Kaphnih Kahdohnak Um Lo In SAC Ralkap Nih Minkin Peng Ah Bomb An Thlak Caah Ngakchia Telh In Mi 6 Nunnak Liam
================
Sagaing ramṭhen, Minkin peng Pihkaya(ပိက္ခရား) khua cu SAC ralkap nih kaphnih kar kahdohnak um lo in vanlawng in bomb thlaknak a tuah caah tualchung mi an nunnak a liam tiah theih a si. May 4, chunhnu suimilam 1:00 hrawng ah vanlawng 1 nih ngiatthlainak a tuah i a dang vanlawng pakhat nih bomb a thlak, cu hnu minutes tlampal a rau ah a dang vanlawng pakhat nih kahdohnak a tuah tiah theih a si.
” Sianginn le phungki sianginn pawnghrawng cu vanlawng in voi thum tiang kahdohnak an tuah, voi khatnak ral tuknak vanlawng nih bomb a thlak ah khuami hna cu an zaam manh caah nunnak liam mi zong an tamtuk lo nak asi. SAC ralkap nih jet fighter hmang in bomb a thlak ruang ah nunnak liam mi hna chung in ngakchia le tar zong an i tel” tiah Minkin battalion 5 in ralkap Ai Oo nih a chim.
Nunnak liam mi hna chung ah kum 12 tang ngakchia zong an i tel i, an min le an sining dikthlir cu taan takmi an chungkhar himnak caah langhter a ngah rih lo tiah a chim. SAC ralkap nih van lei kahdohnak a tuah ruang ah suaknak ngei lo tualchung mi 3 cu hmakhat te ah an nunnak a liam i, adang 3 cu hliamhma fak an tuar hnu ah an nunnak a liam. Cu pin ah hliamhma fak a tuar mi 15 an um i an nun humhimnak caah thinphang an si ko tiah theih a si.
Tutan ah SAC ralkap nih van lei kahdohnak a tuahnak hmun hi Pihkaya khua a si i, cu ka khua in meters 100 aa hlatnak ah pyusawhti tampi an umnak Ma Oo khua a um. Ma Oo khua cu tualchung hriamtlai phu nih atu le atu kahdohnak an tuah lengmang hna caah, cu ka khua he aa naihnak khua hna cu SAC ralkap nih atu bantuk in van lei kahdohnak an tuah hi a si kho tiah ralkap Ai Oo nih cun a chim.
Kalaymyo Ah Drone Hrawk Khotu Seh A Phan; Nizaan, 4 May 2023 ah Kalaymyo ah drone jammer asilo mi Drone hrawk khotu seh a phan tiah theih a si! Cu pinah cu seh lei thiamsang Engineer zong an phan tiah Chinland Scout Network nih a thlithup thawng an theihmi cu an langhter!
Nai hrawng hi Chinram ah Drone hi Helicopter hrawh, Armour Tank hrawhnak, SAC ralkap leilawng 30 hrawhnak ah Chin ralkap hna nih Drone hi santlai ngai in an hman khawh caah atu bantukin Drone hrawk khotu seh le engineer an chiah hi a si lai zumh a si. Cucaah Chin ralkap hna nih Drone hi tam deuh le a tha deuhmi an ngeih, an hman khawh lengmang a herh tuk! Drone cawknak ah a khua in thazaang chuah cio hna usih!
SAC Ralkap Fighter Nih Malsawm Khua Ah Bomb A Thlak, Biakinn A Rawk; Hakha peng Malsawm khua ah SAC ralkap Jet Fighter nih bomb a thlak caah Biakinn a rawk dih, tiah theih a si. “Nihin May 5 zing suimilam 10:20 hrawngah SAC ralkap Jet Fighter nih Malsawm khua chungah bomb a thlak ruangah Malsawm Tipil Khrihfabu Biakinn a rawk,” tiah tualchung mi pakhat nih The Chin Post ah a chim.
Fighter nih bomb voi 6 a thlak lioah khuami cu a hlankan in ralhrial in an zam dih cang. Khua chung zong ah kahdohnak zeihmanh um loin bomb a thlak. Khuami le Chin ralkap tu cu an him dih, tiah a chim.
Tatma 77 SAC ralkap hna cu Bungzung lei in an kai i, Malsawm le Vantlang ramchung kiangkap ah an um rih lai tiin zumh a si. Nizan May 4 zong ah Fighter nih Malsawm khua pawngkam ah bomb a rak thlak cang. Cu pinah Vantlang khua zong ah Fighter nih bomb a thlak ruangah Vantlang khua inn 15 a rawk, tiah theih a si. Credite; The Chin Post.