Mitch McConnell; Myanmar Democracy a ngahnakding caah a dongh tiang kan doh lai!

“Myanmar Democracy a ngahnakding caah a dongh tiang kan doh lai” Mitch McConnell
=========
Kawlram Democracy suttung a phak tiang kan doh peng rih ko lai” tiah American Hluttaw Republican Party hruaitu Mitch McConnell nih a chim. Ambassador to Myanmar Thomas Vajda le Mitch McConnell hna nih April 6 ah tonnak an ngeih dih hnu cathanh an chuahmi ah an telh chih.

Hramhram in uknak a latu SAC hi a mah a dohtu mipi kha faak deuh in a hrem chin hna tiah an chim. Kan hawile an simi Daw Aung San Suu Gyi le Australia chawleh lei ruahnak a cheutu Mr. Shaw Turnell hna telh in ramkhel lei thongthla pawl hna zong an thlah rih hna lo tiah Mitch McConnell nih a chim.

2021 December thla ah fehter a simi National Defense Authorization Act (NDAA) ah National Unity Government (NUG) le National Unity Consultative (NUCC) thapekding an telh chih caah lunglawm ngai a si tiah a chim. American le a pawngkam ram hna nih zeitindah Myanmar ram bawmhnak kan pek khawh lai timi kong Thomas Vajda le Mitch McConnell biaruahnak an rak ngei.

US Pyithu Hluttaw (House) Nih Burma Act 2021 An Fehter. US cozah nih Kawl ralhrang pawl dantatnak caah phung an sermi bill, Burma Act 2021 cu tuchun ah House nih an an fehter cang. House nih an fehter mi cu Senate ah an chuahpi than lai i, Senate nih an fehter ahcun President Biden nih minsen a thut lai i, upadi ah a cang lai. Upadi a can cang hnu ahcun tuan chuah an thawk colh lai.

Mah upadi nih ralhrang pawl nih uknak an laak lio i, an tuk an velh i an thahmi ruangah tuanvo an laak a herh zia ralrinnak a pek hna bantuk a si. US cozah nih Kawlram caah special palai a ngeih cang lai i, ralhrang hna dantatnak le zetiindah cozah dohtu bawmhning cang vialte a tawlreltu a si lai. Atu nak faak deuhpi in dantatnak tampi a chap chin rih lai.

Thla 6 dan voikhat in congress ah report an tuah lai. Ralhrang cozah dotu hna caah US cozah nih budget a ser piak cang hna lai. Cucaah ralhrawng caah cun thawngchia taktak a si i, mipi caah cun thawngtha taktak a si ve.

Kawl ralhrang dantatnak ding Burma Act 2021 Bill cu, America Lower house nih afehter. Kawl ralhrang dantatnak dingah USA nih aa zuam lengmang mi Burma Act 2021 tiah auhmi phunghram cu; USA LOWER HOUSE nih April ni 6 ah a fehter. Mah phunghram fehrte asi caah ralhrang nih uknak an lak hnu ah hruhru hranghrang in minung a thong leng thihnak,nuhrin covo an buarnak hna kongah ttuanvo lak khawhnak lam an si hna tiah USA Lower house in ramdang lei pehtlai tu komiti haotu Gregory W.Meeks nih thanhnak a tuah hi si.

Mah pinah zalennak hmu dingin acawlcang mi kawlram mipi hna he tiah umtti le ttuantti khawhnak lam asi caah lawmhnak chimcawk lo a um tiah Mr. Meeks nih achimchap. Burma Bill fehternak kan tuah mi kongah Global Witness phu hna zong nih lawmhbia an chim i, Upper house nih mah Bill hi fehternak tuah dingah kan in forhfial ko hna tiah Mr. Meeks nih apeh chap.

Mah phunghram Burma Unified through Rigorous Military Accountability Act of 2021″ lole Burama Act of 2021 ti zongah auh asi i, mah phunghram hi hluttaw pahnih ningin fehter i, US president nih min athut ahcun uknak la tu ralhrang pawl abawmchan tu minung, miphu hna hi phihkhar le dantatnak hna tuah si lai i, ralhrang nih mipi cungah sual an tuahnak vialte dantat khawhnak lam ahun um te ding khi asi.

Mah lengah kawlram innpa Thailand le Bangladesh ram hna kaltlang in kawlram harsa mi hna bawmhchanhnak lam hna ahun um ding a si. UNO nih kawl ralhrang cungah fak ngai in dantatnak tuah dingah USA cozah nih namchih nak lam ahun um te hnga. Kawlram miphun fa deuh hna pawl cungah sual an tuahmi le aphu phu in thahnak an tuahmi hna, Tlangcung miphun le Rohingya kongah US cozah nih kherhlai in riantuannak lam ahun um te hngami lam a si tiah My. Meeks nih alanghter.

Note: Lower House nih afehr cang i, Upper House nih fehter hau rih,an pahnih in fehter asi hnu lawngah US president nih min athut lai i, mah Bill hi atlamtling mi Bill asite lai.Upper House nih No a ti ahcun tu Lower House nih afehter mi hi santlai si lem lai lo. Credit: Salai Lairamthang, Salai William HC