Min Aung Hlaing le Ralhrang nih, Daw Aung San Suu Kyi aum ti lailo caah!

Amay Suh Ramrian Hi Adih Taktak Cang Maw: PG (82)
=========
Kum (30) chung Anasin le Ralhrang hna hremhnak aphunphun cu: Hrikthak lobakin, a intuar khawhtu, Kanpi Amay Suh hi, Tutan thiamloco ternak nih, Kawlram Politic in, acan adih ter lai maw? Hranhram in Uknak Chuttu Ralhrang Rallokap Cozah nih Kanpi Amay Suh cu:

Kawlram Ramrian ah um ve hlah seh ti an duh; Thiamloco ternak (Cases) ahmuh (12) he tazacuai asi; Kum 100 thongthlak khawh asi; Ahmuh 5 in kum 6 thong thlak cia asi (January 10 ah biaceihmi case 3 caah kum 4 thongthlakmi telin); Kan hnu lei ahkhan Ahmuh (2) caah kum (4) thongthlak asi i, MAH nih kum (2) a zangfah; MAH nih a ukchung kum 7 aza cang tinak asi; Cucaah Vawlei mifim rual le Ram hruaitu hna nih, Amay Suh i Ramrian cu adih tak tak cang lai, tiah an Profet dih cang.

DASSK tazacuainak ahmuh vialte hi, ahram a umlo mi; Hranhram in, Sualnak kawlin, Thiamloco ter; Zumhawktlak asilo mi lawngte ansi caah; Kawlram Ramrian in DASSK Ṭhawlh anduh tinak Tehte cu asi. Hi ahmuh (12) in an hlawhtlin rihlo ahcun; Ahmuh dang an kawl Ṭhan lai. An hlawhtlin rihlo ahcun lamdang in a sual an kawl Ṭhan lai.

MAH nih a tuahding mi thimhnak ah DASSK i telve lo kha an saduhthah asi. DASSK tello NLD le Party dang cu an cohlan dih ko. Anmah nih thimhnak ah i tel an duh le duhlo, mipi zawn an ruah le ruahlo, mipi lei ah um in an Ṭanh le Ṭanhlo nih lai arel lai. NLD Luban le NLD MP tamnawn nih Rallokap he sen an thuh caah, NLD party cu phung ningin a nungrih ko tiah Zawmelung nih ati.

Adam lomi Anu Khin Ci zohkhen awk ah England in arak tlun taa mi DASSK cu: 8888 Dothlennak aathawk tir he acan aatawn ve. 8888 phu nih bia an chimhter caah Kawlram ah popular hram aa thawk. A min a thang tuk palia i lar ngai ngai in, Kawlram Ramrian ah, Cungsangbik le Cungnungbik dirhmun a phan colh ve. Ralhrang Ni Vung sin in, Uknak Chut awk ah, an fial nain, kei cu Politician kasilo caah, ka ngamh lo tiah, arak leh hna. U Nu nih Ni Vung nih Uknak hranhram in, a ka chut caah, adikmi uktu cu, keimah kasi caah, kasin ah uknak ka chanh uh tiah, U Nu nih, a phuang tikah DASSK nih a cohlan lo.

Ram dindeihnak ahnursuan tiah, 1990 July 20 ah, a voikhat nak, Inn thongthlak arak si. Ralbawihlun U Tin Oo le U Aung Shwe te ho in, NLD party an derh i DASSK cu an sawm ve. 8888 phu cu Party derh awk ah can an ngeih lo, Ralhrang le Anasin Ni Vung thlaknak caah, Dothlennak tu ah, Nunnak le Thisen, pekchan in, an can adih ve. 8888 theipar cu NLD le DASSK nih khim tein an baar.

1990 May thla ah thimhnak tuah asi. Todan 485 chungah NLD nih 392 a hmuh. SPDC nih an cohlan duhlo i, anaa an chanh duh hna lo caah, 1991 October thawkin, DASSK cu Innthong an thlak. 19 July lawngah DASSK cu TV ah, Kumkhat ah voikhat te, Mipi nih, hmuh khawh arak si. Apa Uk Sang Tlanlung ah Pangpar in a va biak caan asi.

Thang Sui le Ralhrang Rallokap Cozah chan ah, Kum 6 Inn thongthlak asi hnu ah, DASSK cu,1995 ah, cikkhat te a luat. Cu lio zong ah, NLD minung hna kha, target ah chiah in, an sualnak, an kawl lengmang hna caah, Thang Sui le Rallokap nih, Nuhrin Covo tampi an buar tiah Amnesty International timi Vawlei Pumpi Zalon Tertu phu nih, 1997 ah ca an chuah.

1997 kum ah A pasal Micheal Eris a thi. England ah ka tlung ahcun, kawlram ka lut Ṭhan khawh ti lailo, ti a phang caah, DASSK cu, A Pasal ruak hum ah, England ah, ka loin a um. Thang Sui nihcun kal sehlaw, tlung ti hlah seh, ti aduh. Kawl ram Politic ah, DASSK umlo kha an duh mi asi.

2003 May 13 ah, Dipezin ah, Rallokap minung hna nih, DASSK cu thah an zalh. NLD chungtel (70) leng an thi. Luat awk asi khawklo mi chungin, DASSK cu a luat. A luatlo dengmang. Dipezin kong he pehtlai in, a himbawm lo tuk caah tiah, DASSK cu Innthong thlak asi ṭhan. 2008 May thla ah, American mi, John William nih, DASSK he tawn ding in, Tilio in, DASSK inn ah Ni (2) a cam caah, DASSK Inn thongthlak can cu, thla 18 ankarh ṭhan.

2010 Thimhnak, adih hnu thla (1) ah, DASSK Innthong thlak can cu adih ve. Thimhnak ah, DASSK i tel khawh ve hlah seh timi le Kawlram Ramrian ah DASSK um ve hlah seh timi Thang Sui le Ralhrang Rallokap, an saduhthah a tling bak ve. Cuticun U Tin Sui hruaimi USDP nih, PM todan tambik an hmuh ve. Tin Sui cu Tamada a tuan i, ဖားတစ်ပိုင်းငါးတစ်ပိုင်းအစိုးရ timi Ralhrang Rallokap hnarcheu Cozah hram aa thawk ve.

Tutan MAH nih DASSK a tuahto dan hi hlanchan an lamthluan hlun asi. DASSK i Kum (30) chung ramrian kha hloh cikcek aduh caah, ahmuh phun phun tuah in, Thiamloco ternak phunzakip he, thong inn ah, a can dih sehlaw, Kawlram Politic in, DASSK tlau seh, ti kha, timh ciamam tein, thil an tuah mi asi.

Hunter Marston, Australia Amyotha University, nih, DASSK caah, Kawlram ramrian cu, a dik cikcek cang, ti khawh asi. Anasin thlaknak le Ralhrang Rallokap dohnak belte, Amah DASSK thawngin, a daih bal lailo ati. Alinsa deuh lai ati.

Hmailei Ramkhel rian ah, DASSK aa tel ti lailo nain, amah chan ah, a tuah khawh lomi, Federal Democracy lei tu ah, karhlan diam asi cang. Hlanlio Dothlennak cu DASSK ah aa hngat nain, Paucan Dothlennak cu GZ mino ah aa hngat. DASSK loin lamkal kan thiam cang tinak asi caah, Kawlram hi aa thlen bak lai i, a ṭhancho bak cang lai ti zong, 100% a fiang fawn.

GZ thawngin Singapore cu, kum (20) ah, kan lawnh lai i, Vawleipi ah Dotlami le a ṭhancho mi, miphun le ram ah, kan i sersiam khawh ve cang lai. Ram hruaitu thar cu, GZ mino in, aa siam te lai. Ram hruaitu hna hi, kawl miphun lawngin siloin, Miphun kip hna sin in, tampi an chuak cang i, an chuak rih te lai. Kawlram hruai ning zong, cungtang aa letthal dih te lai.

DASSK a um tilo zong ah, mipi nih, kan duhmi zalonnak le Federal Democracy Dothlennak cu, a linsa chin chin lai, tuanbia ah aum bal lomi, Teinak Cungnung he, inn kan tlun can a phan te lai. Cucan cu ara lio i, asi cuahmah fawn. MAH le Ralhrang Rallokap nih, DASSK aum ti lailo caah, fawi tein kan ukpen khawh lai timi Saduhtha le Theory an rawk dih cikcek mi belte, ruah ah, khat lei in, lungṭha lehlam lo. Zeitiawk ṭha hlah.MAH le Rallokap Uico rual an dongh ni kha, Kan Pathian nih, a rat ter cang, Vancung Pathian nih thimh hlei in thlahmi GZ mino, CDF, PDF thawngin. Credit: Saya H. Rung Kaw