ngai an pu i sii-inn lei panhpi an si.

Mei a chuahnak a ruang hi fiang tein hngalh khawh a si lo nain petrol tle-bua mi a dawntu hna lak ah meiṭek a alhtertu an um ruangah a si lai, tiah ruahdamh a si. Mei hi sau nawn phalh a si hnu ah an hmih khawh cang, tiah theih a si. Crd-The Chin Post

Yetarshi Peng Ah Sianglairun Sianginn Pakhat Min Hngalh Lomi Phu Nih An Khangh, Pago ramṭhen, Yetarshi peng Takhuaigye(တခွဲကျဲ) khua sianglairun sianginn pakhat a kaang, tiah theih a si.

Nizan October 28 zan sml 7:00 hrawngah sianglairun sianginn pakhat cu min hngalh lomi phu khat nih mei in an rak khangh, tiah tualchung mi hna nih an chim. “October 28 zan ah sianginn cu mei in an khangh. Mizei phu nih dah an khangh ti cu kan hngal kho rih lo.

Sianginn hmai ah khuami inn a um ko nain an kaang hraw lo, siangin lawng a kaang,” tiah tualchung mi pakhat nih a chim. Mei kangh ruangah E muisam in sakmi a sau pe 70 le a kauh pe 24 tlakrawh sianginn cu a ciam dih ko, tiah theih a si.

Kwelonetaing(ကွီလုံတိုင်) Sakhan Laak Kahdohnak Ah SAC Ralkap Le BGF 8 An Thi, Meithal Zun 43 Kan Lak Tiah Red Dragon Column Nih An Thanh, KNU Brigade 6 hmunran um Gyia Ing Seihgyi(အင်းဆိပ်ကြီး) peng Kwelonetaing sakhan laak kahdohnak ah SAC ralkap 15 le BGF 17 an dihlak 32 cu a sung an pek(surrender) caah meithal zun 43 kan lak, tiah Red Gragon Column nih cathanh an chuah.

KNLA Battalion 17 le 27, Federal Win, SOF le PDF ṭangṭi phu hna nih a luancia October 22 ah khan Kwelonetaing sakhan cu an rak kah i October 26 ah tlamtling tein an lak khawh. Cu kahdohnak ah SAC ralkap 4 le BGF 4 an thi, tiah theih a si.

Cu kahdohnak a daih in SAC ralkap vanlawng nih sakhan pawngkam um khuate ah hriamnan in a kah ko nain khuami a thimi le aa hliammi an um lo. Kanmah lei zong in a thimi le aa hliammi kan um lo, tiah an langhter.

Tamu Khua Ah Transportation and Communication Zung Cu Hriamtlai Phu Khat Nih An Khangh, Sagaing ramṭhen, Tamu khua Sawbua No.5 sang ummi Transportation and Communication(TC) zung cu, nizan October 28 zanlei ah min hngalh lomi hriamtlai phu khat nih an khangh, tiah tualchung mi nih an chim. TC zung a kangh hnu in kaphnih kar kahdohnak a chuak i, TC zung kam ah a ummi Tanyawsin(သံယောဇဉ်) dawr zong a kaang, tiah tualchung mi nih cun an chim.

“Zanlei sml 4:00 hrawng ah hriamtlai phu khat nih TC zung cu an khangh. Cu hnu caan tlawmpal ah SAC ralkap an ra i kahdohnak a chuak. TC zung kam ummi dawr pakhat zong a kaang,” tiah tualchung mi pakhat nih a chim. Min hngalh lomi hriamtlai phu khat nih TC zung an khangh lioah zung rianṭuantu aho hmanh an kai lo lio a si caah a thimi le aa hliammi an um lo, tiah theih a si.

Aizawl Khua Pawng Um Ralzam Mi cu MRRC -Mizoram Nih Eidin Cheukhat An Bawmh Hna, Myanmar ram in Mizoram ah ralzam in aa dormi Aizawl khua pawng Tuirial ralzam camp ah a ummi hna sinah MRRC -Mizoram phu nih, nizan October 28 ah eidin cheukhat an va pek chanh hna, tiah theih a si. MRRC -Mizoram nih ralzam mi an bawmhchanhmi thil hna cu Facang tun 20, a Taṭuh tun 3, chiti pung 5, alu tun 3, kalape tun 3 le piat tun 2 hna an si, tiah theih a si.

Passport Tuah Ding Ralhrang Nih An Rengh Caah Passport Ngahnak Ding Ah Sing 4 In Sing 6 Tiang SAC Ralhrang Kut-tang Rianṭuan Nih Ziknawh An Laak Hna!, Hramhram uknak latu ralhrang Min Aung Hlaing nih ramleng chuah a kham ruang ah Passport tuahnak zung nih passport chuahpiak ding an rengh tiah theih a si.

Nifatin Yangon passport zung hmai ah zing sml 6:00 in cun mipi an i tlang (တန်းစီ) dih cang hna. Uknak chuh hlan ah cun fawizaang tein kyats 30,000 in passport i ser khawh a si nain atu ah cun Kyats sing 4 in sing 6 tiang pek lawng ah passport ngah khawh a si cang tiah Khit Thit Media nih a langh ter. Passport tuah khawhnak ding ah har chin lengmang ding in a dotdot in an tuah.

Mipi i but lo ding in tiah online in booking tuah ter cia a si. Ralhrang nih tuahmi website, passport.gov.mm ah nifatin zung on caan zing sml 9:00 in QR Code laak a si. Website in zeitluk fel le ṭha in QR Code laak ko zong ah zung chung i palik le lahwahkah zung rianṭuantu hna ziknawh pek lo ah cun ngah khawh a si lo. QR Code laak har ding in an tuah, cun minutes 15 lawng hna an on tiah theih a si.

QR Code ngahnak ding ca ah a tlawm bik Kyats thong 50 in sing khat le cheu tiang pek an hau. A rang deuh duhmi nih tam deuh pek an hau tiah theih a si. A leeng puaisa sin in QR Code a la tu hna cheu khat cu a deu (အတု) a si tiah palik le zung rianṭuan hna nih ṭhawlmi zong an um tiah theih a si. QR Code ngah khawh hnu zong ah hmatpungṭin le takawngsazin an check hawi.

Hmatpungṭin le takawngsazin a chia tuk, ca a fiang ti lo tibantuk a phunphun in an kherh hawi hna, asinain tangka pek ah cun fawizaang tein an tuah piak hna. Passport tuah tik ah CDMer pawl tel lo ding, zung rianṭuan pawl tel lo ding, warrant chuahmi pawl tel lo ding le ramkhel he aa pehtlaimi pawl tel lo ding ti bantuk khamnak ruang ah Lahwahkah zungrianṭuan le palik hna caah caan ṭha tuk ah a cang.

Passport zung kutka cawng palik hmanh nih ting 300 leeng man motor hna an i ciit khawh ti a si. Zungrianṭuan pawl umnak inn chia tete ah an um nain sui le tangka ah an rum tiah KTM nih a langh ter. Cubantuk ṭhiamṭhiam in passport zung rianṭuantu hna zong an si ve. Chuncaw hmanh inn in i ken ti lo in rawl-dawr sangsang hna ah an i cah tiah theih a si. Ram leeng chuahding in mipi hna nih passport an i tuah i zungrianṭuan le palik hna nih an i rumnak!

Video zohnak-