SAC Nih Riankhinh Mi Rakhine Ramkulh Minister Than Htun Cu Lung Zawtnak In A Thi. Rakhine ramkulh ah SAC nih rian an khinh mi Natural Resources Minister Than Htun cu nizan March 24 ah lung zawtnak in, ruah lo piin a thi, tiah theih a si.
Nizan March 24, zinglei suimilam 6:00 hrawng ah SAC kuttang ah rian a ṭuan lio mi Rakhine ramkulh Natural Resources Minister Than Htun cu lung lei dam lonak ruang ah Sittwe khuapi a umnak in ah ruah lo piin a tlu i Sittwe siizung ah an kalpi ko nain zinglei suimilam 7:00 hrawng ah a thi, tiah thawng laak hrampi nih an chim.
Sittwe khuapi ah a um mi U Than Htun(kum 67) cu Rakhine miphun a si, SAC ralkap nih hramhram in uknak an laak hnu ah SAC nih Rakhine ramkulh Natural Resources Minister ca ah an thim mi a si i, a hlan ah cun Sittwe khuapi chung zatlang rianṭuannak le biaknak he aa pehtlai mi rian ah biatak ngaiin a rak cawlcang tawn mi a si, tiah an chim. The Chin Post