Mindat ah Ralhraang hmanh mi bomb chungkhar pakhat nih an i lamh sual ca ah anu a thi i a fanu hma faakpi a pu

Mindat ah Ralhraang hmanh mi bomb chungkhar pakhat nih an i lamh sual ca ah anu a thi i a fanu hma faakpi a pu
=========
Nihin, Mindat khua ah lo in a rak tlung mi chungkhar pakhat cu an inn hmai zawn ah ralhraang nih an hmanh mi bomb an i lamh sual ca ah pakhat a thi i pahnih hma an pu tiah theih a si.

Kum 2 hrawng a si mi an fanu te nih bomb aa lamh sual ca ah a vorhlei ke a bul i a lu ah hliamhma a pu. A nunnak thinphaang dirhmun a si. Anu cu a hmun ah a thi colh i an inn pawng ah a um mi nu pakhat zong hma a pu tiah Mindat Peng Mizapi Uktu Bu nih an thanh.

CNF Cathanh Comment; Nizan nai ah CNF nih buu pakhatkhat, minung pakhatkhat nih Chin mi ramdang ah zaam ding, ralzam sokding phun lem soi/ forhfial lo ding tiah cathanh an chuah. Atlangpi in hi ca an chuahmi cu refuge second wave khamh an timh a si lai tiah ka ruat. Hi kong hi a linsa ngai ca ah comment tawi ka ṭial ve. Thil hi zeitin kan zoh timi nih kan hmuhning (aphi) hi a dan ter ti, a si ca ah nan hmuhning in ka hmuh lo sual cun ka zohning aa dang tiah rak ka ruat piak te u.

Hmuhning 1, Miphun kan tlau lo ding ah chikkhat ralzam si lo in a pemding in va zaam cu a poi kho. A bik in, voikhat a zaam bal cangmi kan Chin ram ca ah ṭih nung ngai a si in ka hmuh. Nihin ah Chin ram ah sing 4/5 hrawng kan um lio ah ramdang ah a ummi Chin hi sing 1 in sing 2 kar tluk an si cang.

Cucu refuge wave pakhatnak nih a hrinmi a si. Ruah awk a ummi cu Chin ram ah tah Chin mi maw an karh, miphun dang dah ti hi a si. Hakha khuapi kan zoh ahcun Kawl holh, Kawl ca, zung ah Kawl bawi an tam ko cang. Kawl rian ṭuan tete zong an karh chin. Atlangpi in Myanmar ram ah milu a tlawmbik kan si nain, ramkhel harnak ruang ah kan ram ah kan mi kan tlawm, Kawl an rak kai duahmah ve. Ramkhel ruang ah kan ca le kan nunphung kilven khawh a si lo, Kawl holh le Kawl ca deuh lawng kan duh i kan thiam cang.

Cu bantuk dirhmun lio ah ralzaam in ram thumnak lei kan kal rih ahcun zeidah a chuak hnga. Cucaah, Hi bantuk lei in ka zoh tikah CNF cathanh hi ka cohlan ngaingai. Kan har ko nain, kan i inn lo cun Pyu miphun bantuk in kan tlau ko lai. Hmanthlak nih a langhter mi cu milu tlawmbik kan si, milu kar a tlawm bik zong kan si fawn. Kan ram a si fak rih fawn tikah tu voikhat kan zam cun kum 200/300 hlan ah Chin kan tlau kho men tiah ka ruat.

Hmuhning 2, Minung lei kap in ka zoh ahcun Chin mi nih himnak an kawl cu an tuah awk a si ve ko tin ka ruat fawn. Naihrawng ka FB cahmai ah siseh, ramchung ka hawile aw-an in ramdang ah kal an duhnak kong, ralkap uknak tang ah um an duh bak lonak kong kha an kan chimh. Ka theihthiam ngaingai. Ramthumnak a ummi nih rak ra hlah u, ti awk nih ahar ngai ve fawn.

Hi bantuk ruang ah minung pumpak in ka zoh tikah CNF cathanh cu Chin minung kal duhnak kham bantuk a si kho men. Nain, Chin mipi aw-an a si ahcun phundang ngai a si hnga. Hi hmuhning ah ka duh deuhmi hmuhning ka hun i thim ahcun hmuhning 1 hi a si. Rak ruat cio u, kan miphun kong a si. Zeidah kan miak deuh lai tin ruah aherh. Credit: Chan Bik Ceu