Miphun Hla/ Rampi Hla (National Anthem)

Miphun Hla/ Rampi Hla (National Anthem)
=============
Chin miphun aiawh in thil kan tuah tikah kan Chin miphun hla/ kan Chin ram hla pi kan ngei maw? Kan dihlak in kan i hrawm khawhmi hla a si maw? Zeitindah mah hla cu kan Miphun hla siseh, kan Chin ram hla siseh tiah fehternak kan tuah ne lai?

(1) National anthems; Miphun hla hna cu acozah asiloah zapi puai sunglawi tuah lio ah an sak cio. Ram aiawh, miphun aiawh in lentecelhnak an tuah tik zong ah an sak ton. World Cup hna nan zoh cio theu lai. Anmah le an miphun/ ramhla an sak cio. Chin miphun aiawh in Myanmar ramchungah siseh, ramdang ah siseh, lentecelhnak asiloah puaisunglawi kan tuah tikah zei hla dah kan sak ton ve? Miphun hla hi minung pakhat asiloah pakhatnak tam deuh nih an phuahmi kha rampi hla ah cohlan a si ko.

(2) Miphun Hla Thawhkeh Ning; A thawhkeh ning an chimmi le an tialmi hi aa khat cio lo. Acheu nih mi tampi nih Wilhelmus tiah an theihmi Netherland rampi hla Wilhelmus van Nassouwe hi a si lai an ti. Aruang cu hi hla hi 1572 hrawnghrang ah an phuah cangmi hla a si an ti. Asinain 1932 tiang miphun hla ah cohlan a rak si lo. Miphun hla a phuahtu minthang cheukhat hna cu Josef Haydn (Austria, Germany) asiloah Charles Gounod (Vatican) hi an si. Austria miphun hla hrampi a phuahtu hi Haydn asi. AD 1797 kum ah a phuah. Germany nih 1950 ah a biafang bantuk kha an hman ve. Atu lio Austria miphun hla cu 1947 kum ah fehter cohlannak an tuah.

(3) Miphun Hla Awdawh He Aa Tlaimi Pungsan (musical forms); Nihin kan chan ahcun miphun hla awdawh umtu ning he pehtlai in then (5) ah atlang piin an then. (3.1) Thangthatnak hla (hymn): Miphun hla aw lak ah a hlun bikmi hla aw a si tiah achimtu an tampi. Mah hla aw phunsan hi England, Europe ram le anmah le an pennak ram hla/ miphun hla ah an hman. Cinken awk tlak a simi cu Thomas Arne nih 1745 ah a chuahpi mi “Pathian nih Siangpahrang a khamh” God save the King timi British miphun hla hi a si. Mah hla chungah a ummi a biafang kha anmah le ram hawih in an thlen hna. America nih “ My Country ’Tis of Thee” asi. Denmark, Sweden, Switzerland, Russia, and Germany nih an i lak ve. Liechtenstein nih nihin tiang an an hman. 1974 kum tiang Australia “God Save the King/Queen” le Canada nih 1980 tiang an hman ve.

(3.2) Ralkap Lamkal Awchuah (Marches): 1795 kum ah France Pintit nih “La Marseillaise” fehter cohlannak an tuah ve. A pennak ram a simi hna Martinique in New Caledonia, an dihlak ram 9 an hi hla hi an miphun hla ah an hman ve.
(3.3) Khuate hla aw (Folk music): Folk music cu nan theih dih cangmi a si. Hi hla aw umtu ning hi Cambodia nih 1941 ah an miphun hla asimi “Van nih kan siangpahrang a huhpheh” Heaven protects our kings ah a hman ve. Mah bantuk hla aw ning tein Japan, Tibet, Sri Lanka nih an miphun hla ah an hman ve. Myanmar rampi hla asimi “Kaba Ma Kyei” – vawlei a dongh tiang – Till the end of the world” hi Saya Tin nih AD 1930 ah a rak phuahmi a si ve.

(3.4) Music Thilri in Tummi (Fanfares): Hla bia tel lo in a tum long in tummi a si. A bia aa tel lo. Hi bantuk ramhla/ miphun hla hi middleast ram tam deuh nih an hman. Atlang piin Qatar, Kuwait, and the United Arab Emirates. Music asiloah drum hna, khuang hna tum in ramhla an sa kan ti lai cu. Nihin Laimi zong a bia tel lo bak music asiloah khuang nih lungthawh lak in a kan tuah khawh ve. Muslim ram cheukhat he kan i lo pah.
(3.5) Operatice anthem: Mah bantuk ram hla/ miphun hla hi Latin America ram kan timi hna Brazil lei ram tam deuh ah an rampi hla ah an hmanmi a si. Vawlei cung ramhla/ miphun hla vialte lak ah a sau bikmi hi EI Salvador rampi hla hi a si lai an ti. (Ralph Hartsock 1076-7). Acheu ramhla/ miphun hla hna cu Laimi nih hla choir kan sak dih hnu ah “Amen, Amen, Amen” tiin adonghnak kan sakmi hna hmanh in a tawi deuhmi zong an um ve.

Forhfialnak: Nan khua aiawhmi hla te zong i ngeih khawh ahcun a tha. A sualnak pakhat hmanh a um lo. A khuakip in bawlung nan chuih tikah siseh, nan khua puai sunglawi nan tuah tikah siseh, nan sak lengmang lai. Chin miphun zong kan ram hla, kan miphun hla hi zeitindah kan tuah ve awk a si? Zeitik caan ah dah a hlei in kan hman lai? Zeitindah kan miphun hla a chuah khawhnak caah kan tuah lai? Kan ngeih ciami hna tah I rinh awk an tha maw? Nanmah le nan khua hla te rak i ngeih cio zong rak i zuam hram uh. Saya Thawng Za Pum