Mindat he Meng 17 a Hlatnak Kyaukhtu Airport ah SAC Ralhrang Motor 80 Leng an Phan

Mindat he Meng 17 a Hlatnak Kyaukhtu Airport ah SAC Ralhrang Motor 80 Leng an Phan
———–
Nihin zinglei sml. 4:00 hrawng in Pakokku in aa thawhmi SAC ralhrang motor 80 leng le raldohnak Tank 3 cu nihin zaanlei sml. 3:00 hrawng ah Mindat he meng 17 hrawng a hlatnak Kyaukhtu Vanlawng bual ah an lut hna.

“Motor 80 leng chung ah 25 hrawng hi cu ralkap an khat. Asinain, a dang motor pawl hi cu eidin tirawl le ralhriam a phormi si dawh an si,” tiah YAW-PDF lei nih an chim. Nizaan Lumbang khua ah a riakmi SAC ralhrang pawl zong nihin zinglei sml. 8:00 hrawng in Falam lei an panh i chun sml. 11:00 hrawng ah Vaar hlei an phan.

Kyaukhtu ah a phanmi SAC ralhrang pawl zong hi Thlanglei Laitlang CDF pawl doh ding in timhtuahnak an ngei tiah zumh a si i, October 9 thawk in nihin ni tiang ah SAC ralhrang nih Chinram CDF/CNA doh ding in motor 130 leng le Tank 5 a rak thlah cang.

Lumbang Khua Sianginn ah SAC Ralhrang pawl Hmun an Khuar. SAC ralhrang motor a tlawm bik 55 hrawng cu Falam peng, Vaar phak hlan Lumbang khua sianginn ah hmun an khuar, tiah CHRO nih a langhter. Nihin zaanlei sml. 5:30 hrawng ah Lumbang ah an phan i motor 9 hi Kalay lei ah an kir tthan. An lawng in maw an kir timi bel fiang in kan thei kho lo.

“Ralkap in a zaammi hna nih an chim ning ah aralaimi ni tlawmpal chung ah CNF Headquarters fak piin doh ding in timtuahnak an ngei,” tiah CHRO thawngthanhnak nih a langhter.

Motor 40 Hrawng le Tank 2 in SAC Ralhrang pawl Falam le Hakha lei ah an Ra Cuahmah. Nizaan ah Taingen he furlong 4 hrawng a hlatnak ah a riakmi SAC ralhrang pawl le nihin zinglei ah Kalay in a rak kai chapmi SAC ralhrang motor 30 hrawng an i fonh i Falam lei ah an rak kai, tiah thawng kan theih.

Tu zaanlei sml. 5:30 hrawng ah khan Falam peng, Vaar phak lai Lumbang khua ah an phan cang. Taingen lei in an ratnak lampi ah bomb kahthlorh in an kah thluahmah caah Zawlnu khua Lo ah a riakmi pa pakhat a kee an hliamhma a pu. Chin ramkulh chung CDF le CNA doh awk ah SAC nih ralkap thazaang tampi a run thlah hna hi a si.

“CNA sakhaan Camp Victoria lak ding motor 52 le ralkap thazaang 700 in Chinram ah an rak kai cuahmah,” tiah Dr. Lian Hmung Sakhong nih Oct. 9 Zoom biaruahnak zong ah a chim. Atu thla ni 15 hrawng in SAC ralhrang nih kahdohnak an thawk lai tiah ruahdamhnak zong a um.

Vawleicung zei bantuk ralram hmanh ah hman lo ding in khammi sivai bomb (Chemical Bomb) pawl zong SAC ralhrang nih an hman khawh tiah an ruah. Falam lei ah a rak kaimi pawl hi atu zaanlei sml. 6:30 tiang ah Falam khua cu an phan rih lo. Credit: The Chin Journal