Min Aung Hlaing zong pumpak in ka hua lo i DASSK zong ka hua lo!

Min Aung Hlaing zong pumpak in ka hua lo i DASSK zong ka hua lo!
============
“Min Aung Hlaing zong pumpak in ka hua lo i DASSK zong ka hua lo. Asinain Kawl pawl ramkhel cu a zumh hrim hrim ka zum hna lo. Kan ram buainak hi zoh uh a hram cu ralkap in aa thawkmi a silo. Nihin rampi buainak a innkillung taktak cu Kawl Politicians pawl riantuannak in aa thawkmi a si. Miphun dawpdolh duhnak lungthin ah hram a bunhmi buainak a si.

1947 Feb ah ramkomh (Union) dirh dingin min kan rak thut nain September ah a rawk colh. 1947 Phunghram kha Union phunghram a silo Unitary phunghram a si. Kan ram ah hriam a tlaimi zoh hna uh. Karen-1949, Shan-1958, Kachin-1961, Chin-1961…Khah hi pawl vialte hi ralkap uknak a chuah hlan Parliamentary Democracy lio tein hriam a tlai i dothlennak a tuahmi miphun kan si.

1956-1958 kar kum thum chung Chin Miphun Pi Ni (Chin National Day) a rak tlau/thi hrulh khah. Khakha ralkap uknak chan ah a silo. Kawl party he aa kommi Chin Hill Congress Party (Pu Za Hre Lian) te chan ah a si.

Hi vialte mithmuh kuttongh thil kan ton cangmi ruangah kei cu Kawl politics paoh paoh hi ka zum kho ti lo. Cucaah ka fale daihnak ca min kan thut lai, remnak kan ser lai, cucu kan in tuahpiak hna lai kha kha kan in tuah piak hna lai tiin Dothlennak hi Ramkhel muisam lei in an mer sual ahcun zeitik hmanh ah vun izumh in zul sual hna lai ucih!

Ho dothlennak lam in hnu na kir ni cu Ram le Miphun caah a nunnak a pe ciami na hawile an luruh na lamh ni le na hmailei nunnak lamthluan le ruahchannak vialte na sunghdih Ni a si ti kha va philh hlah”. By-Rev. Dr. Lawha Ling (GS-CBC)

Nihin Zinglei Lihninh ruang ah Lungcawi Biakinn a Rawk. Nihin November 26 zinglei sml. 6:15 hrawng ah a cangmi lihninhnak ruang ah Hakha he meng 50 hrawng a hlatnak Lungcawi khua i Believer Church biakinn ah rawhralnak a um, tiah Khrihfabu pastor sin in thawngpang kan theih.

Lungcawi Believer Church ah pastor a ttuahmi Saya Van nih, “Li aa hninh ning a fak hringhran. Kan khua thing inn pawl cu an i thui dih ko. Sau deuh i hnin sehlaw zeidik kan lawh hnga,” tiah lihninh a fah ningcang The Chin Journal ah a chim.

Lihninhnak ruang ah Believer Church biakinn pulpit cunglei tlakrawh a cim i pulpit zawn ah a vung tla. “Pulpit cung i tlakrawh rualmi a cim i celling a pemh hnu ah pulpit zawn ah a tla. Thudan cheukhat le thilri cheukhat an rawk,” tiah a chim.

Hakha khuami hna zong nih lihninhnak fak ngaiin an theih ve. “Nihin zinglei lihninh cu a vawr bak in a kan vawr ko. Inn a rawkmi zong an um kho men. Aa hninh ning a fak tuk,” tiah Hakha khuasa pakhat nih a chim ve.

Lihninhnak kong he pehtlai in Myanmar khuati zung nih “Hakha he meng 10 a hlatnak Nitlak-Chaklei zawn ah 6.0 Magnitude lihninhnak zinglei sml. 6:15 ah a chuak,” tiah report a chuah ve. US Geological Survey zong nih Hakha pawng ah 6.1 Magnitude lihninhnak a chuak, tiah a langhter ve.

Yangon Bomb Puahnak ah Laimi Pakhat Hliampu, Pastor Pakhat Tlaih Tong ve. Nizaan November 25 ah Yangon ramtthen, North Dagon sang no. 38, Tapin Shwehti lam le Maha Bandula lamton ah a ummi inn pakhat ah bomb a puak i Laimi pakhat hliamhma a pu ve, tiah thawng kan theih.

Bomb puah ruang ah Falam peng mi Johnson Van Biak Lawm, Kyaw Thiha le Aung Khant Paing hliamhma an pu i, Kyaw Thiha cu sizung ah a nunnak a liam. Bomb a puahnak inntek chungkhar zong SAC ralhrang nih an tlaih dih hna.

Tlaihmi lak ah kum upa tar pakhat le COVID-19 sii chunh ding in a hngakmi pastor pakhat zong aa tel, tiah thawng kan theih. SAC ralhrang thawngzamhnak MWD nih cun bomb an sernak ah a puak, tiah a langhter. Credit: The Chin Journal