Mipi Nih Dirkamh Lo Ahcun, Kawl ralkap pawl nih ol tukin CNA/F camp an laak colh lai

Tulio cu CNA/F pawl cungah soiselnak le vuivainak a tam ngai lio asi. Kawl ralkap hi meithal in an kah ve hna awk asi maw? A caan lio asi ca-ah tlawmpal te hmunhning ka vun ttial. CNA/F cu hriamtlai bu (armed group) an si caah umnak hmunhma (camp) ah hriamnaam he khuasak in Kawl ralkap uknak a domi an si. Khat lei ah: Kalamyo lei mino cu khuachung ummi mipi an si. Kawl ralkap uknak laakmi a domi an si ve. An nih cu hriamtlai bu bantukin an si lo.
An dohmi ai khat veve nain: an doh ning le an kalning ai khat lo.

Kawl ralkap nih an ttih ngaimi cu: hriamtlai buu asi ttung lomi: Kalamyo bantukin mipi nih heh tiah hriamnaam he an rak tthuat vemi hna kha asi. Sang kip, khua kip, peng kip le hauka kip le lam kip in: a ho te buu si, ti hmanh hliah khawh lomi, mipi nih rak tthua cio hna sehlaw: Kawl ralkap pawl hi an i muai cawk lai lo. CNA/F cu ziah nan kah ve hna lo, tiah mi tampi nih an zai hnawh hna; an mawhchiat hna. Asinain thuuk deuh in ruah a herhmi um. Tulio CNA/F an dirhmun hi zoh a hau. Zeiti hmanh in Kawl ralkap kah awk an ttha lo.

Aruang cu CNA/F cu an tlawm tuk. (An chimnak ahcun ralkap 400 hmanh an ngei lo, an ti.) Raltuknak hriamnaam ngan an ngeih lo lengah: anmah tleih ding meithal hmanh tlamtling in an ngei lo, ti asi. Minung (ralkap) zat in siseh, an hriamnaam in siseh: Kawl ralkap he ai kap kho ding asi hrimhrim rih lo. A thazaang a der tuk; chimtlaak asi lo.
Hi bantuk an dirhmun asi ko buin: hei kap hna sehlaw, Kawl ralkap pawl nih ol tukin CNA/F camp an laak colh lai. An hrawh dih colh lai. A zaam manhmi le a zaam khomi poah cu Mizoram, India ah an zaam viar a hau colh lai.

Cu tikah a taang dingmi cu: Laimi khuate ummi mipi le Kawl ralkap an si lai. Ralkap nih mipi kha duh chungin an cilnaan hna lai; an tleih (silole) an thah thluahmah hna lai; inn le lo an hrawh dih lai. Abikin, Lai lei ttio tiva le bawinu tiva kap hrawng ummi le-bang cu: veengtu (defence) tu ngei loin ralzaam le tlik viar dirhmun an phan ko lai.

CNA/F hi an ralkap zong tam hna seh; hriamnaam tling zong ngei pah hna sehlaw, Kawl ralkap he an i kah zongah an zaam lai lo ii, khuate um mipi zong tampi aa kan veen (protect) pah chih khawh hnga. Tulio dirhmun ahcun: kap sual hna sehlaw, anmah (CNA/F) he khuate lei mipi he khuaci kan mui ko lai. CNA/F nih Kawl ralkap pawl hi kah awk a ttha hrimhrim rih lo. Credit: Van N Elizabeth