Nikhat Chung Lashio Le Kutkai Ah Kahdohnak Voi 3 A Chuak, Thlakhat Deng Kahdohnak Chung Ah SAC Lei 25 An Thi!
=========
Shan ram chaklei, Lashio peng le Kutkai peng nikhat chung ah kahdohnak voi 3 a chuak tiah Ta’ang National Liberation Army (TNLA) nih thawng a thanh. August 19 chun ah TNLA Brigade 4 hmunhma, Lashio peng ah mawṭaw 2 in a rak lut mi SAC ralkap pawl cu meng 14 an phak ah TNLA nih an kah hna. Cun Kutkai peng, Manpan khuate ah a um mi TNLA hmunhma khuarnak lei ah a rak lut mi SAC ralkap Sah-Kah-Khah 16, Infantry 242 le TNLA Brigade 5 kuttang B223 hna karlak ah kahdohnak a chuah hi a si.
Cubantuk in August 19 zaanlei sml 3:00pm hrawng ah TNLA Brigade 5 hmunhma, Kutkai peng ah Kutkai in Namphat lei ah mawṭaw 21 in thilri a phor mi SAC ralkap cu TNLA Brigade 5 kuttang B335 le 777 he kahdohnak a fak ṭhan. July in August tiang TNLA le SAC ralkap karlak ah kahdohnak voi 16 a chuak i SAC lei 25 an thi i an tlaih mi hna zong an um bantuk in hriam tampi zong an lak khawh tiah TNLA nih a thanh.
Naypyitaw le Magway Ramri Ah Kahdohnak A Chuak I SAC Ralkap Cycle 3 le Kuan An Lak Khawh. Naypyitaw, Tatkon peng le Magway ramṭhen Myothit ramri ah kahdohnak a chuak i SAC ralkap cycle 3 le kuan cheukhat an lak khawh tiah OPRF-PLA nih thawng an thanh.
August 20 chun sml 12:50pm hrawng ah Naypyitaw, Tatkon peng, Shwemagyi khuate le Magway ramṭhen, Myothit peng, Yokuma khuate karlak mipi pawl tangka hal ding in a ra mi SAC ralkap pawl cu OPRF-PLA nih an kah hna hi a si.
Kahdohnak min 30 leng a rau i SAC ralkap lei 4 an i hliam i 2 an thih leng ah SAC ralkap pawl sin in cycle 3, 5.56 kuan 25 le 5.56 kuanbawm 1 an lak khawh tiah theih a si. Kahdohnak a chuah hnu in OPRF-PLA nih kahdohnak hmunhma ah zohfelnak an tuah i him tein an kir kho ṭhan tiah theih a si.
Monywa Khua Pydaungsu Lamcung Ah A Um Mi SAC Ralkap Pawl Kahdohnak Ah 4 An Thi. Sagaing ramṭhen, Monywa khua pyidaungsu lamcung ah mipi sin in tangka a hal mi SAC ralkap pawl an kah hna i 4 an thi, hriam zuun 1 an lak khawh tiah Golden Eagle Force – Monywa sin in thawng theih a si.
August 19 zinglei ah Monywa khua, tar umnak inn chaklei ah a um mi pyidaungsu lam cung ah mipi sin in tangka a hal mi SAC ralkap 5 cu dothlennak phu nih an kah hna hi a si.
Kahdohnak chung ah Golden Eagle – Force phu hruainak in Punghna Guerrilla phu, Monywa pengkomh B24 (Monywa Ranger Group Truth Army), Kyeni (PLA), Brother Revolution Force – Monywa le Ka Naung Min Thar Gyi – Monywa hna an i bawm tiah theih a si.
SAC ralkap pawl nih 2021 May thla in 2023 July thladongh tiang mipi inn an khangh ruang ah Myanmar ramchung peng 30 ah a rawk mi inn cazin an langhter mi a si. Data for Myanmar nih a khawmhsuat khawh mi cazin ning ah, thla 27 chung ah mipi inn 74,874 SAC ralkap nih an khangh i Sagaing ramthen hi a tam bik an khanghnak hmun a si. Mipi inn a kang mi a tam bik nak peng 30 chung ah Sagaing ramthen chung peng 21 an i tel bantuk in, Magway ramthen ah peng 6, Chin ramkulh, Kachin ram le Mandalay ranmthen peng pakhat cio aa tel.
Nawl Lo In Ramdang Tangka i Chiah Ahcun Dantat A Si Lai Tiah Central Bank Nih A Thanh. Ramdang tangka kha License ngei lo in na chiah a si ahcun ramdang tangka hmanning tawlrelnak phungning in dantat nan si lai tiah SAC Central Bank nih a thanh.
2014 September 30 ah an rak thanh mi cathanh ah ramdang tangka hmanning tawlrelnak Article 15 ning in ramdang tangka 10,000 asilole mah nak a tam deuh mi ramdang tangka na cohlan ahcun thla 6 chung i chiahnak nawl na ngei tiah an rak thanh.
Thla 6 leng na chiah ahcun ramdang tangka hmannak License a ngei mi sin ah nan zuar lai i bank cazin chung ah nan khumh lai tiah an rak chim. Ramdang tangka tawlrelnak Article 9 ning ah, rianṭuannak License a ngei mi lawng ramdang tangka cawknak le chiahnak nawl an ngei i ramdang tangka le khualtlawnnak lehmah zuarnak nawl an ngei lai tiah Central Bank nih a thanh.
Central Bank Chairman Daw Than Than Swe nih August 19, Naypyitaw ah an tuah mi ramdang thil a luhchuak mi tangka peknak kong he aa pehtlai mi Meeting ah ramdang tangka thlennak he pehtlai in Online le Social Media cung ah langhter mi pawl zong dantatnak tuah ding an si tiah a chim.
Asinain August 21 zinglei sml 10:30am tiang USD $ 1 ah 3,700MMK a phan i USD $ 1 an zuar ahhin 3,819MMK tiang a phan tiah theih a si. SAC Chairman General Min Aung Hliang nih cun August 15, Russia ram ah an tuah mi a voi 11 nak MCIS – 2023 Conference ah ram cheukhat hna nih $ hi hriam ah an hman tiah a puh hna. Credit: The Chinland Post