Min Aung Hlaing Lungput Bantuk Ngeih A Herh

Min Aung Hlaing Lungput Bantuk Ngeih A Herh
=================
Myanmar ram cu 1962 lio in ralkap nih hranhram in nawl ngeihnak an rak laak i nihin ni tiang anmah nih a pehpeh in an kan uk peng. Hihi zeiruangah a si ti ahcun mipi zawn an ruat lo, anmah zawn lawng an i ruah ruangah a si.
Atu ah Min Aung Hlaing hi thaizing kip april thla ah pensen la ding a si cang. Asinain amah kut chungah nawl ngeihnak um peng seh ti a duhmi pa, mah zawn lawng ruat a si. Mipi nawl ngeihnak ka chuh hna i ka laak ahcun ram a buai lai i thisen tampi a luang te lai ti kha a hngalh ciami a si ko lai. Sihmanhsehlaw amah kut chungah nawl ngeihnak a um paohpaoh ahcun zeitluk in mipi thisen a luan i an thih zongah a poi a ti lo. Mipi an thih thluahmah zongah keimah ka thih lo paoh ahcun a za timi lungput a ngei.

Hitler khi amah kut chung lawngah nawl ngeihnak um seh ti a duhmi pa a si ve. Amah a lu bik a si peng khawh nakding ahcun a ralkap țuan hawi zong a thah thluahmah ko hna. Hmailei ah a lu cung kai kho ding tiah a ruahmi hna cathiam le mifim deuh paoh cu an thih i an ci a mih dih kha a zei a poi lo i a thah thluahmah ko hna. Jewish miphun hi Hitler chan ah mifim thiam an rak tam taktak i, a tawinak in chim ahcun cucu Hitler nih a duh lo i 6 millions a rak thah hna.

Kawl miphun cu nawl ngeitu a lu bik si, țhutdan cung țhut an duh ahcun pa le fa hmanh ai thatmi miphun an si. Mindungmin siangpahrang chan lio te khan a lu bik si duh ruangah țhutdan cung țhut ai cuh i a rak i thatmi miphun an si. Pa le fa hmanh amah thih zongah keimah ka thih lo paoh ahcun a poi lo timi lungput a ngeimi an si. Atu ah Min Aung Hlaing nih hranhram in nawl ngeihnak a laakmi hi a nunchung paoh amah kut chungah nawl ngeihnak um seh timi lungput a ngeih ruangah a si ko. Cucaah zeitluk in ram mipi an thih le a kut tang ralkap an thih dih hmanh ah amah a thih lo paoh ahcun a za timi lungput a ngeih ruangah a si.

Cucaah cun hranhram in nawl ngeihnak a chut i dinlonak in ram a uktu ralhrang hruaitu Min Aung Hlaing le a kut tang ralhrang ralkap vialte kan tei khawh hna nakding ahcun mipi nih Min Aung Hlaing lungput bantuk kan ngeih a herh. Ram ai thlen le ram chungah dinnak a um i mipi duhnak in mipi cozah kan ser khawh nakhnga mi zeihmanh i zaangfah ding a si lo. A thli in ralhrang ralkap sinah thawng a petu pawl zong ngaihthiam lengmang le zaangfah lengmang i thlah țhan lengmang zong an herh lo.

Atu lio ah cun ralhrang ralkap leiah a țangmi paoh cu pa le fa, nu le fa le unau sahlawh cingla rualchan kan si ai timi lungput hrimhrim ngeih ding a si ti lo. Ralhrang Min Aung Hlaing hruaimi ralhrang ralkap kan doh i kan tei khawh nakding ahcun midang cu an thih dih zongah keimah ka thih lo paoh ah a za timi ralhrang Min Aung Hlaing lungput le ruahnak bantuk kan ngeih cio a herh. Cu bantuk lungput le ruahnak kan ngeih ve lawnglawng ah atu kan dohmi hi kan tei khawh lai. Salai K. Biak Lian Thawng