Kani Peng Kahdohnak Ah Mipi Ralkap Pakhat A Nunnak Liam; Ralhrang Nih Thli Le Ruah Lakah Vanlawng Bomb A Thlak Hna
=========
Sagaing ramthen Kani peng, Min-ma khua pawng, SAC ralhrang le tualchung hriamtlai kar kahdohnak ah mipi ralkap a si mi Pah-kah-phah in minung 1 a nunnak a liam i ralhrang nih raltuknak vanlawng in bomb an thlak hna tiah kan theih.
May 14 zanlei suimilam 1 tluk ah SAC ralhrang thazaang 120 leng rallam sial mi hna le tualchung mipi ralkap pah-kah-phah kar ah kahdohnak chuah hi a si, Hi kahdohnak ah SAC ralhrang vanlawng bomb in voi 3 a thlak hna.
“Mipi ralkap pakhat a thi mi hi SAC ralhrang umhmun khuarnak pawng Tower tung ah humhimnak a lak lio ah ralhrang nih an kah hi a si, raltuknak vanlawng zong nih thli le ruah lak ah a hlatnak in voi 3 a vun bawmh hna” tiah mipi ralkap neihniam pakhat nih a chim.
Hi kahdohnak ah tualchung mipi hriamtlai a si mi Pah-kah-phah in minung 1 a nunnak liam i 6 hliam an tuar. Ralhrang hna cu May 15 zinglei tiang ah Min-ma khua ah umhmun khuar in an um rih. SAC ralhrang rallam sial ruangah Kani peng mipi 13,000 leng thli le ruah lak ah ral an zam hna tiah kan theih.
Cyclone Thlichia Ruang Ah CDF-Paletwa Battalion-2 Headquaters Aa Rawk; Chin ramkulh, Paletwa peng chung ah Cyclone thlichia faak ngai in a hran caah a hrawhmi a tam ngai. Cu chung ah CDF-Paletwa Battalion-2 Headquaters zong aa rawk, tiah tualchungmi hna sin in theih a si.
May 15, zanlei sang in ruahpi le thli a fah caah CDF-Paletwa Battalion-2 Headquaters cu cheu hnih chungah cheukhat renglo aa rawk, tiah vuanci hlun Salai Isaac Khin nih May 15 tuzing ah a chim.
Paletwa peng chung ah thazaang a ṭhawngmi thlichia a hran caah Paletwa pengkomh chung hlankan tein runvennak le thil hrawhnak kongkau ah a herh ningin kan i bawmhchanh khawh cionak ding ah tiin (Mocha Cyclone Emergency Respond Committee- Paletwa) tiah Paletwa pengkomh mahte ukhruainak pengkomh Council PADC nih May ni 15 zing ah thawng an thang ve.
“Paletwa peng chung cu khuapi chung lawng Phone line a ngah caah Paletwa peng chung ah aa rawkmi le mipi hliamtuar an um le um lo hlathlainak kan tuah cuahmah lio a si, khuapi chung ah cun aa rawkmi a um hraw lo, khuate cheukhat ah cun thil a hrawkmi an um ti ah thawng kan theih, CDF ralkap sakhan cheukhat zong aa rawk ti ah thawng kan theih” tiah PADC in nih ṭuanvo ngeitu pakhat nih Than Lwin Khet ah a chim.
Cyclone Thlichia Ruangah Rohingya Ralzam Camp Inn 3,000 Tluk A Rawk; Minung 7 Hliam An Tuar; Cyclone thlichia nih Bangladesh ram a hursuan mi nih Rohingya ramzam um nak Teknaf le Ukhiya Camp inn 2,800 leng thli nih a rawk i minung 7 hliam an tuar tiah Rohingya ralzam kongkau tawlrel tu RRRC nih May 14 zan suimilam 11 ah an langh ter.
“Thazaang thawng ngai mi Cyclone thlichia cu Bangladesh ram hmun cheukhat ah fak ngai in thli a hran caah Rohingya ralzam camp a rawk mi kong fiang tein theih khawhnak ding ah a tlawm bik nikhat cu caan pek a hau rih lai” tiah tuanvo ngeitu hna nih an chim.
“Thlichia cu a hlankan ralrin pek bantuk in a fak tuk lo nain, tam ngaite inn lo cu a rawk thiam, pehtlai in ruahpi a sur caah mincinh nak a chuah lai phan a um, inn le lo tampi a rawk mi cu i sersiam thannak dingah bawmh kan herh ko”tiah Rohingya ralzam pakhat nih a chim. Rohingya ralzam camp a um mi hna cu a hlankan in a him lai tiah ruahnak le dornak an tuah mi hmun 53 ah an thialkam ter hna tiah kan theih. Credite;Lungmili Post