Min Aung Hlaing Le Ralhrang An Bia Ceih Te Nak Ding Lam!

MAH le Ralhrang an Bia Ceih te nak ding lam
===========
IIMM le CHRO cu nizan tihni ah ton biaruah nak kan nei. Chinram le Chinmi kan um nak Sagaing le Magwe ramthen hna I MAH le Kawl ralhrang nih nuhrin covo an buar nak kong le zeitin dah an sual nak vialte hi record ah kan chiah lai timi kong ah a voikhat nak meeting kan tthut asi.

Geneva i aum mi IIMM timi hi Burma ram nuhrin covo le Democracy cawlcanghnak lei I ai tel pang mi nih cun theih pah cio asi lai dah. A dik thlir in kan theih lo hmanh ah a thluam thlam tal cun theih cio asi.

IIMM tiah a tawinak in auh mi cu Independent Investigative Mechanism for Myanmar tinak asi. 2018 ah UN Human Rights Council nih Burma ram caah adirh mi bu asi. UN nih Burma ram ah Ralhrang (Tat ma daw le cozah) nih nuhrin covo an buarnak hi a sawhsawh si lo in “crime against humanity” minung sinung phung ralchanh in (Pipu hna holh cun Mi kello) minung lungput le sining tiang lonh in mipi cung ah sualnak atuah. Hi an sualnak vialte hi ram chung beiceih nak ah, asi lo ah ram pakhatkhat biaceihnak ah asi lo ah UN nih a tawlrel mi biaceih nak ah ni khatkhat ah an bia ceih an si te lai.

Cu an bia ceih tik ah cun 2011 hnu I sualnak an tuah mi vialte kha ttha te in record ah chiah in mawhphurh nak (dan tat nak) pek khawh nak ah evidence (tehte) ah hman an site lai ti khi asi. Battalion commander thonk in a cung lei poh an min kan vun khomh hmasa hna. A hnu ah sualnak a tuah mipoh pumpak pakhat cio min zong kan khawmh khawh chung kan khawmh lai.

Pathian nih a rem a ti ah cun Kawl ralhrang hna nih kan miphun cung ah sual chimpit le mi kello thil an tuah mi vialte record kan tuah mi hna hi chim rel can le an bia ceih can a phan te lai. Tuan ah an bia ceih khawh nak ding tu hi kan zapi fak chinchin in kan ttan cio a hau mi asi.

MAH nih hramhram in uknak lak ai timh le kan dohnak thla 10 khengte kan phan. Mipi nih kan duhlo mi le kan doh mi cu hmual a ngei taktak. Kan mah Mipi zong kan tuar taktak ve. Asi nain mipi nih kan lung kan tthul lo. Kan ttang chinchin, kan tthawng chinchin. SAC le MAH ralhrang ram chung zong ah do an tla lo, ram leng zong ah do an tla lo chin lengmang.

Thla 10 cu minu nau a pawi mi hei si she law nau te a chuak diam ding asi cang. Asi na in MAH nih a hrin duh mi nau hi thla 10 tiang ah ai sem rih lo ti khhawh asi. Zeica tiah political umtu ning ah Coup hi dot 3 in kal pi asi tawn.

1. Control; Rampi mi mipi le political party pawl kha control khawh. 2. Stabilize: Rampi le mipi kha daite in um ter khawh I ram uknak mechanism vialte an mah le an si ning te in rianttuan ter khawh. 3. Implementation of Agenda; mah hi cu uknak a la tu hna nih an duh mi le an itinh mi lohma chuak lak in kalpi kha asi tawn.

Asi na in atu MAH le SAC ralhrang nih cun a dotkhat nak asimi Ram mipi control hmanh kha thla 10 hnu tiang ah a tuah kho rih lo. Ram pakhat I a nawl neih nak cu mipi sin ah a um mi asi timi cu tutan ah hin fiangte in kan langhter khawh.

Nizan ah UN General Secretary Special Envoy on Burma office in ttuanvo nei tu hna he ton biaruah nak suimilam 2 renglo biaruah nak kan nei. Cu I an kan chimh mi cu; Atu lio ah ramdang in Burma ram ah Ambassador an rak chiah mi hna ram 8 nih an Ambassador pawl kha an term a dih cang I an ram ah kir in ambassador thar rak thlah ding an si cang. Asi na in cu ram 8 nih cun Ambassador thar an thlah duh lo, zeica tiah ambassador thar rak thlah I MAH le SAC ralhrang sin in ram aiawh tu sinak Ambassador Credential pek kha an duh lo caah asi an ti ( UK nih cun Anbassador a rak thlah na in MAH le SAC ralhrang sin ah Credential a pe duh lo).

UN Special Envoy on Myanmar athar Singapore nu kha atu December thla in a rian a thok ding a si. Chin ralzam le IDP kong zong ah fak ngai in ttan kan la lai an kan ti caah kan hna a ngam. Zalon nak lam kan ithim mi asi. A fawi lai lo ti zong kan theih cia. A har lai ti zong kan theih cia. Kan tem lai, kan tuar lai ti zong kan theih cia asi. Asi na in minung caah a sunglawi bik mi cu zalonnak asi. A sung lawi bik mi asi caah a man a fak bik ve. Credit: Salai Bawi Lian Mang