Mizapi nih zulh ding zulhphung hna cu Mizapi nih

Karen National Union Nih Zulhphung Thar An Sermi Cu Ralhrang Caah Zanmang Chia Taktak A Si Ko Lai!
=======
Kayin ramkulh, Kawkayet in Myawaddi Asia Lamcung ah Ralhrang Council nih civil mi motor hmang in Ralkap pawl le an thilri an phorh i an um kal kong Karen National Union nih an theih caah hi lam cung hi zohfehnak ngeih ding in Karen National Liberation Army ralkap sin ah tuanvo apek hna cun Mizapi nih zulh ding zulhphung 4 cu December 27, 2021 ni ah an chuah.

Mizapi nih zulh ding zulhphung hna cu Mizapi nih private motor in Khualtlawn ah cun kutka thlalang thlak ding, Karen National Liberation Army nawlngeitu hna nih an khamh mi rit khawh mi sii check nak tuah mi zulh ding, motor cu a cung khuhnak pakhat khat in khuh lo ding le Ralhrang he aa pehtlai mi thil siloah Ralhrang pawl phurh lo ding hna an si.

Karen National Union nih an chuah mi cu Karen National Union general Secretary Padu Tadu Mu nih minthut in an chuah mi a si. Hi cathanh cu Asia Lamcung hmang in khual a tlawng mi motor mawng pawl nih zulh ding in le a zul lo mi motor mawng paoh cu dantat ding tiin cathanh ah aa tel. Credit: The Chin Post

Karen National Liberation Army Hriamtlai phu Cu An Men Hrimhrim Lo! Ralhrang phu hna nih Nevomber le December thla chung ah KNLA Kayin miphun hmunhim tu, uk mi hmun ah hriamnam a chia mi minung 47 an um nak kong cu Karen National Union/Karen National Liberation Army, Tatmaha 5 nih cathanh an chuah.

Hriamnam achia mi ralhrang pawl cu KNLA Tatmaha 5 nih lungtthiang tein an cohlangnak hna kong, inn an tin duh ah siseh, inn umnak tiang zohfel piak ding le tuanvo lakpiak dingin KNLA TatMaHa 5 Major General Saw Mu He nih KNU Mu Kyaw news ah a chimnak in thawngpang theih a si.

Ralhrang nih Aa-naa an lak hnu ah anmah ralhrang thawngpang pawl cu mipi sinah theihter lo ding, thuh sing, Hriamnam a chiami ralhrang pawl cu a leng an thawngpang kong cu hlat ding, Ngait ding” tiah KhahMahYah 73 kuttang a simi Mg Htun nih KNLA sinah a chim.

“Ralhmai kan kal hlan ah nu le pa sinah pehtlaih khawhnak ding caah Phone kan i cawk. Ramchung ah a cang mi ramkhel kong kan rel. Khua chungah a ummi kan hawi le pawl nih CDM tuah ding le tlik dingin ruahnak an kan cheuh. Zaan khat cu duty ka ciah lio ah hriamnam i put buin kan rak tli’ tiah a chim chap.

KNLA TatMaHa 5 kuttang ummi mipi Zohfeltu hna nih hriamnam a chia mi Ralhrang pawl cu lungthiang tein cohlan ding le Zohfel hna ding kong cu KNU TatMaHa 5 nih cathanh a chuah, tiah nihin thawngpang ningin theih khawh a si.

Mindat peng kahdohnak ah CDF pakhat a thi, Kawl Ralkap 8 an thi. December 17-26 karlak Mindat peng kahdohnak ah CDF Mindat nih Kawl Ralkap 8 an thah hna i, a dang tamlak an hliam hna. Nizaan, December 26 kahnak ah CDF Mindat lei in pakhat a thi tiah CDF Mindat nih an thanh.

CDF Mindat nih a thli ralfir in December 24 ah Khuachung an va tuknak ah Kawl Ralkap in captian pakhat le palek pakhat an thah hna i, an meithal pahnih zong an lak tiah anmah cathanh in theih a si. Tutan kadohnak karlak ah Kawl Ralkap nih Mindat khuami chung in kum 12 ngakchia telh in a dang khuami an tlaihmi hna zong an um. Kawl Ralkap an i chawhleh lengmang caah Mindat peng ah kahdohnak pehzulh rih dawh a si.

Paletwa Peng MP Salai Myo Thaih Inn le Biakinn An Chuh. Chin ramkulh Paletwa peng, Sami khuapi in MP a tling mi Salai Myo Thaih a umnak inn le a inn vuang chung ah sakmi Mission Baptist Church cu Ralkap nih an chuh i, an hrenh khanh hna tiah theih a si.

Paletwa Peng MP Salai Myo Thaih hi Chin Ramkulh NLD EC chungtel a silawng silo in chungtuan (secretary) rian a tuan cuahmahmi a si. Amah hi, 2015 thimnak ah tei i, 2020 thimnak zong ah Pyithu Hluttaw Palai a tling than mi a si.
Sami khuapi ah a inn le a inn kiang ummi Biakinn an chuh hi December 26 ah a si tiah, Zalen nih a tial.

Chin ramkulh chung ah NUG Minister Dr. Salai Lian Hmung Sakhong a inn Hakha ah an chuh, hrenh piak hnu ah MP Salai Myo Thaih hi a pahnihnak a si. Ramkulh chung in MP a tuan lio mi, 2020 ah a cuhmi le teinak a hmumi chung in Ralkap nih a ngeihmi an chuhmi a pakhatnak a si tiah theih a si.

Kalaymyo ah Sanguk Zung A Kang. Nihin December 27 zing ah Kalaymyo Taungzalat sang ah Semiang zung hmai ah ummi Sanguk zung cu meithal ngan le hme thawng theih duh hnu ah a kang i, a ciam tiah theih a si.

Zingka sml. 5 hrawng ah Taungzalat Sanguk zung a kangh i, a ciamh hi a si tiah Chin World nih a tial. Nihin zinglei deihlan 3 tluk zong ah meithal ngan he hme thawng he Tahan hrawnghrang zong ah fak ngai in a thangmi kahdohnak thawng cu khuami nih an theih. Credit: The Chinland Post