Hriamnam He Kan Sin Ah A Rak I Fonh Mi Hna Cu Tangka Kan In Pek Hna Lai Tiah SAC Cozah Nih Thanwgthanh
=========
Kan sin ah hriamnam he a rak i fonh mi hna cu a tlawm bik tangka sing 2 in a tambik sing 75 tiang kan in pek hna lai tiah SAC cozah nih May 9 ah thawngthanh nak an tuah. ‘A ruang tampi ruangah PDF telh in ralhrang sin ah a phan mi hna le upadi leng ah a cawlcang mi phu hna siin a tulio ram caah a cawl cang lio mi le upadi ningin a cawlcang mi kan mah sin ah rak i fonh uh’ tiah SAC cathanh chuah mi ah an langh ter.
Kan sin ah a rak kir mi hna chungin mithah lainawnnak, tleihhremnak, pumpak hnursuan nak a tuah mi hna nan um sual ah cun upadi ningin biaceih zung ah kan in tawlrel piak hna lai i a herh ningin sual nan tuah mi cu thumh thlak piak kan in zuam hna lai tiah an langhter chih.
“Atu bantuk in SAC cozah thiltuah mi hi NUG cozah nawl an i cawn mi a si nain zeihmanh zumh ding an si lo” tiah SAC ralkap in CDM tuah mi Captian pakhat nih a chim. Mah pin ah SAC cozah sin ah hriam he a rak kir mi hna nih an hriamnam an rak i ken mi zoh in tangka pek ding ning cang, cu bantuk meithal phun ah cun tangka cuzat timi zong an langh ter chih.
Khaikam Le Kalay University SAC Ralhrang Sakhan Pawngkam Um Nih Umnak I Thial Dingin CDM Siyin Nih Thawngthan; Kalay myo Khaikam khua le Kalay University sianginn pawng SAC ralhrang sakhan he meng 1 dan ah a um mi hna nih a hnu bik May 10 ah nan umnak cio i thialkam dingin CDM Siyin nih mipi sin ah theihternak thawng an thanh.
Ralhrang sakhan he neihniam tuk in um mi hna nih May 9 in May 10 tiang i thialkam nak caan kan in pek hna, ai thialkam lo mi nan um sual i thil pakhatkhat a can sual ah cun tuanvo kan in la hna lai lo tiah May 9 ah mipi sin ralrin peknak thawng an thah hi a si.
“Mipi ralkap kan si bantuk in mipi sin ah fahnak pek kan duh hna lo, an humhimnak ca hi pakhatnak bik ah kan chiah mi a si” tiah CDM Siyin tuanvo ngeitu pakhat nih a chim. Hikong he pehtlai in “pawngkam mipi a zam mi hna cu nan inn kan khangh lai tiah SAC ralhrang nih an kan hrocer”tiah pawngkam mi pakhat nih a chim.
Khaikam khua le Kalay University sianginn pawng ah SAC ralhrang umhmun khuar mi hna nih Kalay-Tedim-Rihkhawdar khualtlawng motor hna cu an kham hna pin ah motor pakhat ah a tlawm bik sing 1 tiang ralhrang nih an hal hna hnu ah khualtlawng mi cu an thlah tawn hna tiah kan theih.
Bokepyin Peng SAC Ralhrang Gate Kahdohnak Ah Ralhrang 2 An Thi; Tanintharyi ramthen, Bokepyin (ဘုတ်ပြင်း) peng, Ban-kala khua pawng hlei cung SAC ralhrang gate pakhat cu PDF tangti phu nih an kah hna caah ralhrang 2 an thi tiah Pah-kah-phah tuanvo ngeitu pakhat nih a chim.
Hi gate ah hin SAC ralhrang thazaang 20 leng an um i May 8 zansuimilam 8 hrawng ah PDF-Kawtawng, Bokepyin- Fling Star Force le Pah-kah-phah hna i bawm in an kah hi a si. Hi kahdohnak cu suimilam 1 tluk an rau i ralhrang lei nih dongh cat lo in hriamngan in an kah hna. PDF tangti phu hna cu him tein hnu an pil than.
“Kahdohnak a chuah hnu in SAC ralhrang nih thazaang 20 leng an vun chap than hna i mipi sin ah check hlatnak zong an tuah hna”tiah khua mi pakhat nih a chim. Aluan cia May 2 lio zongah Bokepyin peng SAC ralhrang humhimnak (sah-ya-phah) zung pakhat zong PDF nih an rak kah hna caah ralhrang lei tang mi pakhat a thi tiah kan theih.Credite; Lungmili Post