Min Aung Hlaing le Soe Win lunglomh he an khat ruangmang cang!!

Dalaan Pawl Biaceih Ding Kha, Dalaan Thahnawn Kan Tuah Caah: NUG hlawhtlin ter lo tu asi. Ramdang nih an kan bawmh lo nak le DDay an cohlan lo nak, a ruang zong asi!! By Joseph R. Thang (MAL Cu Aa Lom Ngai Lai Hi Ta A Poi Ko)
================
Federal Pennak Le Rule Of Law Cu Then Khawh Asilo, Rule Of Law timi cu Upadi cung ah mi zeihmanh um lo ti asi. Mikip cu Upadi hmai ah kan i ruang dih, misual le mi dinfel tiah thleidannak aum lo ti hi Rule Of Law cu asi. Rule Of Law a um lo ahcun Democracy in kan tlau. Federal ram he Van le vawlei tlukin kan i hlat.

Federal ram ah lutpi ding ah an kan hruaitu Mino hna nih Rule Of Law hi zeirelloin kan um awk asi lo. Mi tampi nih CDF an kan tih mi hi asi awk asi lo. Kan i remh awk asi cang. Rule Of Law a um lo, Upadi loin khuasa mi kan si ahcun, Federal ram ah nan kan lutpi khawh lai lo.

Dalaan hi mipi asi ve. Tukvelh loin, a bia tu kan ceih piak deuh awk asi. Upadi ah aa ruang mi kan si caah, Sihnih le bawmhtu upa aa sawm khawh. Tehte tling he biaceihnak ah aa phisin khawh. Nain kannih cu a hmun a rilko in cumh / kan vuak/ kan chuih / kan lamh / kan thongh / kan thah. Kan cumh nak ah an thi. Thi deng in kan vuak hna. Nuhrin covo kan buar dih. Geneva Convention kan buar dih.

Dotlami Upadi (Chin Acts / Tise Upadi) loin Dalaan biaceihnak hi NUG a hlawhtlin ter lo tu asi. Ramdang nih an kan bawmh lo nak le DDay an cohlan lo nak a ruang zong asi. An kan bawmh zong ah tin sih chih in asi ve. Dalaan cu kutpar in tongh loin, A biaceih ding tu asi. A sualnak he aa rup in ral dih hlan lo thongthlak, a ngeihmi thilri, hlawnthil le innlo, dum hau, satil tiangin chut dih awk tu asi. Asilo ahcun A innlo hrawk piak dih / khuaram in tthawlh tbk tuin a bia kan ceih awk asi. Kan lak ah Dalaan kan ti mi hna hi kawl lei bantuk an si lem lo (An thah cia mi hna zoh tikah).

Dalaan cu thongthlak in a ziaza aa remh awk ah le kaltak awk ah cawnpiak khawh ahcun kanmah minung asi lai. Mi thluak tha hi Dalaan an tam tawn. A fim mi le afit mi an si caah, kanmah minung ah kan siam khawh hna ahcun bawmhchan tu tha bik an si kho.
Upadi hmai ah mipi vialte kan i ruang lo ahcun Nuhrin covo buar asi. Nuhrin covo buarnak ah Rule of Law aum khawh lo. Rule Of Law aum lo nak Federal pennak aum khawh ve lo. Ralhrang pennak le ANASIN pennak lawng a um ve. Cucu maw Federal ram ah lutpi tu ding Kan ralkap cu an si kun??????

Khaikam Khuachung Ah Ngal Pakhat Nih Mi A Seh Caah, Pa Pakhat Hliamtuar! Chin ramkulh, Khaikam khuachung ah nihin November 11 chunhnu ah Ngal pakhat cu khuachung ah a lut i mi pakhat a seh caah hliam tuar tiah theih a si. Cu Ngal cu 23 inches a dongsau i Khaikam khuachung ah ruahlo piin a lut in kutzungthiam( lat-ta-ma) pakhat rian a tuanlio ah a seh tiah theih a si.

“ Voi dangkel ah cun Ngol nih a paw zawn a ral na in, tutan hi a paw ah rallo in a kut seh ding in a ral, a kut seh ding a ral lio ah kutzungthiam pa( lat-ta-ma) nih cun Ngal cu a lu ah hreitlung in a tuk manh, a kut ah Ngal sehnak in hliam tuartu pa cu sizung ah an thlop, an nun humhimnak caah thinphang a si tiah theih a si” tiah Khaikam khuami pakhat nih a chim. Cun cu ka hmunhma ummi hna nih an kalpi ning le an zumhning ah khuachung ah Ngal a luh hi thiltha cu a si lo tiah tualchung mi pakhat nih a chim.

Kyeikhtu(ကျိုက်ထို) Peng Ah Tualchung Mi Pathum SAC Ralkap Nih An Thah Hna! KNU Brigade 1 hmunram Kyeikhtu peng ah a luancia October thla lio rallam a sialmi SAC ralkap nih, tualchung mi 3 an thah hna, tiah Thatone pengkomh nih cathanh an chuah. Kyeikhtu peng khuate ah a luancia October 13 ni thawk in SAC ralkap 300 leng nih rallam hmun hnih ah an sial i khuate ah an lut tiah theih a si.

Rallam a sialmi SAC ralkap nih kum 33 tluk A Thet Inkabu(အထက်အင်္ဂဘို) khuami Aung Myint cu October 14 ah an thah. October 19 le 21 ah kum 30 tluk Zaw Htet le kum 66 tluk Mone Kyi zong an thah hna, tiah an langhter. KNU, Thatone peng chungṭuan Padu Saw Aye Naing nih cun, SAC ralkap nih khuami inn le lo zong an hrawhpiak hna i an khanghpiak hna. Inn 10 a ciam i khuami thilri zong an firpiak han, tiah a chim. Kyeikhtu peng chungah SAC ralkap le KNLA kar kahdohnak voi 10 nak tlawm lo a chuak i kaphnih in a thimi le aa hliammi an um, tiah theih a si.

Ayartaw Peng Ah SAC Ralkap Nih Tualchung Mi Pahnih An Thah Hna, Khuami Inn Le Lo An Hrawh! Sagaing ramṭhen, Ayartaw peng ah SAC ralkap nih tualchung mi pahnih, Phu La Pih le Sein Thant cu ralphaw ah an hman hna hnuah an kah thah hna, tiah Ayartaw peng PDF in ṭuanvo ngeitu pakhat nih a chim. A luancia November 7 ah SAC ralkap pawl cu Wetpit khua ah an kut i, kum 26 tluk Phu La Pih le kum 20 tluk Sein Thant cu an baan an leh hna i, PDF nan si nan hruaitu khoika dah an um tiin an hal hna, tiah theih a si.

An tlaih hna hnuah Ayartaw-Wawtawma(ဝါးတောမ) lampi cungah an baan an leh hna i an lu ah meithal in an kah hna. An ruak cu khuami nih an fimhlawm hna, tiah theih a si. Thah a tongmi hna hi lo rian a ṭuanmi an si i PDF he pehtlaihnak a ngei lomi an si. SAC ralkap nih ralphaw ah an tlaih hna hnuah an thah hna, tiah tualchung mi hna nih an chim.

“SAC ralkap pawl hi rallam an sial caan ah an thilthuam i hruk loin mi sawhsawh bantuk in rallam an sial. Tualchung mi cu a thli tein an thah lengmang hna. PDF an tha a zor nakding in tualchung mi cu a phunphun in an hrem hna,” tiah Ayartaw peng PDF ṭuanvo ngeitu nih a chim. Khuate ummi cu theihhngalhnak an ngeih lo tikah an phone chung a ummi dohthlennak he aa pehtlaimi zong thianhhlimnak a ruah awk an hngal lo. SAC ralkap uk duhlohnak an langhternak hmanthlak zong an hnawt lo. SAC ralkap nih cu hmanthlak an hmuh tikah PDF he pehtlaihnak nan ngei tiin sual an phawt hna i an thah hna. Thah a tongmi pahnih zong hi PDF he pehtlaihnak zeihmanh a ngei lomi an si, tiah Ayartaw peng PDF in ṭuanvo ngeitu nih cun a chim.

CNO/CNDF Nih A Voikhatnak Thilṭhit Cawnnak An Tuah! Chin National Organization(CNO)/ CNDF nih a voikhatnak thilṭhit cawnnak cu nizan November 10 ah Mizoram ramkulh, Aizawl khua ah an tuah, tiah theih a si. Thilṭhit cawnnak cu CNDF ralkap hna, Mizoram Zokhawthar ah aa dormi ralzam hna, CNDF headquarter pawngkam ummi khuami le CDF-Mindat in ralkap hna telh in thilṭhit a cawngmi 12 he nizan November 10 ah honnak an tuah, tiah theih a si.

Hi thilṭhil cawnnak an tuahhnawh channak a ruang cu, ralkap thilthuam mah tein an i ṭhit khawh nakding le fawi zaang deuh in an cawk zuar khawh nakding ah thilṭhit cawnnak an tuah hi a si. A hlan ahcun India ram lei in thilthuam kan cawk ko nain kan herh caan le kan duh caan ah a rak phan kho lo. CNO/CNDF ralkap thilri vialte kanmah tein kan i ṭhit khawh ahcun thil fawi deuh ngai a si cang. Thilthuam mi ṭhitter cu aman a fah tuk caah kanmah tein kan i ṭhit khawh cang ahcun tangka kongkau zong ah kan tha a dam ngaingai cang lai, tiah CNO/CNDF in chungṭuan(Secretary 2) Mai Olivia Yinhua Thawng Luai nih a chim.

Chin Le Yaw Ramri Ah SAC Ralkap Nih Ralhrial 6 Le Chinmi 3 An Thah Hna, SAC Ralkap Pahnih Sniper In Kah Thah An Tong! Chin ramkulh, Mindat peng Palungtwe(ပလုံတွီ) khua(Chin le Yaw ramri) ah SAC ralkap cu, Yaw PDF bantukin an i umter i Yaw rammi ralhrial 6 le Chinmi 3 cu an thah hna, tiah CDF Mindat in chimphuannak nawlngeitu Salai Ha Om nih a chim.

A luancia November 7 zinglei ah YDF thilthuam i hruk in SAC ralkap cheukhat cu Chin ramkulh Palungtui khua ah an lut i, sii-ai thlopbulnak kan in tuah hna lai tiah an ti hna. Cu hnuah ralkap 100 leng cu an rak lut i tualchung mi le ralhrial 40 hrawng an tlaih hna, tiah a chim. SAC ralkap nih an tlaihmi hna chungah ngakchia le tar zong an i tel i cu chungah ralhrial pa 7 zong an i tel, tiah theih a si.

SAC ralkap pawl cu nizan November 10 ah Htilin khua lei ah an kir i, an tlaihmi chungin ralhrial pa pakhat zong an kalpi, tiah theih a si. SAC ralkap an kir hnuah humhma thianhhlimnak kan tuah i, SAC ralkap nih zohchia tuk in mei an khanghmi hna ruak hmun zong checkhkatnak kan tuah, tiah CDF Mindat nih cathanh an chuah.

“Ralkap an kir hnu in checkhkatnak kan tuah i cu chungah Chinmi 3 le Yaw lei in minung 6, an dihlak 9 cu SAC ralkap nih zohchia tuk in an thah hna, tiah Salai Ha Om nih cun a chim chap. SAC ralkap pawl cu kan kulh ko hna nain ralphaw ah an hmanmi khuami hna an um caah kan kap kho hna lo. Tualchung mi kan khamh khawh hna lo ruangah kan lung a ṭha hrimhrim lo, tiah CDF Mindat nih an langhter.
SAC ralkap an rak phak ni ah CDF Mindat nih sniper in kan kah hna caah SAC ralkap 2 an thi, tiah Salai Ha Om nih cun a chim.

Letpan Khua SAC Ralkap Nih An Khangh Pinah Nu 4 An Tlaih Hna! Magway ramṭhen Saw peng Letpan khua cu SAC ralkap nih an khangh pinah nu 4 zong an tlaih hna i, an nunnak ca ah thinphang a si ko, tiah Yaw Alin Tan phu in ṭuanvo ngeitu pakhat nih a chim. Nizan November 10 chun sml 12:50 ah SAC ralkap Tatma 55,11 le 101 in ralkap 80 hrawng cu Letpan khua ah an lut i, khuami inn pakhat an khangh pinah nu 4 zong an tlaih hna. Khuami pakhat zong a tlau, tiah theih a si.

“Chun sml 12:50 ah Letpan khua ah SAC ralkap 80 hrawng nih meithal an puah. Zanlei sml 4:30 ah inn pakhat an khangh. Nu 4 an tlaih hna i pakhat cu a tlau. Khuami a dang hi an him le him lo kan hngal kho rih lo,” tiah a chim chap. SAC ralkap cu zanlei sml 5:00 hrawngah Pasauk khua phungki sianginn le khuami inn cheukhat ah umhmun an khuar, tiah theih a si.