Min Aung Hliang Nih Kum 2022 Caah A Chunmang A Chimmi cu A Mak Ko?
Min Aung Hliang Nih Kum 2022 Caah A Chunmang A Chimmi cu A Mak Ko?
========
Kum 2022 kumthar ni ah Pu Min Aung Hlaing nih mipi sinah biacahnak le biachimnak a tuah i a tang lei bantuk in 2022 chung ah tuah ai timh mi pawl cu a phuan hna.
Kum 2022 chung ahhin kan ram buainak kong ah remdaihnak ser kan i zuam lai. Ram buainak kong he ai pehtlaimi phu vialte hi biaruahnak kan ser lai i remdaihnak ser khawh kan si zuam. Cucu mipi dihlak kan tuanvo a si caah i zuam cio hna usih tiah a chim.
Cu pinah remdaihnak kan ser khawh in kan ram thachonak le kan ram ah Federel Democracy a len khawhnak ding ah biatak tein tuan chuah khawh kan i zuam lai tiah Min Aung Hlaing nihcun a chim.
Kawlram ah ralhrang nih uknak an lak kum khat a tling cang lai. Kum khat chung ah minung tamtuk an nunnak a liam i minung tamtuk hliam an tuar. Thong an tla. Anmah Kawl ralkap hrimhrim tamtuk an thi i hliam an tuar. Mipi lei ralkap zong tamtuk an thi i hliam an tuar. Meithal le hriamnam cawknak ah phaisa tamtuk a dih.
Ralhrang nih uknak an lak ruang ah covid mizaw zohkhenh khawhnak a um ti lo caah covid in minung tamtuk zong an nunnak a liam. Riantuannak company vialte a rawk dih. Riantuan khawh a si ti lo. Cu caah Kawlram mipi cu sifahnak khur ah kan lut i vawlei cung ah a sifak pawl ram ah kan hun thla than cang.
Ramchung hmunkip ah kahnak a chuak i buainak a chuak. Sualnak ngei lo nunau le khuami tamtuk ralhrang nih an thah hna. Inn tamtuk ralhrang nih an khangh. Umnak ngei loin minung ting tampi ramtang ah khau an sa hna.
Kum khat chung ah Kawlram mipi fak tuk in kan tuar. A tu 2022 chung ah zeitluk in mipi kan tuar rih lai. Mah nak fak hin kan tuar rih lai. Cu caah a si khawh ahcun Min Aung Hlaing nihhin a lungthum sehlaw remdaihnak tuah i Federal Democracy cu si hram sehlaw a tha ko.
Zapi Sin Nawlnaknak le Ralrin Ding Thawngthanhnak; Ralhrang hna nih hriamnam bochan in uknak chuh an kan timh caah mizapi zalonnak, nawlngeihnak le mahte uknak nawl a tanhtu hna nih nunnak thap in dothlennak kan tuah cuahmah. CDF-Hakha zong Hakha peng mizapi caah siseh, Kawlram pumpi caah siseh, hmailei tefa hna ca tiang in siseh, dinnak a kawlmi bu a si. Kan miphun le ram caah tih a nungmi ral paohpaoh dothlen ding le miphun le ram caah thiltha chuahpi ding in nunnak kan thap cang. Ram le miphun caah na ruahnak thinlung, na chawva le thazaang chuah ve ding in kan in sawm.
Cucaah a tanglei ah langhtermi kan miphun le ram caah tih a nungmi vialte dothlen lio caan ah tuah lo ding le dotlami mizapi cozah a kai tiang hngak rih ding in Hakha peng mizapi dihlak kan in nawl hna i ralrin ding in thawng kan in thanh hna.
1. Dotla lomi ralhrang cozah caah zungkai le riantuan siseh, chawva le thilri in bawmh siseh, phung ning loin pekmi lak ti bantuk hman lo ding. 2. Dotla lomi ralhrang cozah nih lemsoinak ah an hmanmi nawlngeihnak, chawva, tender le project pawl lak le tuan hman lo ding.
3. Cozah zung hna cu mizapi ta a si nain ralhrang nih hriamnam hmang in an kan chuh i an duhning paoh in riantuannak ah an hman caah mizapi nih fuhpanh lo ding, license le a dangdang phung ning lo in tuah hman lo ding.
4. Ralhrang ralkap nih chuah/tuahmi cawk/zuar asiloah hman lo ding.
5. Dothlen lio caan ah upadi um lo bantukin duh paoh in mizapi hnahnawhnak chuahpitu thil tuah/cawk/zuar, inn le lo hmun samh/cawk/zuar, thingram le ramsa sawksam, ningcang loin a miak kawl, khuasak le midang cungah thil tha lo tuah, tukvelh, firtlei le aa dawhcah lomi thil tuah ti bantuk hman lo ding.
6. CDF min hman riangmang in mizapi le khualtlawngmi hnahnawh le thil hal/chuh, ralkap uniform hruk, hriamtlaih, chawhvah, mah nawlngeihnak le chawva kawl ti bantuk hman lo ding.
7. Dothlennak minung hna pumpak min cawi in siseh, dothlennak he pehtlaiin thil a cangmi pawl kongah tuanvo ngeitu theihpinak tel loin siseh, chimrel, catial le langhter ti bantuk hman lo ding. A cunglei mizapi sin nawlnak he pehtlaiin nawl ngai lomi cungah thil pakhatkhat a can ahcun ralrin pek cia a si tiah ruah a si lai. Chinland Defense Force – Hakha