SAC Kutchuak Zu Le Beer Telh In Thil Phun 8 Cu Duhlohnak Langhter Hram Thawk A Si!
==========
“SAC kutchuak zu, beer le kuak(cigarette) telh in thil phun 8, SAC tangka luhnak cu zatuak 70 tiang zorchuk dingin duhlonak langhter hram kan thawk cang,” tiah duhlonak langhtertu phu – General Strike Coordination Body(GSCB) hruaitu Dr. Tey Zar San nih Khit Thit Media ah a chim.
SAC tangka luhnak le chawlehnak an tuahmi dohnak ah tarno thlu lo in mizapi i tel ding in sawmnak an tuah. SAC nih an chuahmi thil phun 8 hna cu Myanmar Beer, Andaman Gold, Dagon, Mandalay, Black Shield Stout, Army Rum, Red Ruby le Premium Gold hna an si i mizapi nih cawk lo ding le hman lo dingin strike committee hruaitu nih a chim. “SAC kutchuak zu, beer le kuak(cigarette) hi an tangka luhnak hrampi pakhat a si ve.
Cu tangka an hmuhmi lila hmang in hriamnam le zen-kuan an cawk i rammi an kan thah, an kan nawnnak ṭhan,” tiah General Strike Coordination Body(GSCB) nih mizapi sinah theihternak an tuah. SAC nih an chuahmi thil phun 8 hna hi thla hnih chungah an tangka luhnak zatuak 70 tiang zorchuk dingin duhlonak langhter dingin GSCB nih timhtuahnak an ngei, tiah an langhter.
“Nunnak tiang pek in ral atu cuahmahmi PDF le EROs hna bantukin kan i pumpek khawh lo hmanh ah SAC nih an chuahmi thil phun 8 hna hi kan cawk lo le kan hman lo ahcun SAC hriamnam le zen-kuan cawknak kan bawmh hna lo bantuk a si. SAC tangka luhnak hrampi a simi vialte cu pakhat hnu pakhat in kan hrawh khawh nakding ah mizapi lungthin khat in kan ṭuanṭi a herh,” tiah GSCB nih forhfialnak an tuah.
SAC Ralkap Business A Si Mi Zuu, Beer, Kuak Thilphun 8 Phihnak In Ralhrang Tangka Lutnak 70% Zornak Lam Tuah Ding. SAC ralkap business tangka hmuhnak 70% ah ralkap ser Myanmar beer, Zuu, Kuak telh in thil phun 8 cu ramchung mipi nih hman ti lo in khap (boycott) tuah cio ding in Dr. Tay Za San nih Yangon Khit Thit Media ah a chim.
Myanmar Beer tel in an serchuah mi thil phun 8 pawl cu Myanmar ramchung mipi nih cawk le zuarh khap (boycott) ding mi ralhrang ser thil hna cu -Myanmar Beer (Andaman Gold) min Zuu, Beer, Cold Drink (Dagon) min Zuu, Beer, Cold Drink (Mandalay) Beer, Rum (Black Shield Stout) 6 (Army Rum) 7. Red Ruby kuak Premium Gold kuak “Pakhatnak ah SAC ralhrang business hrampi a simi Zuu, Beer le Kuak pawl an si.
Mah Zuu le Kuak in hmuh mi tangka a tam tuk. Ralhrang nih mipi tangka in hriamnam, kuan, zen, bomb an ser, mipi thahnak ah an hman ṭhan caah mipi vialte an kan thahnak hrampi a si mi ralhrang chuah Zuu, Beer le Kuak cu boycott tuah cio hna u sih. A ra lai mi thla 2 chung ah ralkap ser thil phun 8 business 70% a tla/zor ding in timh tuahnak ngeih a herh” tiah Dr. Tay Zar San nih a chim chap.
SAC Ralkap 2 Hriam He KNLA Sin Ah An i Fonh! SAC kuttang ah rian a ṭuan lio mi Lt. Sergeant pakhat le adang ralkap pakhat cu August 8 ah KNLA sin ah hriam he an rak i fonh tiah tiah a si. SAC nih hramhram in mipi a uk mi hna an zoh khawh ti lo ruang ah dothlennak a dih tiang KNLA he bawm in SAC doh ṭhan ding ah Brigade 44 kuttang Infantry 118 in Lt. Sergeant le adang ralkap pakhat cu KNLA sin ah an rak i fonh hi a si tiah KNU Dupla pengkomh nih cathanh an chuah. Cu mipi sin aa rak fonh mi ralkap 2 nih Commando Launcher, 60MM kuan 5 le MA-2 zuun 1, kuanbawm 5 le an rak i fonh caah KNLA nih Thai baht 50,000 veve laksawng an pek hna tiah theih a si.
SAC Ralkap Nih Mipi Inn 74,874 An Khangh Cang. Hramhram in uknak a latu SAC phu nih hramhram in mipi inn an khangh ruang ah 2021 May 1 in 2023 July 31 tiang ah ramchung mipi inn 74,874 a kang cang tiah Data for Myanmar nih August 8 ah cathanh a chuah.
Irrawaddy ramṭhen dah ti lo, adang ramṭhen le peng kip ah SAC ralkap le a kuttang phu pawl nih mipi inn pawl an khangh lengmang caah Sagaing ramṭhen ah inn tambik an khangh i mipi inn 57,503 a kaang cang. Cun Magway ramṭhen hi a pahnihnak a tambik an khangh mi a si i inn 11,026 a kaang tiah Data for Myanmar nih a langhter. Sagaing le Magway ramṭhen hnu ah Chin ramkulh nih a zulh i mipi inn 1,637, Kachin ram ah inn 1,398,
Mandalay ramṭhen ah inn 1,344, Taninthary ramṭhen ah inn 675, Karenni ram ah inn 421, Mon ram ah inn 229, Bago ni chuahlei ah inn 207, Shan thlanglei ah inn 187, Karen ram ah inn 158, Bago ni tlaklei ah inn 56, Rakhine ram ah inn 13, Shan chaklei ah inn 4 le Yangon ramṭhen ah inn 1 tiah mipi inn tam lengluang cu SAC ralkap nih an khangh cang. Data for Myanmar cu Myanmar ramchung ah SAC ralkap nih mipi innlo an khangh mi dirhmun kha 2021 May thawk in thla fatin ramṭhen, peng, khua, khuate kip inn kaang cazin ṭha tein a khawm mi an si.
Hpakan Ah Kaphnih Karlak Kahdohnak A Fah Caah Khuami 2,000 Leng An Zaam. Kachin ram, Hpakan peng ah SAC ralkap sakhaan 2 cu August 7 ah KIA nih an lak hnu ah SAC nih vanlei kahdohnak lawng siloin hriangan he fak ngai in kahdohnak a tuah tiah khuami hne le KIA lei nih RFA ah an chim. July 2 thawk in SAC ralkap 1,000 hrawng an rak phak hnu ah kaphnih karlak kahdohnak a fah hi a si.
Kyauktaga Kahdohnak Ah SAC Ralkap 30 Leng An Thi, Hriam Tampi Zong An Lak Khawh. Bago ramṭhen, Kyauktaga peng, Tamin-inkone khua, August 9 ah a cang mi kahdohnak ah SAC ralkap 30 leng an thi i tuni zing (August 10) tiang an ruak pawl an rak la rih hna lo tiah Kyauktaga PDF nih cathanh an chuah. Kahdohnak hi zinglei sml 4:00am in aa thawk i chun tiang kahdohnak a fah hnu ah SAC ralkap lei an sung tuk i hriam tampi zong an lak khawh tiah theih a si.
Kahdohnak chung ah PDF chungtel 1 zong a nunnak a liam ve tiah theih a si. Cu bantuk in kahdoh a fahnak Tamin-inkone khua ah zaan sml 6:00pm in zinglei sml 6:00am tiang mipi hna leng chuah lo ding, Tamin-inkone in Thuhtaykone lam zulh lo ding tiah KNLA nih August 9 ah ralrinnak a thanh. Kyauktaga peng chung ah SAC nih Internet line a phih tiah theih a si fawn.
Phyo Ah SAC Nih Hmunhma An Khuarnak Pawl Drone le Sniper In An Kah Hna I 5 An Thi. Bago ramṭhen, Phyo peng ah a um mi SAC ralkap pawl nih hmunhma an khuarnak le Ohphyat hlei SAC ralkap gate cu drone in bom an thlak hnawh hna leng ah Sniper in an kah hna caah SAC ralkap 5 an thi tiah NUG Ministry of Defense nih a thanh.
August 8 zinglei sml 9:03 hrawng ah Phyo peng, Ohphyat palek sakhaan a hnu lei ramlak ah a um mi SAC ralkap pawl cu Yoma Column 2 Drone phu nih 60MM bom lung 2 an thlak hnawh hna i SAC ralkap 4 an thi, 3 fak ngai in an i hliam tiah theih a si.
Cu ni zinglei sml 10:10am hrawng ah Phyo peng, Ohphyat hlei ah a um mi SAC ralkap gate cu KNLA le Yoma Column 2 phufonh nih Sniper, 40MM le meithal in an kah hna caah SAC ralkap 1 a thi, 3 fak ngai in an i hliam tiah NUG MOD nih a thanh.
Mizoram Um Myanmar Ralzaam Camp Caah ICA Nih Eiawk A Hlut. India, Mizoram chung ah a um mi Myanmar ralzaam camp pakhat ah eiawk a dih caah bawmhnak an hal hna i facang, chiti, le pe pawl an va hlut hna tiah Institute of Chin Affairs – ICA nih August 10 ah cathanh a chuah. Aizawl peng, Tuirial Myanmar ralzaam camp ah inn 24 in hngakchia, nu le upa tiah an zapi 80 leng an umnak sakhaan caah Rupees 30,000 leng August 8 ah an va hlut.
Tuirial ralzaam camp ah a um mi hna caah nifatin rian ṭuannak lam a um lo, bawmhnak a rak pe tawntu NGO, INGO le zatlang phu pawl a za tawk in an um ti lo caah caan a rauh ahcun harnak a tam chin tiah theih a si. Eidin leng ah, Si-ai le ahlan tein lung zawtnak he a rak phan mi an si caah Mental Support an herh i rian a har ruang le tangka luhnak a um lo caah sizung, siikhan hna ah an va i thlop kho lo tiah ICA Asst. Director nih Van Sui Sang nih Mizzima ah a chim.
Mizoram cozah nih Myanmar ralzaam hngakchia pawl fim an cawn khawh nak hnga a cohlan caah sianginn an kai kho ko nain holh lei ah an chanbau caah a kai kho mi hna nih Myanmar le Mizo ca pawl an hlei in an chimh khawh hna ahcun a tlamtling ngai lai tiah a chim.
Mizoram ah a um mi Myanmar ralzaam hna nih rianṭuannak lam a um lo ruang le ramdang bawmhnak zong a caancaan te lawng ah an hmuh caah caan rauh ahcun an har khun lai tiah theih a si. ICA nih Chin ramkulh, Falam peng chung ralzaam sakhaan 5 ca zong ah facang, chiti le pe pawl a hlut hna tiah cathanh chung ah an langhter. Credit: The Chinland Post