Min Aung Hlaing Ralhrang Phu Cu Lungrawk Bak An Si, A Zum Zumh Lo Ding Bak An Si!

Ralkap nih Hramhram Uknak Caan Thla 6 An Chap
==========
Post Staff| 2022 January 31 — National Defense and Security Council meeting chung ah caan karlak President U Myint Shwe nih February thla 1 ah kum khat a tling ding mi hramhram in Caankar Ralkap uknak (State Emergency) laak caan thla 6 sauh chap ding thanhnak an tuah.

Ralkap hruaimi SAC meeting ning in rampi Prime Minister nih a chuapimi (propose) ah mi tam deuh hnatlaknak in kan khiah tiah kawl ralkap thawngzamhnak channel a si mi MRTV nih zaan suimilam 8, January 31 ah thawngzamhnak ah a tuah.

2008 phunghram Dal 417 ning tein uknak kan lak hi a si i cu chung ṭhiamṭhiam ah ralkap nih kum 1 in kum 2 tiang (thla 6 in voi 2) uknak a samh khawh tiah ṭial a si. Kawl ralkap nih 2021 February 1 ah State Emergency in uknak kum khat a lak tiah thawng a rak thanh i ram pumpi in duhlonak langhter a rak si.

Cun, hramhram uknak lak thla 6 a rauh hnu ah Min Aung Hlaing nih 2023 August tiang kan peh rih lai tiah a thanh chap. Atu ahcun, Kawl ralkap nih hramhram uknak an samh hi kum 3 le thla 6 tiang a rau lai tinak a si. NUG a cozah nih 2008 phungram cu kan cohlang ti lo, kan hrawh cang tiah March thla ah thanhnak tuah a si cang. Nain, Kawl ralkap nih cun 2008 phunghram kha tlaih in uknak caan a chap lengmang hi a si.

Thawng Bul-tan: Kanpetlet Kahdohnak, Chin ramkulh ah Ralkap mawtaw an kai. 2022 January 31 ah Kanpetlet khuapi, Peng fimcawnnak zung (မြို့နယ် ပညာရေးရုံး), Yan Aung pura le Peng uknak zung (မြို့နယ်အုပ်ချုပ်ရေးမှူးရုံး) ah hmunhma a la mi Kawl ralkap pawl cu CDF-Kanpalet nih an kah hna tiah thawng kan theih.

Zinglei suimilam 6:30- 8:00am tiang suimilam 1 chung kahdohnak a chuak i Kawl ralkap lei in 3 an thi. Nain, kanmah CDF-Kanpetlet lei in hliamhma a pu mi kan um lo tiah CDF-Kanpetlet nih cathanh a chuah. Ralkap mawtaw 32 Chin ramkulh ah a kai.

Kalay khuapi in Chin ramkulh lei ah Mawtaw nganmi 21, a fa mi 3 cu facang tampi le ralkap tlawmpal he January 31, zingka suimilam 9 le cheu hrawng ah Khaikam khuapi an tan, an lonh tiah zalen thawngzamhnak nih a thanh. A dang tein CDF Matupi nih, Mine bom lei tuanvo ngeitu pakhat a thi tiah, ca nambar 5/2022 in January 30 ah thanhnak an tuah.

Falam ah CDMers an tlaihmi chung in 6 an thlah hna. Chin ramkulh Falam khuapi chung ah Kawl ralkap nih January 25 zaan ah CDMers pawl an tlaihmi hna 7 chung in 6 cu thlah an si cang tiah thawng theih a si. January 28 ah khan 3 an thlah cang hna i atu January 29 ah 3 an thlah chap hna tiah khuami nih the Chinland Post ah a chim.

A tangmi 1 balte hi halding kan ngei rih an ti caah an thlah rih lo tiah theih a si. An tlaih mi hna chung ah hin Non-CDM pakhat zong aa tel tiah Zalen nih a thanh. 2021 February 1 thok in hramhram uknak lak a si hnu ah zung kai lo in a nuarmi (CDM) hna chung in phuah a tong cangmi zong an tam ngai cang tiah theih a si.

NUG nih September ah report a chuahmi ning ahcun, mizapi (cozah) ca riantuanmi 417,060 nih ralkap tang ah tuan kan duhlo tiah an nuar, CDM an tuah cang. Cun, Ralkap 2,000 leng le Palek 6,000 leng nih CDM an tuah tiah a thanh.
Hitin CDM an tuah ruang ah, Ralkap hramhram uknak a hmangmi nih 295,802 mizapi (cozah) riantuantu cu an rian in an dinter hna, an phuah hna.

Cun, a tlawm bik 3,622 hi penal code 505 (a) in tazacuai in thongthlak or thlakding ah kawl an si. NUG report ning ah, hiti mitam tuk nih CDM an tuah tik ah vawleicung pi in Kawlram mi vialte nih bawmhnak hun tuah a si i, a tu ah tlawm bik CDM bawmtu phu 147 tluk a um tiah theih a si.

Falam Khua ah CDMers an tlaih mi hna an thlah dih cang hna. Chim ramkulh, Falam khua i January 25 zaan ah an tlaih mi hna cu an zaapi in an thlah ṭhan cang hna tiah theih a si. “January 25 zaan ah Kawl ralkap nih CDMers 7 an tlaih hna mi chung in January 28 ah 3 in khuah khat, January 29 ah 3 in khuah khat le a hnu bik January 31 ah 1 tiah an zaapi tein an thlah cang hna tiah thawng kan theih.

“A hnu bik an thlah mi pakhat hi Kawl ralkap nih an zumh deuh lo caah le a sin in thawng an duh mi hna an ngah khawh ruang ah a si men lai” tiah khua mi pakhat nih The Chinland Post ah a chim. Credit: The Chinland Post