Min Aung Hlaing nih Putin cu a Hmaichia lakin a tuah!

Russia Nih kan Ram Ah Ralkap Sakhan A Sa Kho Lo-Min Aung Hlaing
=========================
Myanmar ram ah Russia nih ral sakhan hrambunh in sak ding hi a si kho lo mi a si tiah Sputnik News nih biahalnak a tuah mi ah SAC ralhrang lutlai Min Aung Hlaing nih a chim. ” Kan ram i phunghrampi ningah Russia humhimtu vuanci nih hrambunh in ralkap sakhan a sak lai timi cu a si kho lomi a si.

Russia ram zong a si lo. Zeibantuk hriamtlai hmanh nih kan ram ah ralkap sakhan an sa kho lo. A sinain Russia ram cu kan ram i hoikom tha a si caah ram tualchung daihnak dingah humhimnak lei lawng in tuanti in an kan bomh khawh.” tiah a chim. Min Aung Hlaing cu August ni 7 ah Putin he tonbiaruahnak an ngei lai tiah kan theih.

Relchap, Sagaing Ramṭhen, Maungtaung Khua Cu SAC Ralkap Nih An Khangh, Khuami Pakhat An Thah, Sagaing ramṭhen Budalin peng, Maungtaung khua cu nizan September 5 ah SAC ralkap nih an khangh i hriamngan in an kah. Tualchungmi pakhat cu hriamngan kahnak in a nunnak a liam i midang pahnih zong hliamhma an tuar tiah theih a si.

Kotaw (ကူတော်) palik sakhan in a rak chuakmi SAC ralkap nih hriamngan le hriamhme he an kah i khuachung ah an lut, cu hnu ah inn 27 cu an khangh i, an duh paoh in innchung thilri an thlok, tiah theih a si. “SAC ralkap pawl cu ei awk an ngei ti lo i si lai, khuachung ah lut in ei ding an kawl. An duh paoh in hriamngan le hriamhme an kah caah tualchung hriamtlai phu lei cu hnu kan tolh,” tiah Golden Brothers phu in ṭuanvo ngeitu nih a chim.

“Maungtaung khua ah a rak lut mi SAC ralkap cu minung 20 hrawng an si i, hriamngan an kahnak ah tualchungmi pakhat a nunnak liam, pahnih hliam an tuar. Cu hnu ah SAC ralkap pawl cu Kotaw palik sakhan lei ah an kir ṭhan,” tiah ṭuanvo ngeitu nih cun a chim chap. Maungtaung khua hi inn 800 leng a um i Kotaw palik sakhan he meng 3 hrawng aa hlat. Budalin khua in meng 9 hrawng aa hlatnak ah a um mi si.

Sagaing Ramṭhen Homalin ah SAC Lei Ṭangmi SNA Nih Mino 20 Hngawng Tan In An Thah Hna! Sagaing ramṭhen, Homalin(ဟုမ္မလင်း) peng ah SAC ralkap lei ṭang, Sai Pyu hruai mi Shanni Nationalities Army(SNA) nih mino hna cu “PDF nan si” tiah puh in an hngawng an tan hnanak video an zamh. August thlachung lawng ah mino 20 nak tlawm lo cu hngawng tan in an thah hna, tiah tualchung hriamtlai phu le tualchung mi nih an chim.

SNA nih an hngawng an tan hnanak video cu Hkamti(ခန်တီး) pengkomh battalion 1 sin ah tualchung mi nih video an kuat hna, tiah Hkamti(ခန်တီး) pengkomh battalion 1 in ṭuanvo ngeitu nih a chim. “Homalin(ဟုမ္မလင်း) peng, Homalin – Phaungpin kar Nantnan(နန့်နန်း) khua umhmun khuarmi SNA brigade 753 in San Pyu hruaimi phu hna nih tualchung mi cu ningcanglo in an hrem hna i, an thah hna tiah tualchung mi nih an chim. Thah a tongmi hna cu mi zei an si fiang tein theih an si rih lo. Nantnan(နန့်နန်း) ah hmunkip in hlawhfa tampi an um i cu hna cu SNA nih kut an thlak hna.

August thla chung ah aho si theih rih lo mi minung 20 hrawng an thah hna i an ruak an hlohthlau hna,” tiah Hkamti(ခန္တီး) pengkomh battalion 1 in ṭuanvo ngeitu nih cun a chim. Homalin(ဟုမ္မလင်း) tualchung hriamtlai phu si mi HPDF 124 sin zong ah, SNA nih mino an hngawng tan in an thah hnanak kong he aa pehtlaimi video tampi an ngei. SNA cu SAC ralkap kuttang um pyusawhti hna he i fonh in tualchung mipi hna cu an thah tawn hna, tiah an chim. Khit Thit Media sin zong ah SNA nih tualchung mi hna an hngawng an tan hnanak video tampi a um ko nain, mizapi nih hmuh awk i zamh a rem lo caah an langhter lo, tiah KTM nih an ṭial.

Indonesia Ram Ah Oil Man A Kai Tuk Cang Caah Mipi Nih Duhlonak An Langhter! Indonesia ram uknak tlaitu cozah nih kum 8 ram an hruai chung ah Oil man a kai tuk caah le phaisa man a ṭum tuk caah an ram khuapi Jakarta ah minung 1000 reng lo nih nihin september 6 ah duhlonak an langhter. Ramchung ah phaisa tlap a tam tuk ruang ah phaisa man ngeihlonak(inflation) le Oil man cozah nih a tlaih khawh nakhnga Oil man zatuak ah 30 (30%) kaiter lo cun lamdang a um lo, tiah President Joko widodo nih september 3 ah khan a rak chim.

Milu nuai 270 umnak Indonesia ram ah hi bantuk timhtuahnak cu kan cohlan lo caah ram mipi hna nih a senmi muici le a engmi muici puan i lu tuam buin, cozah timhtuahnak cu kan lungtlinlonak kan langhter i cozah nih nihlawh (minimum wage rate) kaiter seh, tiah au buin lam kan zawh tiah duhlonak langhtertu hna nih an chim. Oil man kaimi zong niamter ṭhan ding in lamzawhtu hna nih cun cozah an hal.

Shwegu Peng Ah SAC le PDF Kar Kahdohnak A Chuak I SAC Ralkap 3 An thi, Kachin ramkulh, Bhamo pengkomh Shwegu peng, Tharyakone khua pawng ah SAC ralkap Khah Lah Yah 77 le Myo Hla PDF hna cu nihin September 6 ah an i kap, tiah theih a si. Cu kahdohnak cu minutes 15 hrawng a rau i, SAC ralkap lei 3 an thih pinah 5 leng hliam an tuar, tiah theih a si.

SAC ralkap hna cu KPDF battalion 1 Bo Moecu (ဗိုလ်မီုးကြိုး ) hruaimi phu nih an kah hna, tiah theih a si. Kahdohnak a dih hnu ah SAC ralkap nih hriamngan in Tharyakone khua cu an kah i, kum 60 hrawng a si mi tualchungmi pakhat hliam a tuar pinah inn 3 a kang, tiah theih a si.

Bago Ramṭhen, Paungde Ah Bomb Puahnak In SAC Ralkap 5 An Thi I, 3 Hliamhma An Tuar: Bago ramṭhen, Paungde(ပေါင်းတည်) peng, Waigyi(ဝဲကြီးဆည်) ah a ummi SAC ralkap hna cu September 6 ah PDF nih bomb an puahhnawh hna i ralkap 5 an thih lengah 3 hliamhma an tuar, tiah Paungde(ပေါင်းတည်) PDF nih an thanh.

Paungde(ပေါင်းတည်) peng, Waigyi ah umhmun a khuarmi, lamtonnak check gate a hngakmi ralkap 8 hna cu rawl ei ding in sakhan an kir lio, zing lei suimilam 11:30 hrawng ah bomb puah an tong, tiah theih a si. “Gate an hngahnak in rawl ei ding i an kir lio ah bomb lung hnih kan puahhnawh hna, bomb puahnak hmun ah minung 5 cu an thi colh i, 3 hliamhma an tuar,” tiah Paungde(ပေါင်းတည်) PDF in chimphuannak nawlngeitu nih a chim.

September, 5 Nikhat Chung Ah SAC Ralkap 24 An Thi, Thlakhat Chung Ah 1975 An Thi, Nizaan September 5, nikhat chung a cangmi kahdohnak ah SAC ralkap 24 an thi i, 7 hliamhma an pu, tiah NUG nih cathanh an chuah. NUG nih an langhtermi ralkap thi zat nakin kahdohnak hmun taktak ah a thi mi le hliamtuar mi cu an tam deuh kho, tiah an langhter chih. A luancia June 6 in July 7 tiang (thlakhat chung) ah SAC ralkap 1,975 an thi i minung 890, hliamhma an tuar tiah NUG nih cun an langhter.

SAC ralkap le tualchung hriamtlai phu kar kahdohnak chung ah fak ngai in Sagaing ramṭhen chung ah voi 4 kahdohnak a chuak i, Magway ramṭhen ah voi hnih a chuak. Mipi ralkap lei nih SAC ralkap biatak tein a doh kumkhat tluk chung ah hin SAC ralkap 15,000 hrawng an thi cang i, minung 4,800 leng hliamhma an tuar, tiah NUG cozah vuanci zung lei nih an thanh.

Cu langhtermi cazin cu 1 June, 2021 in 17 May, 2022 tiang khawmhsuatmi cazin in a si i, Myanmar ramchung hmunkip ah a cangmi kahdohnak ruang ah SAC ralkap chungtel a thimi le hliamhma tuarmi cazin kong ah SAC lei nih thawngthanhnak an tuahmi a um lo.

Sakhan Himnak Ding Ah Security Hngaktu Mingin PDF 2 Cu An Ruak In Hmuh An Si: Security hngaktu Mingin PDF 2 cu an tlau in ni 3 hnu ah an ruak in an hmuh hna kong Mingin tualchung hriamtlai phu pakhat a simi TDPDF(Mingin) nih cathanh an chuah.

A luancia September 2 ah khan Sagaing ramṭhen, Mingin peng ah SAC ralkap nih rallam an sial caah sakhan humhimnak ah ti in security hngaktu ding ah a kalmi Bo Mya Din le Bo Soe Min cu an tlau. An tlau nithum a rauh hnu nizan September 5 ah an ruak an hmuh hna.

Nunnak a liammi kan ralkap Bo Mya Din le Bo Soe Min hna hi kan i bochan tukmi an si, hriamnam sernak lei ah a hlei in ṭuanvo ngeitu an si pinah raltuknak zong ah ralṭha ngai in ralhmai ah a kalmi an si, tiah PDF chungtel hna nih an chim. “SAC ralkap nih rallam an sial hnu September ni 2 thawk in pehtlaihnak kan tuah kho ti hna lo i nizan lawng ah an ruak in kan hmuh hna,” tiah an cathanh ah cun an langhter. Ram ca nunnak a petu, SAC ralkap kut in nunnak a liam mi Bo Mya Din le Bo Soe Min cung ah kan ngaihchia tuk hringhran, tiah an cathanh ah cun an langhter chih.

Ukraine Tuknak Hman Ding Ah Russia Nih Hriamnam Tamlak N. Korea Sin In A Cawk! Ukraine a tu cuahmah mi Russia nih Ukraine ram tuknak ah Hriamnam tamlakte cu N. Korea sin in a cawk, tiah US hlathlaitu hna nih New York Times ah an chim. New York Times nih a langhter mi hi thil dik a si ko, tiah US ṭuanvo ngeitu hna nih cun an chim.

Russia nih Iran sin in a cawkmi khalhtu ngei lo raltuknak vanlawng zong Ukraine tuknak ah a hman, tiah thawngpang a rak leng ngai. Russia Ministry of Defense nih cun Ukraine tuknak hman ding ah N. Korea sin ah Missile, hriamngan hna tampi a cawk i hriamnam dang zong pehtlai in cawk chap a timh, tiah US hlathlaitu hna nih cun an chim.

Paletwa Ralzaam Hna Bawmhnak Pek Ding In Voi Tampi Kan Rak I zuam – WFP: Chin ramkulh, Paletwa pengchung ah ralzaam in a ummi hna bawmhnak pek ding cu SAC ralkap nih security fak tuk in an rengh caah voi tampi kan rak i ṭhulh, tiah World Food Programme(WFP) nih nihin September 6 ah an thanh. World Food Proggramme (WFP) nih Paletwa pengchung ralzaam 9,000 hrawng cu a luancia August thla in bawmhnak pek khawh an rak i zuam cang nain, atu September thla chung lawng ah an pekmi bawmhnak cu a phan kho, tiah theih a si.

Paletwa pengchung ah a cangmi kahdohnak le buainak ruang ah thilphorhnak lam a pit i, thil man an kai. Atu lio ah Paletwa pengchung ah hin ralzaam 20,000 leng an um i, tam deuh cu Paletwa le Sami khua ah an i dor hna. Cheukhat cu India, Mizoram chung ah a zaam mi zong an um, tiah ralzaam bawmhnak lei ṭuanvo ngeitu pakhat nih media ah a chim.

“Kahdohnak ruang ah cheukhat cu a khua ning in an zaam dih. Ramri lei ralzaam hna ca ah bawmhnak an ngah lo, khuapi chung ah ralzaam dirhmun in a ummi hna ca lawng ah bawmhnak pek a si. Paketwa le Sami khuachung ah ralzaam in a ummi dihlak hi minung 20,000 hrawng an si,” tiah ṭuanvo ngeitu nih cun a chim.

UNOCHA nih September 5 ah cathanh an chuah ning ah SAC ralkap nih uknak an lak hnu ah mah umnak hmun kaltak in ralzaam dirhmun a phanmi dihlak cu minung 974,000 an si. Cu hlan tlangcung hriamtlai hna buainak ruang ah ralzaam dirhmun a phanmi hi 330,000 an si caah ralzaam dihlak hi minung sing 13 renglo an si cang, tiah an langhter.

Mandalay Ramṭhen NLD Secretary Cu Kumhnih Thong Thlak Ding in Biakhiahnak An Tuahpiak, Mandalay ramṭhen, National League for Democracy (NLD) i secretary U Yin Tit cu phungrelnak cang, Section 25/30(a) in Obo(အိုးဘို) thonginn biaceih zung nih September 5 ah rianhrang ṭuan ding le kumhnih chung thong thlak ding in biakhiahnak an tuahpiak, tiah party zung he naihniam in a ummi hna nih an chim. Min langhter a duh lomi Party zung he naihniam in a ummi pakhat nih cun, “Thimnak tuah ni ah pengkomh zung hmai ah mibu in nan um” an ti hna ruang ah tazacuai an si, tiah a chim.

Mandalay ramṭhen Chief Minister Dr. Zaw Myint Maung he tazacuai an tonmi sualpuhnak pakhat cu 2021 December thla ah khan kum hnih chung thong thlak ding in biakhiahnak an rak tuah piak hna caah, a dihlak thong a thlak ding kum hi kum li a si lai, tiah party chungtel hna he naihniam in a ummi nih an chim. SAC ralkap nih uknak an lak thawk in, 5 May 2022 tiang ah NLD party chungtel minung 917 tlaih an tong cang, tiah NLD committee nih May 10 ah cathanh an rak chuah.

Chin Ramkulh, Paletwa Ralzaam Hna Cu World Food Programme Nih Bawmhnak An Pek Hna, Chin ramkulh, Paletwa ah, a luancia August thla thawk khan Arakan Army(AA) le SAC ralkap kar kahdohnak fak ngai a chuak i, motor lampi hna cu kahdohnak ruangah an phih dih hna caah, facang le eidin tirawl ah an harsa ngai. Cucaah, World Food Programme (WFP) nih bawmhnak kan pek hna, tiah an thanh. WFP nih cun Paletwa peng harnak a tongmi ca ah facang le vitamins phunphun an pek hna i, hi hnu zong ah hi nak tam in bawmhnak pek khawh kan i zuam ṭhan lai, tiah an langhter chih.

Paletwa ah hin ralzaam dirhmun a phan mi minung 9,000 renglo an um cang i, bawmhnak a phanmi facang le vitamins hna cu ralzaam hna sin ah cun phawtzamh ding in WFP nih an timhtuah lio a si. Cun, Paletwa lawng si loin, Myanmar ramchung ah ralzaam in harnak a tongmi vialte hna sin zong ah bawmhnak pek khawh kan i zuam cuahmah lio a si, tiah WFP nih cun an langhter.

Matupi peng, Phaneng Khuami Pakhat Cu, SAC Ralkap Nih An Thah Cang – Matupi peng, Phaneng khua nuva hna cu CDF-Matupi he pehtlaihnak nan ngei tiin a luancia July 28 ahkhan SAC ralkap nih an tlaih hna. An pa cu a luancia August 23 ah kan thah cang, tiah SAC ralkap nih biaceih zung ah thawng an thanh mi cu, thah a tongmi chungkhar hna sin in theih a si.

A luancia July 16 lio ahkhan, Matupi SAC hrambunh Khah-Lah-Yah 140 in ralbawi Than Naing Win cu CDF nih an rak thah. Cu kong he pehtlai in SAC ralkap nih khuami minung 6 cu an rak tlaih ve hna. “SAC ralkap nih Pu Thang Naw(ထန်နော်) cu a luancia August 23 ahkhan kan thah cang an ti i, a nupi cu an thlah ṭhan. Pu Thang Naw nih cun a fale 3 a tantak hna i, a fa upa bik cu, India lei ah a zaam,” tiah khuami hna nih an chim.

SAC ralkap nih an thahmi kan pa ruak thlahnak zong ṭha tein kan tuah ngam ti lo, tiah chungkhar lei nih an chim. SAC ralkap nih Matupi khuami hna cu an tlaih hna i, biaceih zung ah kua hmasa loin an thahmi hna hi, minung 4 hrawng an si cang. Cu chung ah Ngaleng khua Pastor pakhat zong aa tel.