Min Aung Hlaing nih vanlawng in kahnak in an ci ka hmih kho hna lai lo, kan tei kho hlei hna lai lo timi!!

Zeiruangah Ralkap hi ai hnawh?
=====================
By Salai BP: 2022 kum in ralkap hi an ba ngai nain raldoh ah an ba ngai nain khatlei cun an i hnawh ngai. Ralkap milu lei in thazaang nih an duhning in a tlinh ti lo tikah, an ngeihchun vanlawng le helicopter lawngte an hmang. A fawinak cun NUG i Defense driver simi tlangcung hriamtlai (EAOs) pawl kha biatak tein minchiat tuak loin ngaihthlem in kah le bomb thla ai la,

[Chinchiah: Ralkap nih cun minchiat cu zei ahcun a rel lo. Asinain, ngaihthlem in thlak tbk khi hlan ahcun a milu le hriamngam zoh in ai thlachiat]. Cu tikah, zaran cu kan lau pah. Biahalnak a chuakmi cu, zei ruangdah ai hnawh timi a si. 𝟐𝟎𝟐𝟑 𝐓𝐡𝐢𝐦𝐧𝐚𝐤

A fawinak cun ralkap nih nawlngeihnak hramhram in a lak lio ah thimnak ka tuah lai timi biakamnak a pek. Zaran nih cun a bia zei kan rel lo nain, nichuahlei [Asia] pawl nih cun thimnak zeitin a tuah lai timi an lung um ngai. 2008 phunghram ah thimnak hi kum 2 chungah tuah ding timi a um. A fawinak cun August 2023 khi ai cel.

Cu tikah, EAO pawl kha vanlawng in kah le thlak i tlerh ai tim. A fawinak cun, vanlawng in ka kah ruangah an ci ka hmih hna lai timi ai tuak theng lai lo, a si kho lo timi zong a fiang lai. Asinain, ka kah hna lai, an lau hnu ah biaruahnak [peace talk] ka sawm hna lai. An lung der ahcun an ra te ko lai timi ai tuak kho.

𝐇𝐚𝐰𝐢 𝐧𝐠𝐞𝐢𝐡 𝐥𝐨 𝐚 𝐩𝐡𝐚𝐧𝐠, A fawinak cun China, India, le ASEAN pawl nih cun kahdohnak dih zok seh, thimnak tuah zok seh timi an lung um. China cu ramchung ah Belt and Road Initiative siseh, adangdang investment siseh a ngeih tikah hriam buainak nih a hrawh lai timi a phang. Cun, hriambuainak nih drug siseh, human trafficking siseh a zualter lai timi a phang khun. Cu tikah tutan hriambuainak ah China nih Kawl ralkap cungah a lungtling lo, tiah tampi nih an chim. Cu lawng si lo.

ASEAN zong nih ralkap cozah (high-level) sawm loin meeting tam ngai a tuah. Zaran nih cun zei ai hlei lo tiah kan ruah men lai, nain ASEAN tuanbia ah um bal lomi a si. Russia lawng hi Kawlram buainak ah meithal (outdated tel in) man fak ngaiin zuarnak chance a ngeimi a si. Cu tikah, Min Aung Hlaing hi China kal loin, Russia ah atu le tu kalnak și.

Atu nai hrawng a hmanmi vanlawng zong hi Russia serhmi SU-30 si ti si. A fawinak cun election a tuah zok lo ahcun ASEAN siseh, China siseh, adangdang amah lei tthangmi pawl an lung ka dongh hna la timi a phang.

𝐌𝐢𝐧 𝐀𝐮𝐧𝐠 𝐇𝐥𝐚𝐢𝐧𝐠 𝐜𝐚 𝐭𝐡𝐢𝐧𝐩𝐡𝐚𝐧𝐠 𝐜𝐡𝐮𝐚𝐤 𝐤𝐡𝐨, Kawl ralkap hi Political Science ahcun Personalist Regime ti si. A fawinak cun, minung pakhat duhning kalmi, lemsoi zong har, mipi duhning zong ngai lo cemmi an si, ti si. Mah bantuk personalist regime hi hriam buainak, mipi sandahpiah, le sipuaizi a chiat tk ahhin hruaitu a tla tawn ti si.

Min Aung Hlaing nih nawlngeihnak a lak tikah, a bikin amah hruaimi ralkap pawl kha teinak hmuhpi a herh. Asinain, ralkap pawl ruahning lo tuk in thil a kal. Tlangcung party pawl hmunhma kan pek hna la timi a sinpi lo, mipi sandahpiah a chuak, hriamtlaibu an chuak. Ai zumh tuk mi China le ASEAN lila sin in a duhning thapeknak a ra lo.

Khatlei ah, hriamtlai pawl kha a tei kho hna lo. Cu tikah, 2023 thimnak lawng hi hriambuainak in chuahnak [Exit strategy] a tang. Thimnak a tuah khawh lo ahcun Min Aung Hlaing nih a hruaimi kum 2 cungah pakhat hmanh a tlamtling lo timi a chuak la (anmah ralkap chungah). Cu tikah, amah lila kha ralkap lubik non a tong kho. Crd-The Chinland Post

Russia He A Dikmi Biaruahnak Tuah Ding Ah Lam Kan On – Zelenskyy!!, Ukraine President Volodymyr Zelenskyy nih Russia ram he a dikmi biaruahnak ngei ding in lam kan on, tiah nizaan November 9, Conference on Climate Change meeting ah a chim.

Remdaihnak ser ding in Ukraine lei nih lam ong hna sehlaw a ṭha tiah President Biden nih a chim hnu in atu bantuk in Ukraine nih biaruahnak lam an vun on.

Atu bantuk in biaruahnak lam kan onmi hi Ukraine ram limhang ven kan duh ruang ah a si, tiah Ukraine National Security and Defense Council ṭuanvo ngeitu Oleksiy Danilov nih cun a chim. Ramdang hna sin in bawmhchanhnak kan herh ko rih a bik in raltuknak tank, vanlawng kahnak le Missile kan herh ngai, tiah Oleksiy Danilov nih cun a chim chap.

Magwe Ramṭhen Ah A Zaammi Kanpetlet Peng Mipi Hna Cu Eidin Kong Ah Thinphang In An Um!, Chin ramkulh, Kanpetlet peng in Magwe ramṭhen Saw leiah ralhrial in a zaammi, Kanpetlet mipi hna cu eidin kongah har a tong khomi an si caah thinphang in an um ko, tiah theih a si.
Saw peng ah ralhrial in a zaam ve mi Kanpetlet ralhrial pakhat nih cun, “ralhrial dirhmun kan phak tikah a zeilei pohin harnak kan tong ko.

A bik in eidin kongah lung rethei in kan um. Atu ahhin cun NGO nih bawmhnak a kan pekmi facang, chiti, tibantuk in kan i chang rih i, an kan bawmhmi a dih tik hi hnu pin leiah zeitin dah khua kan sak te lai i kan i cawm te lai ti ruah ahhin lungrethei a si ko,” tiah a chim.

SAC nih hramhram uknak an lak hnu in Chin ramkulh chung ah kahdohnak a chuah lengmang caah Kanpetlet peng chung in minung 3,000 tluk cu Magwe ramṭhen Saw lei ah an zaam hna, tiah theih a si. Atu ah cun Kanpetlet khuachung ah khua a sami hi inn 10 hrawng lawng an si cang i, an khua ning ti awk in Magwe ramṭhen, Saw lei ah an zaam hna tiah theih a si.

Tedim District Zung Honnak An Tuah! SAC nih District a pek tharmi Tedim District Zung cu nizan November 8 ahkhan Chin ramkulh Tedim khua General Administration zungah a honnak an tuah, tiah theih a si. Hi District zung onnak ah hin GAD lutlai, District Palik lutlai, District Immigration le khuanu khuapa hna nih an telpi hna. Tedim cu a luancia caan zeimawzat ah khan uknak latu SAC nih District a pek tharmi a si.

CDF- Hualngoram Nih Mipi Kalnak Lam An Remh! Chin ramkulh Hualngoram hmunram lam chia/ṭha lo mi cu CDF-Hualngoram nih an remh, tiah theih a si. Hualngo ramchung lampi remhnak ah khualtlawng mi le chawlettu hna nih anmah le sian tawk bawmhnak an pek hna i mah bawmhnak cun lam ṭha lomi hna cu an remh khawh, tiah CDF-Hualngoram sin in theih a si.

Paletwa Peng Ta-zuan-an Khua Ah SAC Ralkap Nih Thil Cawk An Phih! Chin ramkulh Paletwa peng Ta-zuan-an khua ah SAC ralkap nih thil cawk an sianh hna lo, tiah tualchungmi hna nih an chim. Ta-zuan-an khua cu a pawngkam khua hna nih eidin an cawkzalhnak khua pakhat a si i November 1 thawk in SAC ralkap nih thil cawk an phih caah tualchung mi hna cu eidin an harsa ngai, tiah theih a si. Paletwah peng ah cun ngapih ṭhohkhat ah kyats in 5000 an zuar i cu hmanh ah cun cawk ding a um lo, tiah theih a si.

SAC Van Ralkap Thazang Cuanhnak: Cunglei Kahdohnak Nih Teinak Caah Bia A Khiak Lai Lo, SAC nih biatak tein cunglei kahdohnak tuah an i timhmi kong cu kan ṭial pah lengmang cang. Camp Victoria kah an timhmi kong zong CHRO nih an Twitter ah an ṭialmi chirhchan in The Chin Post zong nih kan langhter cang. Tanglei kahdohnak ah a sung pengmi SAC nih cunglei kahdohnak dah ti lo bochan ding an ngei ti lo. Cucaah SAC van ralkap thazang kan theih tawk ka rak langhter!

SAC nih MIG – 29, JF – 17, Nanchang Q5, Chengdu J7 le Shangyan J6 hi 83 an ngei. Raldoh cawnnak le phun a chia deuhmi vanlawng 29 le bomb thlaknak vanlawng A5 tlawmpal an ngei fawn. Russia ah SU 30 vanlawng paruk le raldoh cawnnak vanlawng 10 an cah i SU 30 pahnih cu a phan cang. Asinain SU 30 vanlawng hi a tonghtham an thiam rih lo. Russia vanlawng khalhthiam hna nih an cawnpiak cuahmah lio hna a si.

China ah JF 17 16 le raldoh cawnnak vanlawng 50 an cah i cucu tuan ah a phan lai tiah zumh a si. Cun hriamnam le thilri dang phawrhnak vanlawng 25, MI 35 Helicopter 9 le zeica paoh ah hman khawhmi vanlawng 70 hrawng an ngei. SAC van ralkal hmunpi hi 10 a um. Atu tiangah Mingalardon, Hmawbi, Taungoo, Meikhtila, Magwe le Thadaoo van ralkap hmunpi in cunglei kahdohnak hi an tuahmi a si. Bomb an thlak tawnmi Pond 500 a ritmi an si. Pond 1,000 a ritmi hi voihnih thum cu an hman ve. Miakpi kuanfang a hmemi phun le 30 mah-mah seh meithal zong an hman ngai.

A cunglei hi SAC van ralkap thazang kan theih khawh tawk a si i mah nakin a tam deuh kho. Asinain a biapi deuhmi cu cunglei kahdohnak nih teinak caah bia a khiak kho lai maw ti hi a si. Vietnam ral kha 1955 in aa thok i 1965-1975 tiang, kum 10 chung US kha Vietnam ral ah aa tel. Vietnam ral cu Chaklei Vietnam le Thlanglei Vietnam i dohnak a si. Dimawkaresi (Democracy) a duhmi Chaklei Vietnam cu US le nitlaklei ram hna nih an bawmh i Kawmionit (Communist) a duhmi Thlanglei Vietnam cu Kawmionit ram nih an bawmh ve.

Vietnam ral lioah US ralkap nih cunglei kahdohnak an tuahmi zat hi nuai 5 renglo a si i bomb an thlakmi hi ralpi pahnihnak lio i ramkip nih bomb an thlakmi zat nakin a tam deuh ti a si. Vietnam ral lio i US nih vanlawng le hriamngan a hmanmi hna kha, kha lioah cun a ṭhabik timi an si. Asinain US nih cunglei kahdohnak biatak tein a bawmhmi Chaklei Vietnam cu April 30, 1975 ah ral an sung diam ko.

October 7, 2001 ah aa thok i August 30, 2021 ah a dihmi, kum 20 chung a raumi Afghanistan ral lio zongah US le a hawikom ram hna nih cunglei kahdohnak an bawmh. Hriamnam ṭhaṭha an hman. Afghanistan ral ah tangka an hmanmi dihlak US Dollar trillion tiang a phan. Asinain Taliban nih Afghanistan cu an lak ko.

Vietnam ral ah siseh Afghanistan ah siseh US nih hriamnam ṭhaṭha hmangin cunglei kahdohnak an bawmh hna nain an sung ko. US nakin a zeilei paoh ah a niam deuhmi SAC nih cunglei kahdohnak an tuahmi hi zeimawzat cu a bawmh khawh hna lai nain teinak caah biakhiaktu a si lem lai lo. A biapi mi cu mipi le dohthlennak ralkap hna hi ralṭha le lungrual tein i funtom a si. Mipi thazang hi SAC van ralkap thazang nakin a ṭhawng deuhmi a si. Crd-TCP