Min Aung Hlaing Nih Ramdang Thil Luhchuahnak Tam Ngai A Khar Cang
===========
SAC nih dollar an ngeihmi a tlawm tuk cang caah Min Aung Hlaing nih ramdang in thilphurhnak le cawkzuarhnak tam-u cu a khar cang, tiah theih a si. March 28, Naypyidaw ah rak tuahmi chawleh chawhrawlnak meeting No. 3/2023 ah Min Aung Hlaing nih ramdang thil lutchuak vialte phihkhar ding in nawl a rak chuah hi a si, tiah theih a si.
“Myanmar ram in a chuakmi thilri paoh cu ramdang in kuat ti lo ding. Cu leng ah Myanmar ram chung ah kan serchuah khawh lomi thilri lawng chekhlatnak tuah hnu ah ramdang in kuat ding,” tiah Min Aung Hlaing nih nawl a chuah.
SAC nih atu kar hrawng hi datsi le diesel cawkzuarhnak a ṭhumh deuh caah Myanmar ram chung ah atu le atu datsi a dih lengmang, tiah theih a si.
“SAC nih dollar an ngeih ti lo ruang ah ramdang thil lutchuak tam-u zong an phihkhar dih cang i Socialist chan ah an kan kalpi cang ko. Hihnu kum 1 ah cun ramdang thil lutchuak a dih lai i rammi nih fak ngai in harnak kan ton te lai,” tiah chawleh chawhrawlnak lei thiamsang pakhat nih a chim.
SAC nih nawlngeihnak an laak hnu in ramdang in Myanmar ram ah chawleh chawhrawlnak a rak tuahtu tampi nih, Myanmar ram an chuahtak cang. Cu pinah SAC cu USA telh in ram tampi nih chawleh chawhrawl phihkhamnak an tuah, tiah theih a si.
Magway ramṭhen, Aunglan peng, Kyaukkyar (ကျောက်ကြား) khua pawng ah a thithup in a ra mi Rohingya minung 13 hna cu motor cung ah SAC ralhrang nih an tlaih hna, tiah theih a si. May 2, zan suimilam 10:00 tluk ah minung 13 an tlaih hna i, motor khaltu pa le minung 9 an zaam nain May ni 3 zing ah Yangon-Mandalay motor lam hlun ah an tlaih ṭhan hna, motor a khaltu pa cu a zaam kho ṭhan, tiah tualchungmi nih an chim.
“Tlaihkhih a tongmi hna hi pa 10 le nu 3 (An zapi 13) an si, motor khaltu pa le Rohingya 9 an zaam nain 9 tu cu an tlaihkhawh ṭhan hna, motor a khaltu pa cu a zaam kho, mahka lam hi Rohingya a thlithup in an luhnak lampi a si caah an tlaihkhih lengmang hna nakzong a si” tiah tualchungmi pakhat nih a chim.
Aunglan peng ah tlaihkhih an si hnu in a zaammi Rohingya pa 7 le nu 2 hna cu May 3, zing suimilam 10:00 tluk ah Yangon-Mandalay motor lam ṭhing ah tlaihkhih ṭhan an si i, motor khaltu pa cu a luat rih. Tlaihkhih a tongmi Rohingya 13 hna cu Aunglan khuapi palik sakhan ah dantat an si cang, tiah ralhrang palik bawi pakhat nih a chim.
Sagaing ramṭhen, Homalin peng ah SAC ralhrang le Shanni (SNA) hriamtlai fonh nih umhmun an khuarnak sakhan cu Kachin hriamtlai (KIA) le PDF ṭangṭi phufonh nih May ni 4 zing an kah i, an laak khawh, tiah tualchungmi hna nih an chim.
“May ni 4 zing suimilam 4:00 tluk in zinglei suimilam 7:50 tluk tiang kahdohnak a chuak, Taung-U le Taungbuhla (တောင်ဘို့လှ) tiah auh a si i, Shanni hriamtlai (SNA) le SAC ralhrang fonh nih umhmun an khuarnak sakhan a si, Kachin hriamtlai phu (KIA) le PDF ṭangṭi phufonh nih an laak khawh” tiah an chim.
Tualchungmi pakhat zong nih “An sakhan an laak khawh tiah kan theih. Kutcheh bomb pawl, meithal pawl le hriamthil dang hna zong an laak chih tiah kan theih nain an laak khawhmi cazin tu cu fiang in kan theikho rih lo” tiah People’s Spring ah a chim.
Cu kahdohnak ah KIA, PDF ṭangṭi phufonh in hliamhma tuarmi an um hrawlo, ralhrang lei a thimi an tam, tiah tualchungmi nih an chim. May ni 3 zong ah Homalin pengchung ah ummi SAC ralhrang sakhan pakhat zong KIA, PDF ṭangṭi phufonh nih an laak khawh, tiah tualchungmi nih an chim nain KIA le ṭangṭi phufonh in thawngthanhnak an tuah rih lo caah thawng fiang theih a si rih lo, tiah People’s Spring nih a langhter.