SAC Ralhrang Nih Hriamnam An Chiahnak Inn KA Ralkap Nih An Laak
=========
Karenni ramkulh chung kahdohnak ah SAC ralhrang nih 120MM hriamthil pawl an chiahnak inn 1 cu Karenni Army(KA) ralkap Battalion 5 nih kan laak khawh, tiah 2023, July 30 ah KA ralkap nih Video he an langhter.
Mipi ralkap nih an laak khawhmi hriamthil hna lak ah man a ngei bikmi le SAC ralhrang nih an ṭih bikmi cu 120MM kuan pawl hi a si. A dang hriamtlai phu hna zong nih an laak bal lomi hriamthil hna an si i zeitik an laak timi le an laaknak hmun tu cu Karenni Army(KA) ralkap nih an langhter rih lo.
Than Lwin Hlei Pawng Ah Bomb Puahnak A Chuah Caah SAC Ralhrang Kuttang A Thi Mi An Um; 30 Leng Hliam An Tuar. Karen ramkulh Hpa-ann peng Than Lwin hlei pawng Check Gate pakhat ah July 31 zing suimilam 7 tluk ah Bomb puahnak a chuak i SAC ralhrang kuttang a thi mi an um pin ah 30 leng hliam an tua tiah tualchung Media le mipi hna nih an langhter.
“Zinglei ah puahkehnak fak ngai a chuak, mah check gate ah hin SAC ralhrang pawl deuh chun he zan he an um hna, hliamtuar le a thi mi zong an tam ngai lai” tiah tualchung mi pakhat nih a chim.
Bomb puah ning a fah ngai caah a pawngkam ralhrang umnak inn pawl, check gate, motor le motor cycle zong an rawk hna.
Than Lwin hlei pawng ralhrang gate hngak mi hna nih motor License ngei lo hna cu tlaih in motor pakhat ah 50,000 in an hal hna caah hi gate cu tangka luh a thatnak pakhat zong a si tiah pawngkam mi hna nih an chim.
Nyaunglebin peng Kahnak Ah SAC Miakpi Battalion Captain Tet Aung Soe A Thi. Bago ramthen, Nyaunglebin pengchung kahnak ah SAC miakpi battalion in Captain Tet Aung Soe a thi tiah naihniam chungkhar nih Yangon Khet Thit News ah a chim.
July 12 ni Babo ramthen, Nyaunglebin peng kahnak ah Captain Tet Aung Soe cu hliamtuar in a zualhma ngai caah July 29 ah a thi. Captain pa nih nupi fapawi lio mi a tantak tiah theih a si.
“Captain Tet Aung Soe hi cimtlak battalion ah a rak um hmasa hnu in Taungngu battalion ah a rak i `hial. A thi lio ah a nupi cu fa no pawi ka te a si.
Hliamtuarnak in a tu siizung ah a thi” tiah naihniam chungkhar nih an chim. Captain Tet Aung Soe cu DSA (51th intake) in a dih mi a si i dohtlennak a tuahmi mipi ralkap cu Facebook in soiselnak kong a tial ton mi a si.
Yangon ah Police Sakhan Hmu Police Captain Lin Lin Tun, A kuttang nih Meithal in a kah. Yangon North Okkalapa Sakhan Hmu Police Captain Lin Lin Tun cu a kuttang Police senngei lo Ar Khar Soe nih meithal in a kah. Siizung ah zualhma ngai in a um hnu, July 27 zan ah a thi tiah theih a si.
July 18 zan 8:30 pm ah North Okkalapa Myomya police sakhan ah Sakhanhmu Police Captain bawi Lin Lin Tun nih a kuttang police pawl cu zan duty dingin nawl a pek hna lio ah Police Ar Kar Soe nih zankhat chungah voi 2 duty tuan a sinak kongah an pahnih karlak bia-elnak a um.
Cu hnu ah Police Ar Kar Soe nihcun, police bawi Lin Lin Tun cu M -16 meithal in voi 1 kahnak in Lin Lin Tun cu hliamtuar in a zualhma ngai i North Okkalapa sii zungah an kalpi hmasa. A hma a zualngai caah Yangon siizung pi ah an thial`han hnu, an thlop kho ti lo caah July 27 zan ah a thi. Meithal a kap tu police Ai Kar Soe cu North Okkalapa Myomya police thonginn ah hrem a si tiah theih a si. Police Captain Lin Lin Tun cu July 29 ni ah a ruak vui a si lai tiah sakhan um police nih Khet Tit media ah a chim. Credit: The Chinland Post, Lungmili Media
Video link; https://fb.watch/m7HSlRcAk7/