Gangaw Peng Nichuah Lei Hmun Um SAC Ralhrang Sakhan YDF Nih An Laak
=========
Magway ramṭhen Gangaw peng nichuah lei hmun um Kyaww khuapi hrambunh Kah-pah -sah 23 i SAC ralhrang sakhan hmunpi 1 cu tualchung hriamtlai phu hna nih 2023, August 21 ah an luhhnawh i an laak pinah hriamthil cheukhat zong an laak khawh chih, tiah kkn theih.
“An sakhan pi kan kah caah SAC ralhrang nih chuahtak in an zaam taak. Kah-pah-sah 23 he meng 2 lawng aa hlat. A pawngkam zong ah an sakhan pawl an um nain khua pawl he cun aa hlat. Kan mit hmuh ah SAC ralhrang 3 an thi” tiah Yaw Defence Force(YDF) in ṭuanvo ngeitu pakhat nihTachileik News Agency ah a chim.
SAC ralhrang sakhan cu minute 20 tluk rau in an kahdoh hnu ah an laak khawh hi a si i SAC ralhrang 3 an thih pinah MA-3 meithal zuun 2, kuanbawm 13, kuanfang 343, Egwe Man 4, thil phorhnak zal 1, Phone 4 le Power Bank 2 zong kan laak khawh chih, tiah an langhter.
Cu sakhan hmunpi in Kah-pah-sah sakhan hmunpi cu hmuhkhawh dih a si. Anmah ralhrang pawl nihcun luhhnawh in an kan kahdoh lai ti an ruah lonak hmun 1 a si. Kan kahdoh hna hnu ah SAC ralhrang nih hriamngan in an kah, tiah a cunglei upa nihcun a chimchap.
An laak khawhmi phone chung i an hmuh khawhmi cu mah sakhan chung ah SAC ralhrang bawi Captain 2, Sergeant Major 1, Sergeant 5 le Corporal 3 an umnak hmunhma zong a si, tiah Yaw Defence Force(YDF) sinin kan theih.
PDF Sinah Drone 400 Leng Kan Pek Hna Tiah NUG Runvennak Zung Nih A Thanh. NUG runvennak zung nih ramchung um PDF Battalion hna sinah Drone 400 leng kan pek khawh cang hna, tiah nihin August 23 ah an thanh. Dohthlennak tuahtu mizapi hna nih nan thawhmi tangka hmang in ramṭhen le ramkulh ah a ummi PDF Battalion ah Drone 400 leng pekchanhnak kan tuah cang hna.
Cu kan pekmi Drone hmang cun SAC an doh hna leng ah Drone hmang in ralkap an umṭhutnak hna zong an ngiat khawh hna, tiah NUG runvennak zung nih cun an langhter. PDF ralkap Drone Team hna nih SAC ralkap pawl cu bomb an thlakhnawh hna i um thiam loin an tuah hna caah SAC ralkap pawl cu ṭihphannak he ralram ah an kal, tiah NUG runvennak zung nih cun an langhter.
2024 Tanghra Camepuai Phitnak Application Cu September 1 In Zuar Thawk A Si Lai. SAC kuttang fimcawnnak, ca cheknak zung nih 2024 kum tanghra camepuai a phi ding siangngakchia hna ca ah camepuai phit khawhnak Application cu September 1 in zuar thawk a si cang lai, tiah nihin August 23 ah an thanh. Camepuai phitnak Application tlap khat ah kyats 200 in zuar a si lai i camepuai phit luhnak caah kyats 700 pek a si lai. Applicatlion ah fimcawnnak zung hmelchunh(tazeih) aa tel lai, tiah an langhter.
2024 tanghra camepuai ah Grade-10(old system) a aung nain a ruang tampi ruangah tanghra camepuai(old system) ah a rak i tel kho lomi le Grade-11(old system) camepuai a sungmi hna cu a leng in phitnak nawl kan pek hna lai, tiah an langhter. A leng in camepuai phitnak a tuahtu hna cu anmah le an umnak peng fimcawnnak zung ah September 1- 29 chung ah camepuai phihnak ca ah a herhmi tuah dih a si lai.
Siangsangrun, sianginn ṭhen le private sianginn in camepuai a phi hngading siangngakchia hna zong sianginn uktu hna nih siangngakchia dihlak ca ah a herhmi vialte an tawlrelpiak hna lai i September 1-29 chung ah Myanmar ram ca cheknak zung ah an chuahpi lai, tiah Myanmar ram fimcawnnak zung kuttang ca cheknak zung nih cun an thanh. September 1-29 chung ah camepuai phitnak a herhmi vialte a tuah lomi hna cu camepuai phitnak nawl pek an si lai lo, tiah an langhter.
Chin ramkulh, 2023 kum tanghra camepuai cu Thantlang le Kanpetlet dah ti lo camepuai phitnak hmun13 ah rak tuah a si i tanghra camepuai application a soktu siangngakchia 3,461 an rak si. Cu chung ah siangngakchia 2,824 cu tanghra camepuai an phi i 2,045 an rak aung. Chin ramkulh 2023 tanghra sungh-awn result ah zatuak 72.42 cu an awng i Myanmar ram chung ah awnnak a ṭha bik panganak a rak si.
Kalaymyo Ah Eidin Man A Kai Tuk Caah Mipi Harnak An Tong! Kalaymyo-Gangaw lam le Maharmyine lampi phihkhamhnak ruangah atu chung hrawng hi Kalaymyo ah eidin le datsi an man a kai tuk pinah cawk ding zong a har, tiah tualchung mi hna sin in theih a si.
August 21 ah khan Kalaymyo khuachung datsi zuartu hna nih datsi hi rikhiah in an kan zuarh khawh nain, nizaan August 22 in cun datsi cawk a ngah ti lo, tiah tualchung mi pakhat nih a chim.
A luancia zarh chungah cun datsi gallon khat ah Ks. 16,000 in duhzat cawk khawh a si nain, atu ah cun gallon khat ah Ks. 20,000 tluk a si cang. Cu zong cu cawk ding ah a hartuk cang, tiah theih a si.
Cu pinah facang, chiti, arti tibantuk man zong zarh khat chungah fak ngai in a kai caah tualchung mi zeimawzat cu an harsa ngai, tiah theih a si. Naycia-chiti cuaikhat ah Ks. 13,000, pee-chiti cuaikhat Ks. 15,000 an phan i, arti pumkhat ah Ks. 800 tiang a kai, cu zong cu cawk ding kan i hmuh kho ti lo. Arsa le Ngasa hi cuaikhat ah Ks. 20,000, Sasen sa cuaikhat ah Rs. 22,000, khachuan-raang cuaikhat Ks. 10,000 tiang in an kai, tiah theih a si.
Kalay ummi pakhat nih cun, “Facang hi tun khat ah 150,000ks a phan cang, cu zong cu mah duhzat le tam deuh in cawk khawh a si lo, dawr ngeitu hna zong nih a cawtu hna sinah rikhiahpiak in an kan zuarh,” tiah The Chin Post ah a chim.
Myanmar Mi 3 Le India Mi 2 Sin In Rithaisii Tamlak Aizawl Khuapi Ah An Tlaih. Mizoram ramkulh, Aizawl ah Myanmar mi 3 le India mi 2 sin in rithaisii – Methamphetamine tlang sing khat, 9.782 kg in a ritmi cu nizaan August 22 zinglei suimilam 9:00 hrawng ah Aizawl khuapi Edenthar sang ah Excise and Narcotics Department(END) nih an tlaih.
Rithaisi ruangah tlaih a tongmi panga chung ah pahnih hi Tripura ramkulh chung ummi an si i, midang pathum hi Falam peng, India-Myanmar ramri Khuamawi khua ah a ummi; Zonunsanga, Lalruatzela le Khawpuimawia an si, tiah Mizoram media nih a langhter. Rithaisii tlang hi Kalaymyo in India-Myanmar ramri ah phurh a si i, India ramchung ah luhpi ding in timhtuahnak an ngei, tiah theih a si. Cu rithaisii a phurtu motor zong an tlaih, tiah an thanhmi ah an langhter.
Tlaih a tongmi 5 hna cu The Narcotics Drugs & Psychotropic Substances Act, 1985(NDPS Act) in taza an cuai hna. Cu upadi ning ah cun kum 10 in kum 20 tiang thong thlak khawh a si pinah India phaisa 100,000 in 200,000 tiang cawi liamter khawh an si.