Sagaing Ramṭhen, Samon Khua Um PDF Hna Meithal Le Zen-Kuan Vialte SAC Ralkap Nih An Laak Dih!
==========
Sagaing ramṭhen, Sagaing peng, Samon khua ah a ummi PDF hna meithal, zen-kuan le an motor cu June 29 ah kan lakpiak hna, tiah SAC nih an thanh pinah PDF lei zong nih SAC ralkap nih an kan luhhnawh i kan hriamnam an kan chuh, tiah an langhter ve.
PDF sakhan cu SAC ralkap nih an luhhnawh hna lio ah nu pahnih zong an nunnak a liam, tiah theih a si. Nu pahnih thihnak kong he pehtlai in SAC nih fianternak le thanhnak an tuahmi zeihmanh a um lo.
“Samon khua um PDF hna hriamnam le zen-kuan a lakpiaktu SAC ralkap pawl cu Samon khua ah a um ti lo, kadang ah rallam an sial cang. A luancia ni tlawmpal ah PDF a bubu in a thattu SAC ralkap kha an si,” tiah PDF ralkap pakhat nih BBC ah a chim.
Thailand Myanmar Embassy Zung Hmai Ah Min Aung Hlaing Chiatserhnak Tuah An Timh! Thailand ram Bangkok Myanmar Embassy zung hmai ah Min Aung Hlaing chiatserhnak le SAC duhlohnak ah, Thailand phan Myanmar mi hna nih thilthuam nak i hruk in lam zawhnak tuah an timh, tiah theih a si.
A ra laimi July 3, chun suimulam 1:00 in zaanlei suimilam 3:00 tiang Min Aung Hlaing chiatserhnak cu tuah timh a si i, cuka hmun i a kal kho mi poh nih Min Aung Hlaing thih hnu pin lei ca ah chiatserhnak bia chimcio ding in le a nak mi thilthuam i hruk ding in thawng an thanh.
Sagaing Peng In Ni 5 Chungah PDF 31 Le Tualchung Mi 5; An Dihlak Minung 36 Thah An Tong! Sagaing ramṭhen, Sagaing peng ah rallam a sialtu SAC ralkap nih June 25 – 29 tiang ah PDF telh in tualchung mi 36 an thah hna, tiah tualchung mi hna nih an chim. SAC ralkap nih hin PDF chungtel 31 le tualchung mi 5 an thah hna, tiah theih a si.
June 29, zinglei ah Sagaing peng, Samon khua cu SAC ralkap 50 leng nih hriamngan le hriamhme kah buin an luhhnawh i hriamngan hliamhnak in tualchung mi 2 an nunnak a liam pinah khuami 2 hliamhma an tuar, tiah khuami pakhat nih a chim.
June 28, zinglei ah Sagaing peng, Sintgaing khua pawng ah SAC ralkap le tualchung hriamtlai phu kar kahdohnak a chuak. Cu kahdohnak ah cun PDF 14 mei khangh in an thah hna pinah meithal zun 12 an laak, tiah tualchung hriamtlai phu chungtel pakhat nih a chim.
June 25, zinglei zong ah SAC ralkap thazaang 50 hrawng nih Kintaw khua pawng ah PDF nih caan karlak umhmun an khuarnak sakhan cu an luhhnawh hna i PDF 17 an thah hna, tiah Sagaing peng PDF lutlai pakhat nih a chim. Cu hnu ah Kintaw khua mi Ko Myint Kyaw Tu(kum 37), U Maung San(kum 50) le Myinsi khua mi U Pauk Sa(kum 69) cu SAC ralkap nih an thah hna, tiah tualchung mi nih an chim.
REMNA NI: Kum 20 chung hriam a tlai mi Mizo le India Cozah remdaihnak Ni. Nihin June 30 hi kan unau Mizo nih ‘Remna Ni’ an ti mi ni sunglawi pakhat a si i, a sullam cu ‘Remdaihnak Ni’ ti a si.
‘Remna Ni’ 1986 kum hnu in kum fatin cozah zung vialte an i din i, pengkip ah sunglawi ngai in an lawmh tawn. Atu kum, 2023 hi Remna Ni vawi 38 nak a si i, Aizawl khuapi Vana Pa hall ah hlunghlai ngai in lawmhnak tuah a si. Hi lawmhnak caan ah hin Chief Minister Pu Zoramthanga nih a telpi hna lai.
‘Remna Ni’ chuahnak hramthawk: 1959 kum ah khan Mizoram ah Mangṭam a rak tlung i, cucu Mautam kan ti mi kha a si. Hi lio ah hin Mizoram cu state siloin Assam state tang ah an rak um i Mizo Hills Region ti a rak si. Cozah nih ṭam a tuar cuahmah mi Mizo Hills a zohkhenh ning ah Mizo hna cu an lung si lo tuk i, ṭam a tuar mi hna zohkhenhtu ding ah ‘Mizo National Famine Front’ timi cu an rak dirh.
1961 October thla ah ‘Famine’ timi zawn te cu an hlonh i, Mizo National Front(MNF) ti a si. An i tinh mi cu hriamnam tlaih in Mizoram independence chuahpi i, Greater Mizoram dinh a si.
Mizoram cu buai hram aa thawk cang caah 1967 kum ah khan MNF cu India cozah nih tapung(outlaw) ah a phuan. 1971 kum ah culio India prime minister Indira Gandhi le Mizo district council palai hna cu an i tong i, Mizo lei nih State cozah pek an rak hal.
An halnak cu ṭha tein tuaktan a si hnu ah January thla 1972 kum ah khan Mizo Hills cu Union Territory(UT) ah rak cohlan a si. Kum 14 a liam hnu June 30, 1986 ah phungning tein India cozah le MNF cu minsen thutnak an ngei i, MNF vialte nih an hriamnam an chiah.
Hriamnam an chiah hnu in ‘Mizo Hnampa’ tiah auh mi MNF dirhtu Pu Laldenga cu Mizoram State Chief Minister rian khinh a si. February 20, 1987 kum ah khan Mizoram cu India ram state 23 nak ah cohlan a si.
‘Remna Ni’ hi Mizo mi hna ca ah ni sunglawi tuk a sinak cu kum 20(1966-1986) chung hriam an tlaihnak theipar a chuahni a si. Cu kum 20 chung ah cun pasalṭha tampi nunnak a liam i, nungak dawhdawh Kala ralkap nih an tlaihhrem hna. Khuatlang upa hruaitu hna cu ralkap nih an hrem hna, an rak teem tuk hringhran. Cu bantuk vialte harnak an intuar hnu ah atu i Mizoram kan timi a zalong mi state cozah hi an hmuh. Credit: The Chin Post