Mizoram Ah Myanmar Ralzaam 32,000 Leng An Um. India, Mizoram ah ralzaam in aa dor mi Myanmar ralzaam 32,000 leng an um tiah Mizoram ramchung lei Minister nih a chim.Mizoram ah an tuah mi a voi 6 nak Hluttaw meeting ah ralzaam kong he pehtlai in biahalnak kha Mizoram ramchung lei Minister Pu K. Sapdanga nih ca in a leh hna i Mizoram ah ralzaam 42,572 a um mi chung ah Myanmar ralzaam 32,161 an um tiah a ṭial.
Myanmar ram ah hramhram in uknak lak a si hnu 2021 February 1 thawk in 2024 February 3 tiang cazin ning ah Myanmar ralzaam 32,121 an um.Manipur ah a cang mi miphun khat le khat karlak buainak ruang ah Kuki miphun pawl Mizoram chung ah aa dor mi hi 9,249 an um i Bangladesh ramchung buainak ruang ah Sitakawng tlang in a rak zaam mi Zo (Chin) miphun 1,167 an um tiah theih a si.
Myanmar le Manipur ram in a rak zaam mi ralzaam pawl hi Mizoram pengkomh chung tampi ah an um hna i Sitakawng tlang in a zaam mi hna hi Lawngtlai pengkomh chung ah an um hna tiah theih a si.Mizoram cozah nih ralzaam pawl kha Biological Information kan la hna lo nain pengkomh kip ah a um mi cozah rian ngeitu hna nih an hmunhma chung a rak phan mi ralzaam pawl cazin an lak i ramchung Minister sin ah an kuat lengmang tiah Pu Sapdanga nih a chim.
Myanmar ralzaam hna caah India cozah nih Rupees sing 300 bawmhnak a pek nain Manipur ram ralzaam hna caah nihin tiang cozah bawmhnak kan hmu rih lo tiah Mizoram ramchung lei Minister nih a chim.
Thawngpang Dang Rak Relchih : A Poi TakTak ! Minbya Ah Ngaknu Pakhat Kan Tlaihhrem Hnu Ah A Nu He Kan Thah Hna Tiah SAC Ralkap Pakhat Nih A Phuan.Rakhine ram, Minbya peng, Ngatanpin khua in nufa hna chung ah a fanu cu a phu in an tlaihhrem hnu ah an pahnih in an thah hna tiah sualnak a buar ve mi chungtel ralkap pakhat Ko Ko Aung nih a phuan tiah AA nih muicawl he thawng an thanh.
SAC ralkap pawl cu Ngaṭanpin khua an luh lio ah kum 50 nu le a fanu pakhat an hmuh hna i Captain Nay Lin Kyaw nih a kalpi hna hnu ah a fanu te nih ṭah bu in a nawl ko hna nain puan in a mit an huh in inn tang ah an kalpi hnu ah an tlaihhrem tiah sual a buar ve mi ralkap Ko Ko Aung nih a phuan.
“Kan pu Kyaw Myo Oo nih a tlaihhrem hmasa. A hnu ah Sergeant Thura Naing, Chit Lwin, Myo Aung nih an tlaihhrem ve. A hnu bik ah keimah Ko Ko Aung nih ka tlaihhrem ve. Cun ngaknu te cu a kam lei ah kan umter lio ah kan pu Kyaw Myo Oo nih a nu cu a lu ah meithal in voi 2 a kah. Nungak nute zong a ṭang ah a kah. Ngaknu cu a thih rih lo caah Thura Naing nih zung 6 a sau mi namte in a hnawng a ah” tiah a phuan.
Cubantuk in an tlaihhrem i an thah hnu ah an kaltak hna. Tlaihhremnak ah aa tel mi Sergeant Kyaw Myo Oo cu Sniper in a cal ah an khen i a thi, Thura Naing zong kuan nih a khen ve i a thi, adang ralkap 2 zong an lu le an hnawng ah kuan nih a khen hna i an thih bantuk in an hruaitu Captain zong a pum ning in ,a kang i a thi tiah a chim.Credit : The Chinland Post