Min Aung Hlaing nih Chin ramchung ah thilri an kan zuar ning cu a mak ngai ve!

Falam Khua Chungah SAC Kuttang Rianṭuantu Hna Nih Eidin thilri Thilman Fawi Tein An Zuar!
=========
Chin ramkulh, Falam khua ah SAC ralkap kuttang rianṭuantu Sipin Committee nih mipi sinah eidin thilri man fawi tein an zuar, tiah theih a si.

Falam khuami pakhat nih, “Nihin September 12 ah Falam khua Town Hall ah SAC kuttang rianṭuantu a simi hna nih, eidin ding thilri an zuar. An zuar ning hi phun dang te a si, a lenglei zuarmi nakin man fawi deuh tein an zuar. Nihin lawng an zuar lai,” tiah The Chin Post ah a chim.

“SAC kuttang rianṭuantu hna nih Town Hall ah eidin thilri an zuar, cuti a zuarmi hna an pawngkam in palik nih humhimnak an lakpiak hna. Atu bantuk in eidin an zuarmi hi mizapi an kan lem a si. Anmah lei ṭan ding le anmah he rianṭuanṭi dingah thil an tuahmi a si.

Mizapi cungah tlaihkhih, tukvelh le thahnawnnak an tuahmi vialte hi eidin man fawi tein an zuarmi nih kan lung hnemh aa zuammi a si. Hi bantuk in hmailei zong ah thil man fawi tein an zuar te lai caah mizapi nih ṭha tein kan i fian a herh,” tiah Falam khua ummi pakhat nih The Chin Post ah a chim.

A luancia September 10 zongah Hakha khuapi chung zung pakhat hmai ah SAC kuttang rianṭuantu hna nih eidin ding thilri an rak zuar ve cang.

Kalay Peng Nanzalu Khua Cu SAC Ralkap Nih Mei An Phih. Kalay peng Nanzalu khua cu SAC ralkap nih mei man an khawlh hna i, khua ning piin an pek duh lo caah mei an phih hna, tiah theih a si. “Nanzalu khua nih mei man caah kyats sing 40 nan pek lai, tiah SAC ralkap nih khuami cu an ti hna i an pek duh lo caah an khua certual pawng ummi Transformer mei hri cu an kan phoih piak dih”, tiah tualchung mi siin theih a si.

Inn pakhat ah cu zat nan thawh lai timi um loin Nanzalu khua nih kyats sing 40 nan thawh lai tiah an ti hna. September thla caah maw a silole zeitik thla caah dah mei man an khawlh hna ti cu hngalh a si lo.

September 8 lioah SAC ralkap motor 2 cu, Chanmyae Aungsi(ချမ်းမြေ့အောင်စည်) sang ah bomb puahhnawh an tong i, a pawngkam vialte cu chun ni tlak chekhlatnak an tuah caah dawr hngaktu cheukhat le payan(ပန်းရံ) rianṭuanmi minung 15 nak tlawm lo cu SAC ralkap nih an tlaih hna.

Nanzalu khuami hna cu SAC ralkap nih mei an pek ti hna lo caah Phazawngdan, solar le mei seh an hmang tiah theih a si. Nanzalu khua lawng si lo in Kalaymyo khua hnulei ummi Sanpiah, Wyahlah(ရွာလှ) le Natkyikung(နတ်ကြီးကုန်း) khua hna zong SAC ralkap nih mei an phih piak hna, tiah theih a si.

Myanmar Ramchung Ah Covid-19 Zawtnak A Karh Than. Myanmar ram chungah Covid-19 zawtnak a thar in a karh ṭhan i nizaan September 11 ni, nikhat chung ah Covid zawtnak minung 189 an hmuh than tiah SAC ralkap kuttang um ngandamnak lei vuanci zung nih a thanh.

SAC tangum Ngandamnak lei vuanci zung nih September 11, zaan suimilam 8:00 tiang cathanh an langhter ning ah chekhlatnak tuahmi 9,378 chung ah Covid-19 zawtnak a ngei tiah zawtnak hrik hmuhmi zatuak 2.01 an si tiah an langhter.

Covid -19 zawtnak aa chawnhmi minung 189 chung ah minung 173 hi ramchung in aa chawnhmi an si i, minung 16 hi ramleng in aa chawnhmi an si tiah ngandamnak zunglei nih an thanhmi ah cun an langhter. ” A tutan Covid zawtnak hi, raikhamsii aa chun mi hna cung zongah hmuh a si caah mah tein leng chuahlo in i runven a hau.

Covid zawtnak ruangah nunnak liammi an tlawm tilo caah mah tein i runven a herh. Leng chuahtik zongah mask hruk philhlo ding le, mask aa huplo mi kan hmuh hna zongah mask i huh ding in kan theihter ṭhan hna a hau” tiah Yangon khuachung ummi pakhat nih a chim.

Mipi ngandamnak kong he pehtlai in lakhruak i zohkhenh a herh caan ah, mi bawmchanhnak a tuahtu Yangon um volunteers hna zong nih Covid-19 zawtnak kong he pehtlai in zulhphung hna cu felfai tein mipi lei nih zulh ding ah theihternak an tuah ṭhan.

Myanmar ram pumpi huap Covid-19 zawtnak ai thok kum, 2020 kum in 2022 September tiang ah Covid zawtnak aa chawnhmi 616,663 an si i, minung 19,442 cu Covid zawtnak in an nunnak a liam tiah SAC ralkap kuttang um ngandamnak lei vuanci zung nih an cathanh chuahmi ah an langhter. Credit: The Chin Post