Min Aung Hlaing Mang Chiat Le Na Suk

Na suk le MAH mang chiat
=========
Kawl ralhrang hruaitu pawl nih hin kut ttial zoh le hmailei kong a chimtu hna (bae din saya) sin hin ruahnak an hal lengmang hna ti asi. Cu I an chimh mi hna cu biatak te in an zumh I tuah uh an ti hna ning in an tuah ti asi fawn. Benabia ah Ne Win nih vawlei cung I a um ballo mi phaisa Kyat 15, 45, 90 ca ti bantuk pawl arak tuah mi zong kha vanchiat nak a cung I atlung ding mi kham nak ah phungki le baedin saya nih an chimh ning in a rak tuah ti asi. Vawlei cung phaisa ah aum ballo mi kha rampi pakhat a rak kan hman ter ko.

Cun Than Shwe chan ah khan “Ciat Su” timi thingkung in “bio fuel” (patrol bantuk motor zong mongh khawh nak) chiti kan chuah lai tiah ram pumpi rak cin ter asi. Ahnu ah mah kha ram pumpi cinter an si nak kha Aung San Suu Kyi huham tei nak ca ding ah hihi ram pumpi in na tuah a hau tiah phungki pa nih a rak ti caah asi e an ti hoi.

Cun, atu ah Kawl ralhrang nih ral ram an kal tik ah paikawng (Chin tiah kawl holh in an ti) an I bei. Vawlei cung khoika ralkap hmanh nih paikawng bei in ral ram ah an kal ral an tu ti theih asi ballo. Hiti an I bei nak hi MAH an lu asi hnu 2010 hnu hrawng in asi.

Mi 2-3 sin in ka theih nak ah phungki le kutttial zoh thiam nih Chin miphun nih hin na nawl neih nak hi an in tei te khawh mi asi caah mah cu kham nak (Yaa-ttha-che kawl holh in) nak ah na ralkap pawl hi paikawng (kawl holh in Chin) na bei ter dih hna lai ati caah kawl ralhrang pawl nih paikawng (Chin) an ibei nak hi asi ti asi.

Cun atutan Chin ram, Sagaing ram then le Magwe ram tthen I ttatma 9 bak hmang in Burma ram tuanbia ah a lian cemmi clearance operation hi a min ah Anawrattha tiah a hmasa bik kawl siangpahrang le Buddhism ram pumpi ah do tla in a luh pi ttu min kha an pek.

Cu a lianngan ngai mi Anawrattha siangpahrang cu Na (buffalo) nih a suk I athi tiah kawl tuanbia ah aum. Cu caah Anawrattha cearance operation hi Natum operation ( cuai yaing sit sin zi) in kan kham lai tiah a ruat mi zong an um. Cu llio theng te ah Na nih Kawl ral hrang asuk I athi timi cu MAH le a hawi le caah cun an mang zong a chiat phah dih ko lai.

Zei ca tiah paikawng (Chin) ralhrang vialte nih an I bei bu ah Chin miphun nih fak cem in kan doh tthiamtthiam hna. Cun Anawratha operation tiah min lian taktak a bunh mi ah Anawratha siangpahrang pa na nih a suk I a rak thih bantuk in a tu ah a ralkap pa Anawratha operation I aitel mi na nih thi lak in asuk ti asi hoi. Credit: Salai Bawi Lian Mang