Mindat khuapi ah a lut mi ralhrang pawl kongah CDF-Mindat nih an chim mi

Mindat khuapi ah a lut mi ralhrang pawl kongah CDF-Mindat nih an chim mi
=========
CDF-Mindat in bawi pakhat nih cun ralhrang pawl nih hin kan uk mi ram le ralzaam an tongh hna ahcun fak taktak in kan doh hna lai tiah a chim. Ralhrang pawl Tank 2 le motor 80 leng he Mindat khuapi chung an luh caah ziah zei hmanh an tuah lo, an kah hna lo nan ti men lai.

Asinain ralkap thazaang 400-700 karlak hrawng a si mi le Kyauh Htuh in Miakpi le Mindat in Miakpi in bawmh dingin tiamhcia a si mi va kah kha a fawi lo mi thil a si. An mortor cu kan kham khawh ko hnga, asinain a pawngkam khua pawl an khangh dih sual lai ti kan phang.

AA he ai ngair ngai mi ralhrang nih hin hriam ngan an i phurh ttheu lai tiah kan zumh. Kan uk mi ram le ralzaam pawl an tongh hna ahcun fak taktak kan doh ve hna lai tiah CDF-Mindat in ဌာနချပ်ခွဲ ပျူဟာမှူး a si mi Naing Tam nih a chim.

Tonzang sianginn ah a riak mi ralhrang pawl PDF-Zoland nih an kah hna. Tonzang khuapi sianginn ah hmun a khuar mi ralhrang pawl cu mipi ralkap fonh nih an kah hna a thi le hliam tuar an um tiah PDF-Zoland nih a langhter.

Sianginn ah hmun a khuar mi ralhrang 20 hrawng cu mipi ralkap fonh PDF-Zoland le CDM Siyin fonh nih an va kah hna caah a thi le hliamtuar an um tiah an langhter.

CNA Ralkap “Tuan Peng Lian” Ralram ah a Nunnak a Liam. Nizaan March 23, Tedim peng chung ah CNA michecknak Gate pakhat cu Zomi hriamtlai ZRA nih rello in an kah hna caah CNA ralkap pakhat a nunnak a liam, tiah kan theih.
Lentlang Gate an hngah lio ah ZRA nih an rak kah hna i, Tuan Peng Lian a nunnak a liam. A dang CNA ralkap pakhat a zaam kho.

ZRA cu India ram, Manipur ramkulh ah hmun a khuarmi an si i, Tedim peng chung PDF sakhaan pawl an rak hrawhpiak lengmang hna caah SAC ralhrang lei ah an ttang tiah lunghrinhmi an si. Chin ramkulh ral lei cawlcanghnak pawl hi ZRA’s Eastern Command tlangtlaknak in tuahmi a si, tiah ZAR Facebook Page le Group pawl ah an ttialmi hmuh khawh a si.

PDF-Gangaw nih ralhrang 5 tluk an thah hna. Gangaw peng Min khua ah a um mi ralhrang pawl cu PDF-Gangaw nih an kah hna caah ralhrang 5 tluk an nunnak liam tiah PDF-Gangaw nih an langhter.

PDF-Gangaw thlanglei ralkap phu nih Min khua Palik camp ah a um mi ralhrang hna cu 80 mm in voi 7 le 60 mm in voi 8 an kah hna hnu ah Camp chungah a um mi ralhrang 3 nunnak liam. Cu hnu ah ralhrang pawl hlei an zawh lio ah landmine in an puah hnawh hna caah minung 2 an thi tthan tiah an langhter.

Miphun ning in cihmih a si tiah US nih a thanhmi Kawl ralkap nih a cohlang lo. Rohingya mipun cungah Kawlralkap nih an miphun ning in a cihmih hna tiah a thanhmi cu SAC nih a cohlang lo. American cozah nih a thanhmi hi a dik lomi thli sinning kha i charhchan in bia khiahnak a ngeihmi a si tiah March 22 zaanlei ah SAC Minister of Foreign Affairs nih a thanh.

Kawl ralkap cu miphun cihminnak (Genocide) a buar ko tiah March 22 Washington DC ah a ummi Holocuast museum ah tuahmi Rohingya miphun cihmih an tonnak caizin langhternak ah phungning tein a thanh. 2017 ah Kawl ralkap nih Rohingya miphun cungah a buarmi sualnak hi Genocide tiah auhmi miphun ning in cihmihnak le Crimes against Humanity tiah auhmi miphun cungah sualnak buarmi a si tiah Antony Blinken nih a chim.

“Nuhrin covo phu hna sin in hmuhmi kapṭhanhnak aa tel lomi thil sinning pawl le thawngpang dik le American ramdang lei committee nih kan mah tein ṭha tein zohfelnak kan ngeih hnu ah biakhiahnak kan ngeihmi a si” tiah a chim.
American cozah i biakhiahnak hi lunglawm tein kan don ko tiah Bangladesh Minister of Home Affairs Assaduzzaman Khan nih a chim.

Rohingya kong he pehtlai in cawlcanghnak a ngeimi hna le Bangladesh a phanmi Rohingya ralzaam hna zong nih a tu bantuk in American nih a thanhmi hi kan i lawm. Kawl ralkap hi American cozah nih hinak faak deuh in a ziizut hram ko seh tiah forhfialnak an ngei.