Thlichia Ruangah Hartong Mi Bawmchantu Hna Cu Rakhine Ramchung Lut Ti Lo Ding In SAC Nih A Kham Hna!
===================
Ram kip bawmchantu bu le zatlang bu hna cu Rakhine ramkulh chung ah lut ti lo ding in June 7 ah Rakhine ramkulh Minister of Security and Border Affairs Colonel Kyaw Thura nih khamnak nawl a chuah. Minung a sing leng in Mocha thlichia ruangah har a tongmi Rakhine rammi hna ca ah bawmhchanh ding le inn rawkral sakremh ṭhannak ding in ramchung zatlang bu hna le ram kip in bawmchantu bu hna nih faak piin an i zuam cuahmah lio ah SAC kuttang Rakhine ramkulh cozah zung, Coordinating Committee nih Rakhine ramchung luh ti lo dingin a kham hna, tiah theih a si.
https://www.facebook.com/photo/?fbid=630025782481881&set=pcb.630025872481872&__cft__[0]=AZXHf3ArMO5b0azsv4Xnk4mT_X4c78B3yyS8aC7L1FxisNnyEcCe0bamLExbVBv_3DTtDSgi9GIif4VwoklysdrCn7BYZwhgHkXQcDRTQxeKwyQFWlCs8ItkR3_SJaqqhBQXl6pk6PHD4HBJ08EaJb05s88R9FzDwC2t-fVGb1Rg-3Hv9P_pAvO3hrgxF7v3b8o&__tn__=*bH-R
Sittwe khuapi ummi mibawmchantu pakhat nih, “SAC nih Rakhine ramkulh chungah khualtlawn an khamnak kong kan thei rih lo nain Rakhine ramchung ah bawmhnak thilri duh poh in pek khawh a si ti lo. SAC ralkap chek gate nih khualtlawnnak nawl an pek duh lomi hna an um pah cang,” tiah a chim. Atu bantukin Rakhine ramchung ah khualtlawnnak nawl an onh ti lomi kong he pehtlai in Rakhine ramkulh cozah chimphuannak nawlngeitu Attorney General Hla Thein cu Irrawaddy nih pehtlaihnak an tuah ko nain a cohlang lo, tiah The Irrawaddy nih a ṭial. SAC ralhrang Bawi pawl le AA bawi pawl nih Rakhine hartong pawl bomhchanh dingah tonbiaruahnak an ngeih mi cu a Laka bak asi cang ko hih.
June 6 Zing suimilam 4:00 in 7:00 kar ah KNLA le tangti phu hna nih KNU Kaw Htoo Lei hmunram, Mu khuakomh le Leido khuakomh chung um SAC ralkap umhmun khuarnak sakhan 5 cu an laak i, an hrawh dih lengah SAC ralkap eidin phorhnak hlei 3 zong an hrawh, tiah KNU nih an thanh. KNLA nih an laakmi SAC ralkap sakhan 5 hna cu Yedwinkung sentari hngahnak sakhan, Nattankwin Palek sakhan, Kunchaungwah nichuahlei BGF sakhan le Tadaw sakhan hna an si i, an hrawh mi hlei 3 cu Nattankwin hlei, Ungnyepyin le Nwaypyin kar hlei, Htarsi le Htarsung hlei hna an si.
Kahdohnak ah hin SAC ralkap in 40 an thih pin ah 12 hliam an tuar, KNLA lei in minung 4 an nunnak a liam i, 13 an i hliam. KNLA tangti phu hna nih hriamnam zeimawzat le phaisa zong an laak, tiah KNU nih cun an thanh. KNLA le tangti phu hna cu SAC Sakhan an lak lio ah Jet Fighter in voi 3, raltuknak helicopter in voi 6 a kah hna lengah SAC ralkap nih Sittaung tiva nitlaklei in nichuahlei khua hna ah hriamngan pehtlaih in an kah.
Hriamngan kahnak ruangah KNU Leido khuakomh in khuate 6 le KNU Mu khuakomh, khuate 5 in minung 4508 cu ralhrial in an zaam hna. June 7 zing suimilam 8:15 i an hrawhmi Nattankwin hlei le Palek sakhan ah a rak phan ṭhanmi SAC ralkap hna nih, Nattankwin um khuami a zaam lomi pawl cu hramhram in an ṭhialter hna, tiah Karen National Union nih cun anmah facebook page ah an taar.