Min Aung Hlaing nih Helicopter in kahdohnak an tuah ko nain a kuttang ralhrang tam ngai an thi thiamthiam!

Min Aung Hlaing nih Helicopter in kahdohnak an tuah ko nain a kuttang ralhrang tam ngai an thi thiamthiam!
=========
Khin U Peng Nitlak Lei Ah SAC Ralkap Nih Helicopter In Kahdohnak An Tuah Hleiah Khuachung Inn An Khangh Caah Kahdohnak A Fak I SAC Ralkap 10 An Thi! Sagaing ramṭhen, Khin U peng Kanbalu peng le Ye peng ai tonnak khua hna cu November 23, chunhnu ah SAC ralkap nih raltuknak helicopter hmang in kahdohnak an tuah hleiah kee ralkap hna nih khuachung inn an khangh tiah tualchung mi hna nih an chim.

November 23, chunhnu suimilam 1:53 ah SAC helicopter pakhat nih Khin U peng Munghlah khua, Ye U peng Pinsein khua, Kanbalu peng Kyisuh khua hna cu kahdohnak a tuah leng ah kee ralkap hna nih khuachung inn khanghnak an tuah hi a si.

November 22, ah Kyisuh khua khangtu SAC ralkap minung thazaang 200 hrawng nih nihin November 23, zinglei suimilam 8:8 ah Pinsein khua hlun in rallam an sial caah Khin U peng, battalion 3 LGRF le tualchung hriamtlai phufonh hna nih an kahdoh hna caah SAC ralkap 10 nak tlawmlo an thi tiah LGRF in tuanvo ngeitu pakhat nih a chim tiah theih a si.

Myinmu Bank Hngaktu SAC Ralkap Bomb Puahhnawh An Ton Caah Ralkap 5 Hrawng An Thi. Sagaing ramṭhen, Myinmu khua bank hngaktu SAC ralkap pawl zu an din lioah bomb puahhnawh an tong i, SAC ralkap 5 hrawng an thi, tiah theih a si. Nizan November 22 zan sml 7:35 ah bank hngaktu SAC ralkap 7 cu bomb in kan chehhnawh hna caah SAC ralkap 5 an thi, tiah Zero Guerrilla Battalion 7-Myingyan pengkomh Battalion Commander bawino Thet Kyi nih a chim.

“Myingyan khua lai ah a ummi Myanmar Economics Bank hngaktu SAC ralkap 7 cu zu an ding, cu lioah SAC ralkap 2 nih datmei in pawngkam an ceuh cuahmah i cu lio teah kutcheh bomb in kan puahhnawh hna caah SAC ralkap 5 an thih pinah 2 hliamhma fak ngai an pu,” tiah a chim chap.

Bank hngaktu SAC ralkap pawl cu Sagaing hrambunh Tatma 33 an si i, Myinmu khua chungah umhmun an khuar i mi tam deuh cu Myinmu sakhan chungah an um, tiah theih a si. Tutaj kahdohnak ah Zero Guerrilla Battalion 7 Myingyan le TRUE Fighter Companny 3 hna an i tel, tiah theih a si.

Mepe Dum Ah Humhimnak Lak Dingin A Kalmi Pyusawhti Cu PDF Nih An Kah Hna Caah Pahnih An Thi. Magway ramṭhen, Myaing peng Tayetkua(သရက်ကွ) khua, mepe dum lei kalmi pyusawhti hna cu nizan November 22 zing sml 7:30 hrawngah PDF nih an kah hna i pyusawhti pahnih an thi, tiah theih a si.

“Mepe a phawitu pyusawhti hna humhimnak lakpiak dingin pyusawhti 10 hrawng an kal lioah kan kah hna i pahnih an thi. Annih hi Tayetkua khuami an si,” tiah bawino Mipua nih a chim. “Kaphnih kar kahdohnak minutes 10 chung hrawng a chuak. A hmun ah a thimi hi pyusawhti pahnih an si i hliamhma pumi zong an tam.

Kanmah lei in a thimi le ai hliammi kan um lo,” tiah a chim chap. Tutan kahdohnak hi Wolf Guerrilla, Pakokku PDF, Middle Revolution Tesk Force (MRTF)၊ JRT၊ GOE၊ Royal Seven le Aung Kyi phu hna i bawm in an tuah mi a si, tiah theih a si.

Hmawbi No.4 Lam Um SAC Checkgate Bomb Puahhnawh An Tong, 4 An Thi. Yangon ramṭhen, Hmawbi peng Tephyu khua no. 4 lam cungum SAC checkgate cu November 23, zingah lamhla in controlmi bomb an puah hnawh hna tiah Yangon Urban Guerrilla Army (YUGA) sinin theih a si.

SAC ralkap le palik tampi umhmun an khuarnak checkgate cu lamhla in control mi bomb lung 2 in kan puah hnawh hna caah SAC ralkap 4 an thi, hliamhma tuarmi zong an tam tiah YUGA in ṭuanvo ngeitu pakhat nih a chim. Cu kahdohnak cu Yangon chaklei pengkomh tualchung hriamtlaiphu le Yangon Urban Guerrilla Army (Mo-Mo7 Eagles) phu hna i bawm in an tuahmi a si tiah theih a si.

Kahdohnak kong he pehtlai in Yangon ramṭhen palik he ai naihniam mi pakhat nih cun a thi mi hna hi palik le mawtaw PK (traffic) an si tiah a chim.

Myauk U Peng Sianginn Pakhat Ah Siangakchia Minung 10 Hrawng Thaw Chuah Kho Loin An Um Caah Sizung An Phan. Rakhine ramkulh, Myauk U peng Kwaytae (ကျွဲတဲ) khua siangsangrun ah November 23, zinglei ah nu siangakchia 10 hrawng cu hmakhat te ah thaw chuah kho loin an um tiah theih a si.

November 23, zinglei sianginn an kai lio ah Grade 9 siangakchia pakhat cu thaw chuah kho loin a um, cu tlawmpal ah midang siangakchia minung 10 hrawng zong thaw chuah kho loin an um, a thaw a pit mi chung ah lung zawtnak a ngeimi hna le sizung in a chuak ka mi zong an i tel tiah Kwaytae (ကျွဲတဲ) siangsangrun sianginn cachim pakhat nih a chim.

Thaw chuah kho lo le thaw zat loin a um i a damlo mi siangakchia hna cu Myaung sizung ah an thlopbul hna i oxygen an pek hna tiah a chim chap. Kwaytae (ကျွဲတဲ) siangsangrun sianginn ah a tubantuk in thil a can caah caan karlak chung cu sianginn kharchung a si lai tiah theih a si.

SAC Ralkap Nih PDF Sinah Tangka Kyats 5,000 Na Bawmh Hna Tiin Khanti Minu Pakhat Cu Sual An Phawt Caah Kum 10 Thong Thlak Ding In Biakhiahnak An Tuah Piak. PDF sinah Kpay in tangka kyats 5,000 na bawmh hna tiin Khanti(ခန္တီး) minu Aye Thiri cu SAC ralkap nih sual an phawt caah nizan November 22 ah kum 10 thong thlak ding in bia an khiahpiak, tiah theih a si.

“Tangka na bawmh hna tiin SAC kuttang pengkomh sakhan hmu Aye Kyaw le a kuttang rianṭuantu hna nih hranhram in an rak tlaih i, nizan November 22 ah kum 10 thong thlak ding in bia an khiahpiak. Biaceih zung sang deuh ah kai ṭhan(Azukhan)ding in timhtuahnak kan ngei ko nain tangka tam tuk kan dih lai,” tiah Aye Thiri a chungkhat pakhat nih a chim.

Aye Thiri cu Khanti khua amah umnak inn ah a luancia Febuary 21 ah SAC ralkap nih an rak tlaih i Khanti pengkomh sakhan ah thla 9 chung an hren hnuah nizan November 22 ah bia khiahnak an tuah piak hi a si. Kum 27 a simi Aye Thiri cu a ngan a dam lo ngaimi a si pinah an rak tliah lio zong ah a lung a mit i lutaw hngal loin a rak um caah kan thin a phang ngaingai, tiah a chungkhar pakhat nih cun a chim.

Pauk Peng Ah PDF Nih Khuate A Khangtu SAC Ralkap 11 An Thah Hna. Magway ramṭhen, Pauk peng Kyuntaing(ကျွန်းတိုင်း) khua a khangtu SAC ralkap hna cu, voithum tiang kan kah hna caah SAC ralkap 11 an thi, tiah Myaing Pah Kah Phah nih cathanh an chuah.

Nizan November 22 zing sml 10:30 hrawng in sml 11:15 tiang Pauk peng Kyuntaing khua chaklei ah SAC ralkap le Myaing Pah Kah Phah kar kahdohnak a chuah hi a si. SAC ralkap a thimi le aa hliammi an tam caah Kwekone khua cu zanlei sml 5:18 hrawngah an khangh i khuami zong an zam dih. Cun Myaing Pah Kah Phah in ralkap pakhat hliamhma hme a pu ve, tiah an cathanh ah cun an langhter.

Cu kahdohnak cu Myaing Pah Kah Pahh le PKU Guerrilla, Muaipua Guerrilla, Tainhlua Mohseih(တိမ်လွှာမုတ်ဆိတ်) le Pauk PDF hna i bawm in an tuah mi a si tiah theih a si. Credit: The Chin Post