Mindat ah Myanmar Ralkap le Mipi an i Kap Cuahmah

Mindat ah Myanmar Ralkap le Mipi an i Kap Cuahmah
———-
Nihin zanlei sml. 3:30 hrawng in Mindat khua ah mipi le Myanmar ralkap karlak kahdohnak a chuak i atu zong i kah thawng a dai rih lo. Kahdohnak a chuahnak zawn hi Golf Club lei Kyi-Lay-Kyi (ကြီးလေးကြီး) timi datsi zuarnak dawr pawng hrawng ah a si. April 24 zaan zong ah Mindat le mipi karlak ah kahdohnak a chuak i ralkap lei in hliamhma a pumi a um hna.

Mindat Kahdohnak ah Ralkap Hliamhma a Pumi an Um. April 24, zaan sml. 9:30 hrawng in Mindat khua ah Myanmar ralkap le mipi karlak kahdohnak a chuak i ralkap lei in hliamhma a pumi an um hna, tiah thawng kan theih. Mindat khuami pakhat nih, “Ralkap uknak a duhlomi mipi le Myanmar ralkap karlak ah kahdohnak a chuak. Ralkap lei hliamhma a pumi pawl sizung ah an thlopbul hna. Mipi lei in minung 3 tlaih an tong,” tiah a chim.

April 24 chun ah ralkap nih Mindat mino 7 an tlaih hna i, tlaihmi pawl thlahpiak ding in Mindat mipi nih zaan ah halnak an tuah hnu ah kahdohnak a chuah hi a si.

Relchap, Chinland Defense Force (CDF) Timi Hriamtlai Bu Thar an Dirh. Chin ramkulh chung peng/myone 9 huap in Chinland Defense Force (CDF) timi ralkap bu cu April 4 ah kan dirh, tiah CDF nih nihin April 25 ah cathanh an chuah.
“Ralkap uknak kan cohlang hrimhrim lo, tlaih a tongmi vialte thlah dih hna u, Chinram ah Chin phungphai in kan i hruai lai, mipi cung ah Myanmar SAC ralkap nih pehzul in namnehnak nan tuah ahcun ningcang phunphun hmang in i runvennak ah kan in doh ve hna lai,” tiah cathanh ah an ttial.

Tu thla chung thotho ah Falam lei ka unau hna hruainak in Chin National Defense Force (CNDF) timi hriamtlai bu an dirhnak kong thawng an rak thanh ve cang. Chin ramkulh chung ah hriamtlai bu 4 an hun um cang: CNA, ZRA, CNDF le CDF hna an si. Credit: The Chin Journal.